Breakfast Recipe : ఫిట్​నెస్ మీద శ్రద్ధ చూపే వారికి బెస్ట్ బ్రేక్​ఫాస్ట్.. బాదం, కొబ్బరి పోహా

Breakfast Recipe : కొబ్బరి, బాదంతో చేసిన పోహా అత్యుత్తమ అల్పాహారం ఎంపిక. ఈ పోహా రెసిపీని సులభంగా ఇంట్లోనే తయారు చేసుకోవచ్చు. పైగా ఇది ఆరోగ్యకరమైనది కూడా. బాదం, కొబ్బరి మీకు ఆసక్తికరమైన టేస్ట్​ను ఇస్తుంది. కొలెస్ట్రాల్ సున్నా. కానీ అధిక ప్రోటీన్, కాల్షియం విలువతో కూడిన సరళమైన వంటకం. కాబట్టి ఫిట్​నెస్​ గురించి ఎక్కువ శ్రద్ధ తీసుకునేవారు కూడా దీనిని హ్యాపీగా తమ డైట్​లో చేర్చుకోవచ్చు. మరీ ఈ రెసిపీ తయారీ, కావాల్సిన పదార్థాలేమిటో ఇప్పుడు తెలుసుకుందాం.

కావాల్సిన పదార్థాలు

* బాదం ఫ్లేక్స్ - 200 గ్రాములు (బాదం పప్పులను సన్నగా తరగాలి)

* ఉల్లిపాయలు - 450 గ్రాములు

* పోహా - 200 గ్రాములు

* సాల్ట్ - తగినంత

* నూనె - 20 మి.లీ

* కరివేపాకు - 8 రెబ్బలు

* పచ్చిమిర్చి - 2

* తాజా కొబ్బరి - 100 గ్రాములు

కొబ్బరి, బాదం పోహా తయారీ విధానం

పోహాను చల్లటి నీళ్లలో నానబెట్టి.. వడకట్టి పక్కన పెట్టుకోవాలి. 3/4వ వంతు బాదం రేకులను నీళ్లలో నానబెట్టి.. మిగిలిన వాటిని టోస్ట్ చేయాలి. అనంతరం పాన్‌లో నూనె తీసుకుని.. ఆవాలు, కరివేపాకు, తరిగిన పచ్చిమిర్చి వేసి వేయించాలి. ఉల్లిపాయలు వేసి గోల్డెన్ కలర్ వచ్చే వరకు ఫ్రై చేయాలి.

ఇప్పుడు ఆ తాళింపులో నానబెట్టిన పోహా, బాదంపప్పు వేయాలి. అనంతరం తరిగిన కొత్తిమీర, తాజా కొబ్బరి తురుమును వేసుకోవాలి. చివరిలో రోస్ట్ చేసిన బాదంపప్పులను వేసి.. వేడిగా సర్వ్ చేసుకోవడమే.