tips for small bathroom: బాత్రూం ఇరుగ్గా ఉందా? ఈ మార్పులు చేయండి

చిన్నగా ఉన్న బాత్రూం అందంగా అలంకరించడం కష్టమే. కానీ కాస్త సృజనాత్మకత, కొన్ని చిట్కాలు పాటిస్తే స్థలం ఎక్కువగా కనిపించేలా చేయొచ్చు. స్టోరేజీ లో మార్పులు, సరైన గోడల రంగులు వాడితే చాలా సులువు. ఉపయోగకరంగా, అందంగా కనిపిస్తుంది.

ఈ మార్పులు చేయండి:

1. లేత రంగులు: బాత్రూంలో ఎప్పుడూ లేత రంగుల్నే వాడాలి. టైల్స్, గోడలు, వాష్‌బేసిన్ లాంటివన్నీ లేత రంగులోనే ఎంచుకోవాలి. దీనివల్ల స్థలం పెద్దగా ఉన్నట్లు కనిపిస్తుంది.
2. అద్దాలు: ఒక పెద్ద అద్దం లేదా అక్కడక్కడా చిన్న అద్దాలు పెట్టడం వల్ల దాన్నుంచి రిఫ్లెక్ట్ అయ్యే వెలుతురు వల్ల స్థలం పెద్దదనే భావన కలుగుతుంది. అలంకరణ వస్తువులాగా కూడా ఉంటుంది.
3. స్టోరేజీ: ఫ్లూర్ మీద స్టోరేజీ యూనిట్ పెట్టడం కన్నా గోడలకు అటాచ్ చేసుకోగల ఆర్గనైజర్లు వాడితే కింద ఇరుకుగా అనిపించదు.
4. చిన్న సైజు: వాష్ బేసిన్, షవర్ కార్నర్ చిన్న సైజువి ఎంచుకోవాలి. ఒక మూలలో ఉండేలా చూసుకోవాలి. మూలలో ఉన్న స్థలం వాడుకోవడంతో పాటూ, బాత్రూం పెద్దగా కనిపిస్తుంది.
5. షవర్ కర్టెయిన్లు: షవర్ డూర్ కోసం ముదురు రంగు కన్నా లేత రంగు కర్టెయిన్లు ఎంచుకోండి. అవి గదిని భాగాలు చేసినట్లు కొట్టొచ్చినట్లు కనిపించకుండా చేస్తాయి. కళ్లకు స్థలం పెద్దదనే భావనే వస్తుంది.
6. షెల్ఫులు: బాత్రూంలో ఉండే షెల్ఫులకు కబోర్డ్ చేయించకపోవడమే మంచిది. టవెళ్లు, సబ్బులు, షాంపూలు పెట్టుకోవచ్చు. అలంకరణ వస్తువులున్నా పెట్టుకోవచ్చు. రోజూవారీ వస్తువులు సులభంగా తీసుకోవచ్చు కూడా.
7. లైటింగ్: బాత్రూంలో సరైన వెలుతురు ఉండేలా చూసుకోవాలి. ప్రొఫైల్ లైటింగ్, ఓవర్ హెడ్ లైటింగ్, టాస్క్ లైటింగ్ వల్ల గది లుక్ మారిపోతుంది.
8. అలంకరణ: అందంగా కనిపించాలని అనవసరమైన వస్తువులు పెట్టొద్దు. అవసరమైన వస్తువులే అందంగా ఉండేలా చూసుకోవాలి. అంటే సోప్ హోల్డర్లు, అందంగా ఉన్న ట్రే, చిన్న మొక్క.. ఇవి చాలు.
9. హిడెన్ స్టోరేజీ: పెద్ద అద్దాలు పెట్టుకుంటే వాటిని ఒక తలుపు లాగా తీయించేలా చేసుకుంటే దాని వెనకాల కొన్ని వస్తువులు పెట్టుకోవచ్చు. ఇలా ఇంకేమైనా మార్గాలున్నాయేమో చూడండి.

వీటివల్ల చిన్న బాత్రూం పెద్దగా కనిపించేలా చేయడమే కాకుండా, అంగుళం స్థలాన్ని కూడా ఉపయోగకరంగా మార్చేయొచ్చు.