Vishwak Sen: దుమారం రేపిన ఆ ట్వీట్‍ను డిలీట్ చేసిన విశ్వక్‍సేన్.. ప్రమోషన్ స్టంటేనా?

Vishwak Sen: మాస్ కా దాస్, యంగ్ హీరో విశ్వక్ సేన్ ప్రస్తుతం గ్యాంగ్స్ ఆఫ్ గోదావరి సినిమా చేస్తున్నారు. ఈ మాస్ యాక్షన్ ఎంటర్‌టైనర్‌కు కృష్ణ చైతన్య దర్శకత్వం వహిస్తున్నారు. నేహా శెట్టి ఈ సినిమాలో హీరోయిన్‍గా నటిస్తున్నారు. గ్యాంగ్స్ ఆఫ్ గోదావరి సినిమాను డిసెంబర్ 8వ తేదీన థియేటర్లలో రిలీజ్ చేయనున్నట్టు గతంలోనే మేకర్స్ ప్రకటించారు. అయితే, ఆ రోజున మరిన్ని సినిమాలు పోటీలోకి రావటంతో ‘గ్యాంగ్స్ ఆఫ్ గోదావరి’ రిలీజ్‍పై సందిగ్ధత నెలకొంది. ఈ తరుణంలో నేడు (అక్టోబర్ 29) విశ్వక్‍సేన్ చేసిన ఓ సోషల్ మీడియా పోస్ట్ దుమారాన్ని రేపింది. బ్యాక్‍గ్రౌండ్ లేకపోతే ప్రతీ ఒక్కరూ ఆడుకుంటారంటూ ఘాటైన వ్యాఖ్యలతో ఆ పోస్ట్ ఉంది.

ఒకవేళ డిసెంబర్లో గ్యాంగ్స్ ఆఫ్ గోదావరి రిలీజ్ కాకపోతే.. ఆ సినిమా ప్రమోషన్లలో తాను కనపడబోనని తన పోస్టులో విశ్వక్‍సేన్ పేర్కొన్నాడు. “బ్యాక్‍గ్రౌండ్ లేకపోతే ప్రతీ నా కొడుకు మన గేమ్ మారుద్దామనే అనుకుంటాడు. నేను సినిమా చూడకుండా.. ప్రతీ ఫ్రేమ్ ప్రాణం పెట్టి చేసి చెబుతున్నా! డిసెంబర్ 8న వస్తున్నాం.. హిట్, ప్లాఫ్, సూపర్ హిట్, అట్టర్ ఫ్లాఫ్.. మీ నిర్ణయమే. ఆవేశానికి లేదా ఈగోకి తీసకునే డెసిషన్ కాదు. తగ్గేకొద్ది మి**తూనే (తొక్కేస్తూనే) ఉంటారని అర్థమైంది. డిసెంబర్ 8 శివాలెత్తిపోద్ది. గంగమ్మ తల్లికి నా ఒట్టు. మహా కాళీ మాతో ఉంది. ఒకవేళ డిసెంబర్ కాకపోతే ప్రమోషన్లలో నన్ను ఇక చూడరు” అని విశ్వక్‍సేన్ సోషల్ మీడియాలో పోస్ట్ చేశాడు.

విశ్వక్‍సేన్ చేసిన ఈ ట్వీట్ సోషల్ మీడియాలో దుమారం రేపింది. ఎవరిని ఉద్దేశించి విశ్వక్ ఇలా అన్నారనే చర్చ సాగుతోంది. అయితే, పోస్ట్ చేసిన కొంత సమయానికి ఈ ట్వీట్‍ను డిలీట్ చేసి ట్విస్ట్ ఇచ్చారు విశ్వక్. అయితే, విశ్వక్ చేసిన ఈ ట్వీట్.. ప్రమోషనల్ స్టంట్ అంటూ కొందరు నెటిజన్లు ట్వీట్లు చేస్తున్నారు. నిజంగా అక్రోషంతో పోస్ట్ చేసి ఉంటే.. డిలీట్ ఎందుకు చేసినట్టు అని ప్రశ్నిస్తున్నారు. గ్యాంగ్స్ ఆఫ్ గోదావరి సినిమాపై బజ్ నెలకొనేందుకు విశ్వక్ ఇలా చేశారని అనుమానిస్తున్నారు. అయితే, సినిమా వాయిదా పడుతుందనే బాధతోనే విశ్వక్ ఈ ట్వీట్ చేశారని మరికొందరు అతడికి మద్దతుగా ట్వీట్స్ చేస్తున్నారు. విశ్వక్ చెప్పింది వాస్తవమేనంటూ స్పందిస్తున్నారు.

గ్యాంగ్స్ ఆఫ్ గోదావరి సినిమా డిసెంబర్ 8న రిలీజ్ అవుతుందని మేకర్స్ గతంలో ప్రకటించారు. అయితే, సలార్ వల్ల నాని ‘హాయ్ నాన్న’ డిసెంబర్ 7కు, నితిన్ ‘ఎక్స్‌ట్రా ఆర్డినరీ మ్యాన్’ డిసెంబర్ 8కు రిలీజ్‍ను మార్చుకున్నాయి. వరుణ్ తేజ్ ‘ఆపరేషన్ వాలంటైన్’ కూడా డిసెంబర్ 8న రిలీజ్ కానుంది. దీంతో గ్యాంగ్స్ ఆఫ్ గోదావరి మూవీ వాయిదా పడుతుందని వినిపిస్తోంది. అయితే, ఈ విషయంపై అధికారిక ప్రకటన రాలేదు. ఈ తరుణంలో విశ్వక్ చేసిన ఈ పోస్ట్ దుమారం రేపుతోంది. అయితే, డిసెంబర్ ఆఖరి వారానికి ఈ చిత్రం వాయిదా పడుతుందనే అంచనాలు ఉన్నాయి.

సితార ఎంటర్‌టైన్‍మెంట్స్, ఫార్చ్యూన్ ఫోర్ సినిమా బ్యానర్లపై గ్యాంగ్స్ ఆఫ్ గోదావరి చిత్రాన్ని నాగవంశీ, సాయి సౌజన్య నిర్మిస్తున్నారు. ఈ చిత్రానికి యువన్ శంకర్ రాజా సంగీతం అందిస్తున్నారు. ఈ చిత్రం నుంచి ఇప్పటికే వచ్చిన ‘సుట్టంలా సూసి’ సాంగ్ మంచి క్రేజ్ తెచ్చుకుంది.