Vaasava Suhaasa Song released: వినరో భాగ్యము విష్ణు కథ చిత్రం నుంచి పాట వచ్చేసింది.. కే విశ్వనాథ్ చేతుల మీదుగా విడుదల

Vaasava Suhaasa Song released: టాలీవుడ్ యంగ్ హీరో కిరణ్ అబ్బవరం వరుస పెట్టి సినిమాలు చేస్తూ ఫుల్ బిజీగా ఉన్నాడు. ఈ ఏడాది ఇప్పటికే మూడు సినిమాలతో ప్రేక్షకులను పలకరించిన ఈ యువ కథనాయకుడు తాజాగా మరో సినిమాతో సందడి చేసేందుకు సిద్ధంగా ఉన్నాడు. అదే వినరో భాగ్యము విష్ణు కథ. సినిమా పేరుకు తగినట్లుగానే అచ్చమైన తెలుగు పాటను విడుదల చేసింది చిత్రబృందం . వాసవసుహాస అంటూ సాగే ఈ పాటను కళా తపస్వి కే విశ్వనాథ్ చేతుల మీదుగా విడుదల చేశారు.

వాసవ సహాస కమన సుధ.. ద్వారవతీతిరనాడ్వటీవసుధ అంటూ సాగే ఈ పాట ఎంతో రమణీయంగా ఉంది. అచ్చ తెలుగు పాటలు కొరవడుతున్న ఈ రోజుల్లో అచ్చమైన తేనెలొలికే తెలుగు పదాలతో వస్తున్న ఈ పాటను విడుదల చేసిన కే విశ్వనాథ్ చిత్రబృందంపై ప్రశంసలు కురిపించారు. తనకు ఈ పాటను చూస్తుంటే పాత రోజులు గుర్తుస్తున్నాయని, వినరో భాగ్యము విష్ణు కథ టైటిల్ కూడా చాలా బాగుందని మెచ్చుకున్నారు.

ఈ పాటను ప్రముఖ గాయకుడు కారుణ్య ఆలపించాడు. కల్యాణ్ చక్రవర్తి సాహిత్యాన్ని సమకూర్చాడు. చేతన్ భరద్వాజ్ ఈ సినిమాకు సంగీతాన్ని సమకూర్చారు. వినడానికి ఎంతో వినసొంపుగా ఉన్న ఈ పాట శ్రోతలను అలరిస్తోంది. పూర్తి పాట శనివారం సాయంత్రం 6.19 గంటలకు విడుదల చేయనున్నారు.

ఈ సినిమాలో కిరణ్ అబ్బవరం సరసన కశ్మీర నటిస్తున్నారు. జీఏ2 ఆర్ట్స్ పతాకంపై బన్నీ వాసు ఈ చిత్రాన్ని నిర్మిస్తున్నారు. మురళి కిషోర్ అబ్బూరు ఈ చిత్రానికి దర్శకత్వం వహించారు. ఈ సినిమా వచ్చే ఏడాది ఫిబ్రవరి 17న ప్రేక్షకుల ముందుకు తీసుకురావాలి చిత్రబృందం ప్రణాళికలు సిద్ధం చేసింది.