Prabhas | 'స్పిరిట్' చిత్రంలో డార్లింగ్ పక్కన హీరోయిన్ ఎవరో తెలుసా?

రెండున్నరేళ్ల గ్యాప్ తర్వాత రాధేశ్యామ్ చిత్రంతో ప్రేక్షకుల ముందుకు వచ్చిన ప్రభాస్.. ఫ్యాన్స్‌కు కాస్త నిరాశే కలిగించాడు. ఆ సినిమా అనుకున్న స్థాయిలో ఆడలేదు. దీంతో మన డార్లింగ్ తన తర్వాతి చిత్రాలపై దృష్టి పెట్టాడు. ఇప్పటికే సలార్, ఆదిపురుష్, ప్రాజెక్ట్ కే లాంటి చిత్రాలు పట్టాలెక్కాయి. ఇందులో సలార్, ఆదిపురుష్ వచ్చే ఏడాదే ప్రేక్షకుల ముందుకు వచ్చే అవకాశముంది. ఇక మహానటి ఫేమ్ నాగ్ అశ్విన్‌తో ప్రాజెక్ట్ కే అనే చిత్రం చేస్తున్నాడు. దీంతో పాటు అర్జున్ రెడ్డి ఫేమ్ సందీప్ రెడ్డి వంగాతో స్పిరిట్ అనే చిత్రం చేస్తున్నాడు. తాజాగా ఈ స్పిరిట్ సినిమాలో హీరోయిన్‌ ఎవరనే విషయంలో రెండు పేర్లు వినిపిస్తున్నాయి.

అర్జున్ రెడ్డి డైరెక్టర్‌తో చేస్తున్న ఈ సినిమాలో ప్రభాస్ సరసన రష్మిక మందన్నా లేదా బాలీవుడ్ బ్యూటీ కియారా అద్వానీ నటించే అవకాశాలు ఉన్నట్లు ఫిల్మ్ వర్గాల్లో చర్చలు నడుస్తున్నాయి. రష్మిక లేదా కియారా ప్రభాస్ పక్కన పర్ఫెక్టుగా సూటవుతారని సందీప్ అనుకుంటున్నట్లు సమాచారం. త్వరలోనే ఈ విషయంపై అధికారిక ప్రకటన వచ్చే అవకాశముంది.

ఇప్పటికే సందీప్.. రణ్‌బీర్ కపూర్‌తో యానిమల్ అనే చిత్రాన్ని తెరకెక్కిస్తున్నాడు. ఇందులో రష్మికానే హీరోయిన్. కాబట్టి ప్రభాస్ పక్కన నటించే అవకాశమూ లేకపోలేదు. మరోపక్క కియారా కూడా అర్జున్ రెడ్డి హిందీ రీమేక్‌ అయిన కబీర్ సింగ్‌లో సందీప్‌తో కలిసి పనిచేసింది. ప్రస్తుతం కియారా రామ్ చరణ్, శంకర్ కాంబినేషన్‌లో తెరకెక్కుతున్న చిత్రంలో హీరోయిన్‌గా చేస్తుంది.

ఇప్పటికే ప్రాజెక్ట్ కే షూటింగ్ మొదలు పెట్టిన ప్రభాస్.. మరోపక్క సలార్, ఆదిపురుష్ సినిమాల చిత్రీకరణలో పాల్గొంటున్నాడు. సలార్ షూటింగ్ పూర్తయితే స్పిరిట్ చిత్రాన్ని ప్రారంభించనున్నాడు. త్వరలోనే ఈ సినిమాను పట్టాలెక్కించి వరుస సినిమాలతో అభిమానులను పలకరించనున్నాడు.