Prabhas | ప్రభాస్ రాజా డీలక్స్ సెట్స్ పైకి వచ్చేది ఎప్పుడంటే...

ప్రస్తుతం మూడు పాన్ ఇండియన్ సినిమాల్లో నటిస్తూ బిజీగా ఉన్నారు ప్రభాస్. ఇటీవలే మారుతి దర్శకత్వంలో మరో సినిమాకు ఆయన గ్రీన్ సిగ్నల్ ఇచ్చిన సంగతి తెలిసిందే. సూపర్ నాచురల్ హారర్ థ్రిల్లర్ కథాంశంతో ప్రయోగాత్మకంగా ఈ సినిమా రూపొందనున్నట్లు వార్తలు వినిపిస్తున్నాయి. ఈ చిత్ర కథ మొత్తం ఓ పురాతన భవంతి చుట్టూ తిరుగుతుందని చెబుతున్నారు. 

ఈ సినిమాలో మాళవికామోహనన్ తో పాటు పెళ్లి సందడి భామ శ్రీలీల హీరోయిన్లుగా నటించబోతున్నట్లు వార్తలొస్తున్నాయి. మరో నాయిక కోసం చిత్ర యూనిట్ అన్వేషణ సాగిస్తున్నట్లు సమాచారం. ప్రస్తుతం ఈ చిత్రానికి సంబంధించి ప్రీ ప్రొడక్షన్ కార్యక్రమాలు శరవేగంగా జరుగుతున్నట్లు తెలిసింది. ఆగస్ట్ లో ఈ సినిమాను సెట్స్ పైకి తీసుకురాబోతున్నారని ప్రచారం జరుగుతోంది. తొలుత జూన్ నెలలోనే సినిమాను మొదలుపెట్టాలని చిత్ర యూనిట్ భావించినట్లు తెలిసింది. సలార్, ప్రాజెక్ట్ కే షూటింగ్ లతో ప్రభాస్ బిజీగా ఉండటంతో ఆగస్ట్ లో చిత్రీకరణను మొదలుపెట్టాలని నిర్ణయించుకున్నట్లు చెబుతున్నారు. 

డీవీవీ ఎంటర్ టైన్ మెంట్స్ పతాకంపై డీవీవీ దానయ్య ఈ చిత్రాన్ని నిర్మించబోతున్నారు. త్వరలో ఈ సినిమాకు సంబంధించిన అఫీషియల్ అనౌన్స్ మెంట్ రాబోతున్నట్లు తెలిసింది. ఈ సినిమాకు రాజాడీలక్స్ అనే పేరును ఖరారు చేసినట్లు సమాచారం.