Vijay Deverakoda: రాయలసీమ బ్యాక్‍డ్రాప్‍లో విజయ్ దేవరకొండ మూవీ.. మళ్లీ ఆ కాంబో.. షూటింగ్ ఎప్పటి నుంచంటే!

Vijay Deverakoda: రౌడీ హీరో విజయ్ దేవరకొండ ఫుల్ జోష్‍లో ఉన్నారు. వరుస సినిమాలో ఫుల్ బిజీ అవుతున్నారు. పరశురామ్ దర్శకత్వంలో ‘ఫ్యామిలీ స్టార్’ (VD13) మూవీలో ప్రస్తుతం నటిస్తున్నారు విజయ్. అలాగే, గౌతమ్ తిన్ననూరి డైరెక్షన్‍లో ఇంకో మూవీ కూడా ఆయన చేస్తున్నారు. వీటి తర్వాత ఓ విభిన్నమైన చిత్రం చేయనున్నారు విజయ్ దేవరకొండ. రాహుల్ సాంకృత్యన్ దర్శకత్వంలో నటించనున్నారు. గతంలో విజయ్ - రాహుల్ కాంబినేషన్‍లో టాక్సీవాలా తెరకెక్కి మంచి విజయం సాధించింది. వీరి కాంబో మరోసారి రిపీట్ కానుంది. ఆ వివరాలివే..

రాహుల్ దర్శకత్వంలో విజయ్ దేవరకొండ హీరోగా చేయనున్న ఈ సినిమా రాయలసీమ బ్యాక్‍డ్రాప్‍లో ఉండనుంది. అలాగే, ఇది పీరియాడిక్ యాక్షన్ మూవీగా ఉండనుందని తెలుస్తోంది. మైత్రీ మూవీ మేకర్స్ పతాకంపై నవీన్ యెర్నేనీ, యలమంచిలి రవిశంకర్ ఈ చిత్రాన్ని నిర్మించనున్నారు. ఈ మూవీ స్క్రిప్ట్ పనులను రాహుల్ ఇప్పటికే తుది దశకు తెచ్చినట్టు సమాచారం.

విజయ్ దేవరకొండ - రాహుల్ సాంకృత్యన్ మూవీ వచ్చే ఏడాది సెట్స్‌పైకి వెళ్లనుంది. వచ్చే ఏడాది మార్చి లేదా ఏప్రిల్‍లో ఈ సినిమా షూటింగ్ మొదలవుతుందని తెలుస్తోంది. గౌతమ్ తిన్ననూరి మూవీ పూర్తయిన తర్వాత విజయ్ దేవరకొండ.. రాహుల్ మూవీని మొదలుపెడతారని టాక్ వినిపిస్తోంది.

విజయ్ - రాహుల్ కాంబినేషన్‍లో 2018లో ట్యాక్సీవాలా సినిమా వచ్చింది. సూపర్ నేచురల్ కామెడీ థ్రిల్లర్‌గా వచ్చిన ఈ మూవీ మంచి విజయాన్ని సాధించింది. ఇప్పుడు మరోసారి ఈ కాంబినేషన్ రిపీట్ కానుంది.

పరుశురామ్ దర్శకత్వంలో విజయ్ దేవరకొండ చేస్తున్న ఫ్యామిలీ స్టార్ సినిమా వచ్చే ఏడాది సంక్రాంతి సందర్భంగా రిలీజ్ కానుంది. ఇది లవ్ ఫ్యామిలీ ఎంటర్‌టైనర్‌గా ఉండనుంది. ఇక గౌతమ్ తిన్ననూరి దర్శకత్వంలో విజయ్ చేస్తున్న సినిమా ఫుల్ యాక్షన్ డ్రామాగా ఉంటుంది. ఈ చిత్రంలో రష్మిక మందన్నా హీరోయిన్‍గా నటిస్తున్నారు. వచ్చే ఏడాది వేసవికి ఈ మూవీ రిలీజ్‍ను మేకర్స్ ప్లాన్ చేస్తున్నట్టు తెలుస్తోంది.

ఇక, విజయ్ దేవరకొండ నటించిన ఖుషి మూవీ ఈ ఏడాది సెప్టెంబర్‌లో రిలీజ్ అయింది. అయితే, అంచనాలకు తగ్గట్టు ఈ చిత్రం రిలీజ్ కాలేదు. శివ నిర్వాణ దర్శకత్వం వహించిన ఈ సినిమా బాక్సాఫీస్ వద్ద హిట్ కాలేకపోయింది. సమంత ఈ చిత్రంలో హీరోయిన్‍గా నటించారు. గతేడాది విజయ్ చేసిన లైగర్ కూడా విఫలమైంది. దీంతో ఇక నుంచి రానున్న చిత్రాలు విజయ్ దేవరకొండకు చాలా కీలకంగా ఉన్నాయి.