Operation Valentine: ఆపరేషన్ వాలెంటైన్ మరోసారి వాయిదా.. కొత్త విడుదల తేదీ ఇదే

Operation Valentine Release Date: మెగా యంగ్ హీరో వరుణ్ తేజ్ సరైన హిట్ కోసం సుమారు మూడేళ్లుగా ఎదురుచూస్తున్నారు. గతేడాది వచ్చిన గాండీవధారి అర్జున చిత్రం అతడికి తీవ్ర నిరాశను మిగిల్చింది. ప్రస్తుతం ఆపరేషన్ వాలెంటైన్ మూవీ చేస్తున్నారు వరుణ్ తేజ్. ఇండియన్ ఎయిర్ ఫోర్స్ బ్యాక్‍డ్రాప్‍లో హిస్టారికల్ యాక్షన్ థ్రిల్లర్‌గా ఈ చిత్రం వస్తోంది. గత డిసెంబర్‌లోనే రిలీజ్ కావాల్సిన మూవీ ఈ ఏడాది ఫిబ్రవరి 16కు వాయిదా పడింది. అయితే, ఇప్పుడు ఆ తేదీకి కూడా ఆపరేషన్ వాలెంటైన్ రావడం లేదు. మరోసారి పోస్ట్‌పోన్ అయింది.

ఆపరేషన్ వాలెంటైన్ చిత్రం రిలీజ్ మరోసారి వాయిదా పడింది. ఈ సినిమా ఈ ఏడాది మార్చి 1వ తేదీన థియేటర్లలో రిలీజ్ కానుంది. ఈ విషయాన్ని సోనీ పిక్చర్స్ ఫిల్మ్స్ ఇండియా బ్యానర్ అధికారికంగా ప్రకటించింది. తెలుగుతో పాటు హిందీలోనూ ఈ చిత్రం విడుదలవుతుందంటూ పేర్కొంది.

“ఈ పెద్ద మిషన్‍కు డేట్ లాక్ అయింది. ఆపరేషన్ వాలెంటైన్ మిసైల్ మార్చి 1వ తేదీన ల్యాండ్ అవనుంది. ప్రపంచవ్యాప్తంగా తెలుగు, హిందీలో రిలీజ్ కానుంది” అని సోనీ పిక్చర్స్ ఫిల్మ్స్ ఇండియా ట్వీట్ చేసింది.

టీజర్ తర్వాత ఆపరేషన్ వాలెంటైన్ చిత్రంపై అంచనాలు భారీగా పెరిగాయి. ఉగ్రదాడికి సమాధానంగా.. పక్క దేశంపై భారత్ భారీ వైమానిక దాడులు చేయడం చుట్టూ ఈ మూవీ కథ ఉండనుందని టీజర్‌ ద్వారా తెలుస్తోంది. యదార్థ ఘటనల ఆధారంగా ఈ చిత్రాన్ని తెరకెక్కించినట్టు మూవీ టీమ్ పేర్కొంది. భారత వైమానిక దళం ఆఫీసర్‌గా ఈ చిత్రంలో వరుణ్ తేజ్ నటించారు. యుద్ధ విమానాల విన్యాసాలు ఈ మూవీలో ఉండనున్నాయి. ఈ సినిమాలో బాలీవుడ్ నటి మానుషి చిల్లర్ హీరోయిన్‍గా నటిస్తున్నారు. లవ్ స్టోరీ కూడా ఈ చిత్రంలో ప్రధానంగా ఉండనుందని తెలుస్తోంది.

ఆపరేషన్ వాలెంటైన్ మూవీకి శక్తి ప్రతాప్ సింగ్ దర్శకత్వం వహిస్తున్నారు. తెలుగు, హిందీలో ద్విభాషా చిత్రంగా ఇది రూపొందుతోంది. ఈ సినిమాతోనే దర్శకుడిగా శక్తి ప్రతాప్ పరిచయం అవుతున్నారు. ఈ చిత్రానికి సాయిమాధవ్ బుర్రా మాటలు అందించారు.

ఆపరేషన్ వాలెంటైన్ చిత్రంలో మిర్ సర్వార్, నవదీవ్ కీలకపాత్రలు చేస్తున్నారు. మిక్కీ జే మేయర్ ఈ మూవీకి సంగీతం అందిస్తున్నారు. సోనీ పిక్చర్స్, రెనైసన్స్ పిక్చర్స్ పతాకాలపై ఈ చిత్రం నిర్మితమవుతోంది. హరి కే వేదాంతం సినిమాటోగ్రాఫర్‌గా ఉన్నారు.

వాయిదా అందుకే..

వీఎఫ్‍ఎక్స్ ఆలస్యం కారణంగానే ఫిబ్రవరి 16వ తేదీన నుంచి ఆపరేషన్ వాలెంటైన్ వాయిదా పడినట్టు తెలుస్తోంది. ఈ చిత్రం రూ.50కోట్లకు పైగా బడ్జెట్‍తో తెరకెక్కుతోందని తెలుస్తోంది. ఎట్టకేలకు మార్చి 1వ తేదీ తెలుగు, హిందీ భాషల్లో ఈ చిత్రం విడుదల కానుంది.

ఆపరేషన్ వాలెంటైన్ చిత్రం నుంచి గత నెల ‘వందేమాతరం’ అంటూ తొలి పాట రిలీజ్ అయింది. భారత్, పాకిస్థాన్ సరిహద్దు అయిన వాఘా బార్డర్ వద్ద ఈ పాటను మూవీ టీమ్ లాంచ్ చేసింది. దేశభక్తితో ఉన్న ఈ పాట ఎంతగానో ఆకట్టుకుంది. ఈ చిత్రానికి మంచి పాపులారిటీ తీసుకొచ్చింది. టీజర్, సాంగ్ తర్వాత ఈ మూవీపై అంచనాలు భారీగా పెరిగిపోయాయి.