Syed Sohel: “అప్పుడు వేల కామెంట్లు పెట్టారు కదా.. ఇప్పుడేమైంది”: కన్నీరు పెట్టుకున్న బిగ్‍బాస్ సోహెల్

Syed Sohel - Bootcut Balaraju Movie: బిగ్‍బాస్ ఫేమ్ సయ్యద్ సోహెల్ హీరోగా నటించిన బూట్‍కట్ బాలరాజు సినిమా శుక్రవారం (ఫిబ్రవరి 2) థియేటర్లలోకి వచ్చింది. లవ్ కామెడీ మూవీగా ఈ చిత్రం తెరకెక్కింది. శ్రీకోనేటి ఈ సినిమాకు దర్శకత్వం వహించారు. అయితే, ఈ మూవీకి అనుకున్న స్థాయిలో స్పందన రావడం లేదు. బుకింగ్స్ సరిగా లేని కారణంగా కొన్ని చోట్ల షోలు కూడా క్యాన్సిల్ అయ్యాయి. ఈ తరుణంలో సయ్యద్ సోహెల్ ఎమోషనల్ అయ్యారు. తాము మంచి సినిమా చేసినా జనాలు ఎందుకు చూడడం లేదంటూ ఎమోషనల్ అయ్యారు.

బిగ్‍బాస్‍లో ఉన్నప్పుడు వేల కామెంట్లు పెట్టారు కదా.. ఎప్పుడేమైంది అని నెటిజన్లను సోహెల్ ప్రశ్నించారు. మీడియాతో మాట్లాడుతూ ఆయన భావోద్వేగానికి గురయ్యారు. కుటుంబంతో కలిసి చూడగలిగే సినిమా (బూట్‍కట్ బాలరాజు) తీసుకొచ్చినా.. ఆదరణ దక్కడం లేదంటూ ఆవేదన వ్యక్తం చేశారు.

“ఇంక ఫ్యామిలీ సినిమాలు చేయాలనుకోవడం లేదు. ముద్దులు పెట్టే సీన్లు అలాంటివి చేసి ఎంకరేజ్ చేస్తా” అంటూ సోహెల్ కన్నీరు పెట్టుకున్నారు. “చెల్లిలితో.. అక్కతో.. చిన్నపిల్లలతో అందరితో కలిసి చూసే సినిమాలే నేను చేస్తున్నా. ఇది కూడా అలాంటి సినిమానే. మంచి సినిమా ఇది” సయ్యద్ సోహెల్ అన్నారు. ప్రమోషన్ల విషయంలో తాను చేయాల్సిందంటూ చేశానని చెప్పారు.

నా సినిమాకు వెళ్లండి

బూట్‍కట్ బాలరాజు సినిమాను చూసిన వారు ఎంకరేజ్ చేస్తున్నారని, పాజిటివ్ టాక్ వస్తోందని సోహెల్ అన్నారు. కానీ ఎక్కువ మంది ఈ చిత్రానికి ఎందుకు రావడం లేదో అర్థం కావడం లేదని సోహెల్ చెప్పారు. ఫ్యామిలీతో కలిసి చూసే సినిమా చేయాలని తరచూ ప్రేక్షకులు కోరుతుంటారని.. తాను అలాంటి సినిమానే చేస్తే ఏం చేస్తున్నారంటూ జనాలను ప్రశ్నించారు. కుటుంబంతో కలిసి బూట్‍కట్ బాలరాజు మూవీ చూడాలని ప్రజలను కోరారు. “నా సినిమాకు వెళ్లండన్నా” అంటూ సోహెల్ ఎమోషనల్‍గా మాట్లాడారు.

“బిగ్‍బాస్‍లో ఉన్నప్పుడు సోహెల్.. సోహెల్ అని వేల కామెంట్లు పెట్టారు కదన్నా. ఇప్పుడు ఏమైందన్నా” అంటూ సోహెల్ అన్నారు. అయితే, శని, ఆదివారాలు ఉన్నాయని ప్రేక్షకులు తప్పకుండా వెళతారని పక్కనే ఉన్న అవినాశ్.. సోహెల్‍కు సర్దిచెప్పారు. సోహెల్ ఎమోషనల్‍గా మాట్లాడిన ఈ వీడియో ప్రస్తుతం సోషల్ మీడియాలో వైరల్‍గా మారింది.

బూట్‍కట్ బాలరాజు గురించి..

బూట్‍కట్ బాలరాజు చిత్రంలో సోహెల్‍కు జోడీగా మేఘరేఖ హీరోయిన్‍గా చేశారు. రొమాంటిక్ కామెడీ ఎంటర్‌టైనర్‌గా ఈ మూవీని తెరక్కించారు శ్రీకోనేటి. ఈ సినిమాలో సునీల్, సిరి హన్మంతు, ఇంద్రజ, అవినాశ్, సద్దాం, వివేక్ కీరోల్స్ చేశారు. మహమ్మద్ పాషా నిర్మించిన ఈ చిత్రానికి భీమ్స్ సెసిరోలియో సంగీతం అందించారు.

బూట్‍కట్ బాలరాజు చిత్రానికి పబ్లిసిటీ చేసేందుకు తన వద్ద ఎక్కువగా డబ్బులు లేవని ప్రీ-రిలీజ్ ఈవెంట్లోనూ సోహెల్ చెప్పారు. ఈ మూవీ చూడండి అంటూ మోకాళ్లపై కూర్చొని మరీ ప్రేక్షకులను కోరారు.

సయ్యద్ సోహెల్ హీరోగా మిస్టర్ ప్రెగ్నెంట్ అనే సినిమా గతేడాది థియేటర్లలో రిలీజ్ అయింది. ఈ చిత్రానికి పాజిటివ్ టాక్ వచ్చింది. అయితే, అనుకున్న స్థాయిలో మాత్రం వసూళ్లు రాలేదు.