Sunil in Max: కిచ్చా సుదీప్‌కు విలన్‌గా సునీల్.. కన్నడ ఇండస్ట్రీలోకి టాలీవుడ్ కమెడియన్

Sunil in Max: టాలీవుడ్‌లోని టాప్ కమెడియన్లలో ఒకడిగా ఎదిగి తర్వాత విలన్ పాత్రలు పోషిస్తున్న సునీల్.. తాజాగా మరో నెగటివ్ పాత్రను అంగీకరించాడు. ఈసారి అతడు విలన్ గా కన్నడ ఇండస్ట్రీలోకి అడుగు పెడుతున్నాడు. కిచ్చా సుదీప్ నటిస్తున్న మ్యాక్స్(Max) మూవీలో సునీల్ విలన్ గా చేస్తున్నట్లు వార్తలు వస్తున్నాయి.

ఇప్పటికే పుష్ప, జైలర్ లాంటి సినిమాల్లో విలన్ పాత్రలతో మెప్పించిన సునీల్ కు.. ఇప్పుడు శాండల్‌వుడ్ నుంచి పిలుపు రావడం విశేషం. కిచ్చా సుదీప్ నటిస్తున్న మ్యాక్స్ మూవీ ఇప్పటికే 75 శాతం షూటింగ్ పూర్తి చేసుకుంది. ప్రస్తుతం ఈ మూవీ షూటింగ్ మహాబలిపురంలో జరుగుతోంది. అయితే ఈ సినిమాలోని నటీనటుల గురించి మాత్రం పెద్దగా సమాచారం లేదు.

అయితే ఈ మధ్యే సునీల్ ఈ మూవీలో నటిస్తున్నట్లు ప్రొడ్యూసర్ కలైపులి ఎస్ థాను అనౌన్స్ చేశాడు. విజయ్ కార్తికేయ ఈ మూవీని డైరెక్ట్ చేస్తున్నాడు. అయితే సునీల్ ను మ్యాక్స్ లోకి తీసుకోవడంపై కన్నడ సినీ అభిమానుల్లో మిశ్రమ స్పందన వ్యక్తమవుతోంది. సినిమాకు సునీల్ అదనపు బలం అవుతాడని కొందరు సోషల్ మీడియాలో కామెంట్స్ చేశారు.

మరికొందరు మాత్రం స్థానికంగా ఉన్న టాలెంటెడ్ నటులను కాదని, పక్క ఇండస్ట్రీలో నుంచి నటీనటులను తీసుకొని రావడమేంటని ప్రశ్నించారు. మ్యాక్స్ మూవీలో వరలక్ష్మి శరత్ కుమార్, సంయుక్త హోర్నాడ్ కూడా నటిస్తున్నారు. ఈ సినిమా షూటింగ్ త్వరలోనే పూర్తి కానుంది. ఈ సినిమా తర్వాత సెలబ్రిటీ క్రికెట్ లీగ్ లో పాల్గొనే సుదీప్.. తర్వాత చరణ్ డైరెక్షన్ లో కేజీఎఫ్ ఫేమ్ శ్రీనిధి శెట్టి హీరోయిన్ గా మరో సినిమా చేయనున్నాడు.