Sonal Chauhan | ప్రభాస్ ఆదిపురుష్‌లో సోనాల్ చౌహాన్.. కీలక పాత్రలో లెజెండ్ భామ

పాన్ఇండియా స్టార్ ప్రభాస్ ఇటీవల రాధేశ్యామ్‌తో ప్రేక్షకుల ముందుకు వచ్చాడు. ఈ సినిమా మిక్స్‌డ్ టాక్‌తో ఆడియెన్స్‌ను అలరించింది. ప్రస్తుతం మన డార్లింగ్ సలార్, ఆదిపురుష్ చిత్రాలతో బిజీగా ఉన్నాడు. ముఖ్యంగా ఆదిపురుష్ చిత్రం రామాయణం ఆధారంగా తెరకెక్కిస్తున్నారు. తాజాగా ఈ సినిమాకు సంబంధించి ఆసక్తికర అప్డేట్ వచ్చింది. ఈ సినిమాలో లెజెండ్ ఫేమ్ సోనాల్ చౌహాన్ కీలక పాత్రలో నటిస్తుందట. ఈ విషయం ఈ ముద్దుగుమ్మే ఇటీవల జరిగిన ఓ ఇంటర్వ్యూలో చెప్పింది.

"అవును నేను ఆదిపురుష్ చిత్రంలో నటిస్తున్నాను. ఇందుకోసం ఆత్రుతగా ఎదురుచూస్తున్నాను. ఇప్పటి వరకు నేను చేసిన సినిమాలకు పూర్తిగా ఇది విభిన్నమైన ప్రపంచం. సినిమా ప్రియులు ఈ భారీ చిత్రాన్ని చూసి కచ్చితంగా మెచ్చుకుంటారని అనుకుంటున్నాను." అని సోనాల్ చౌహాన్ స్పష్టం చేసింది.

హిందీలో జన్నత్ సినిమాతో ప్రేక్షకులకు పరిచయమైన ఈ భామ తెలుగులో రెయిన్ బో చిత్రంతో అరగేంట్ర చేసింది. పండగ చేస్కో, లెజెండ్, డిక్టేటర్, రూలర్ లాంటి సినిమాల్లో నటించి గుర్తింపు తెచ్చుకుంది. వెంకటేశ్-వరుణ్ తేజ్ నటిస్తున్న ఎఫ్‌3లోనూ ఈ ముద్దుగుమ్మ ముఖ్యమైన పాత్ర పోషించింది. దీంతో పాటు నాగార్జున సరసన ఘోస్ట్ చిత్రం కూడా చేస్తుంది. కెరీర్ ప్రారంభం నుంచి సోనాల్ చౌహాన్ గ్లామర్ పాత్రలనే పోషించిన ఈ ముద్దుగుమ్మ.. ఇప్పుడు ఒక్కసారిగా ఆదిపురుష్ లాంటి పౌరాణిక నేపథ్యమున్న చిత్రంలో నటించే ఛాన్స్ కొట్టేసింది.

ఆదిపురుష్ చిత్రంలో ప్రభాస్ సరసన కృతిసనన్ లీడ్ రోల్ పోషిస్తున్నారు. సైఫ్ అలీ ఖాన్ ప్రతినాయకుడిగా నటిస్తున్నారు. బాలీవుడ్ దర్శకుడు ఓం రౌత్ ఈ చిత్రానికి దర్శకత్వం వహిస్తున్నారు. ఈ పౌరాణిక చిత్రాన్ని అత్యంత భారీ బడ్జెట్‌తో తెరకెక్కిస్తున్నారు. వచ్చే ఏడాది ఈ సినిమాకు ప్రేక్షకుల ముందుకు తీసుకురావాలని చిత్రబృందం ప్రణాళికలు సిద్ధం చేసింది. తెలుగు, హిందీతో పాటు ఇతర భాషల్లోనూ ఈ సినిమాను విడుదల చేయనున్నారు.