sarkaru vaari paata | సితార ఎంట్రీ అదుర్స్... మహేష్ తో కలిసి స్టెప్పులేసిన తనయ

‘స‌ర్కారువారి పాట’ సినిమా లోని ‘పెన్నీ..’ సాంగ్ లో  తండ్రి మ‌హేష్ బాబు తో క‌లిసి చిన్నారి సితార వేసిన డ్యాన్స్ స్టెప్పులు అభిమానుల‌ను ఆక‌ట్టుకుంటున్నాయి. ఈ పాట‌ను ఆదివారం సాయంత్రం చిత్ర‌యూనిట్ విడుద‌ల‌చేసింది. సితార సినిమాల్లో క‌నిపించ‌డం ఇదే మొద‌టిసారి. తండ్రి సినిమాతో ఆమె అరంగేట్రం చేయ‌బోతుండ‌టంతో ఫ్యాన్స్ ఫుల్ ఖుషీ అవుతున్నారు. తండ్రీకూతుళ్లు ఇద్ద‌రిని ఒకే ఫ్రేమ్ లో చూసి మురిసిపోతున్నారు. ఈ పాట‌లో మ‌హేష్ బాబు స్టైలిష్ గా క‌నిపిస్తున్నారు. అత‌డితో పాటు సితార వేసిన డ్యాన్స్ మూవ్ మెంట్స్ ఆక‌ట్టుకుంటున్నాయి. రుణాలకు ఎగవేసే వారికి వార్నింగ్ ఇస్తూనే పైసా విలువ‌ను ఆవిష్క‌రిస్తూ సాగిన ఈ పాట‌ను అనంత‌ శ్రీరామ్ రాశారు. న‌కాష్ అజీజ్ ఆల‌పించారు. త‌మ‌న్ సంగీతాన్ని అందించారు. సితారను ఈ పాటలో చూపించాలనే ఆలోచన సంగీత దర్శకుడు తమన్ దని సమాచారం. ఆయనే చిత్ర బృందానికి ఈ విషయాన్ని చెప్పారని తెలిసింది. వారికి తమన్ ఐడియా నచ్చడంతో అందరూ కలిసి మహేష్ ను ఒప్పించినట్లు చెబుతున్నారు. 

 ఈ పాటలో మహేష్ బాబు, సితారతో పాటు నకాష్ అజీజ్, తమన్ కనిపించారు. మాస్, క్లాస్ మేళవింపుతో ఈ ఫాస్ట్ బీట్ సాంగ్ ఆకట్టుకుంటోంది. ‘స‌ర్కారు వారి పాట’ చిత్రానికి ప‌ర‌శురామ్ ద‌ర్శ‌క‌త్వం వ‌హిస్తున్నారు. యాక్ష‌న్ ఎంట‌ర్‌టైన‌ర్ గా రూపొందుతున్న ఈ సినిమాను సంక్రాంతికి విడుద‌ల‌చేయాల‌ని భావించారు. కానీ క‌రోనా థ‌ర్డ్ వేవ్ కార‌ణంగా మే 12కు వాయిదావేశారు. ప్ర‌స్తుతం హైద‌రాబాద్‌లో మ‌హేష్ బాబుతో పాటు ప్ర‌ధాన తారాగ‌ణంపై కీల‌క ఘ‌ట్టాల‌ను చిత్రీక‌రిస్తున్నారు. ఈ షెడ్యూల్ తో సినిమా షూటింగ్ మొత్తం పూర్త‌వుతుంద‌ని స‌మాచారం.