Shreyas Talpade: అతని గుండె పది నిమిషాలు ఆగిపోయింది: శ్రేయస్ హార్ట్ ఎటాక్‌పై బాబీ డియోల్

Shreyas Talpade: బాలీవుడ్ నటుడు శ్రేయస్ తల్పడేకు వచ్చిన హార్ట్ ఎటాక్ ఎంత తీవ్రమైనదో అతని క్లోజ్ ఫ్రెండ్ బాబీ డియోల్ వెల్లడించాడు. గురువారం (డిసెంబర్ 14) రాత్రి అతనికి గుండెపోటు రావడంతో వెంటనే బెల్లీవూ హాస్పిటల్ కు తరలించారు. శ్రేయస్ గుండె పది నిమిషాల పాటు ఆగిపోయినట్లు ఓ వాయిస్ మెసేజ్ లో బాబీ తెలిపాడు.

దీంతో డాక్టర్లు శ్రేయస్ తల్పడేకు వెంటనే ఏంజియోప్లాస్టీ నిర్వహించారు. దీనిపై యానిమల్ మూవీ విలన్ బాబీ డియోల్ స్పందిస్తూ.. "నేను అతని భార్యతో మాట్లాడాను. ఆమె చాలా బాధలో ఉంది. అతని గుండె సుమారు 10 నిమిషాల పాటు ఆగిపోయింది. అతన్ని మళ్లీ కోలుకునేలా చేసి ఏంజియోప్లాస్టీ నిర్వహించారు. అతను పూర్తిగా కోలుకోవాలని ప్రార్థించండి" అని బాబీ అన్నాడు.

ఓం శాంతి ఓం, గోల్‌మాల్ లాంటి సినిమాల్లో నటించిన శ్రేయస్ తల్పడేకు తీవ్రమైన గుండె పోటు వచ్చింది. 47 ఏళ్ల శ్రేయస్.. గురువారం రాత్రి తనకు కాస్త అసౌకర్యంగా ఉందని చెబుతూ ఇంట్లోనే కుప్పకూలాడు. వెంటనే హాస్పిటల్ కు తీసుకెళ్లగా ఏంజియోప్లాస్టీ నిర్వహించిన వైద్యులు అతని ప్రాణాన్ని కాపాడారు. ప్రస్తుతం శ్రేయస్ ఐసీయూలోనే చికిత్స పొందుతున్నాడు.

నిజానికి గురువారం మొత్తం అతడు వెల్‌కమ్ టు ద జంగిల్ అనే సినిమాలో నటించాడు. సెట్ లో అందరితో సరదాగా ఉన్నాడు. రోజంతా బాగానే ఉన్న అతడు.. రాత్రి సమయానికి అసౌకర్యంగా ఫీలయ్యాడు. వెంటనే అతనికి గుండె పోటు వచ్చింది. బుధవారమే (డిసెంబర్ 13) ఈ వెల్‌కమ్ టు ద జంగిల్ మూవీ షూటింగ్ ప్రారంభమైంది.

శ్రేయస్ తోపాటు ఈ సినిమాలో అక్షయ్ కుమార్, రవీనా టండన్, దిశా పటానీ, జాక్వెలిన్ ఫెర్నాండెజ్, లారా దత్తా, సునీల్ శెట్టి, సంజయ్ దత్, పరేష్ రావల్, అర్షద్ వార్సీలాంటి ప్రముఖ నటులంతా ఉండటం విశేషం.