Shah Rukh Khan Animal: అలా చేస్తే కుక్క చావే.. యానిమల్‌ని టార్గెట్ చేస్తూ షారుక్ సెన్సేషనల్ కామెంట్స్ వైరల్

Shah Rukh Khan Animal: యానిమల్ మూవీ ఎంత పెద్ద హిట్ అయినా కూడా విమర్శలూ అదే స్థాయిలో వస్తున్నాయి. తాజాగా బాలీవుడ్ టాప్ హీరో షారుక్ ఖాన్ కూడా ఈ మూవీని పరోక్షంగా టార్గెట్ చేశాడు. ఈ సినిమాలో విలనిజాన్నే హీరోయిజంగా చూపించడం, మితిమీరిన హింస, మహిళలను కించపరిచేలా సీన్స్ ఉండటంపై ఎంతో మంది విమర్శలు గుప్పించారు.

తాజాగా షారుక్ ఖాన్ చేసిన కామెంట్స్ కూడా యానిమల్ మూవీ గురించే అని ఇంటర్నెట్ ఫిక్సయిపోయింది. న్యూస్ 18 ఛానెల్ నిర్వహించిన ఈవెంట్లో సినిమాల్లో విలన్ పాత్రలు పోషించడంపై కింగ్ ఖాన్ స్పందించాడు. ఒకవేళ తాను విలన్ పాత్ర పోషిస్తే మాత్రం.. హీరో చేతుల్లో ఆ పాత్రకు కుక్క చావు తప్పకుండా చూస్తానని అతడు అనడం విశేషం.

యానిమల్‌నే టార్గెట్ చేశాడా?

షారుక్ ఖాన్ తన కామెంట్స్ లో ఏ సినిమా పేరు ప్రస్తావించలేదు. అయితే అతని మాటల వెనుక ఉద్దేశం మాత్రం యానిమల్ ను టార్గెట్ చేయడమే అని సోషల్ మీడియాలో ఫ్యాన్స్ అంటున్నారు. "నేను హ్యాపీ స్టోరీసే చెబుతాను. నేను చేసే హీరో పాత్రలు మంచి పనులే చేస్తాయి. వాళ్లు నమ్మకాన్ని, సంతోషాన్నే అందిస్తారు. ఒకవేళ నేను విలన్ పాత్ర పోషిస్తే మాత్రం అతడు బాగా బాధపడేలా చేస్తాను.

అతడు కుక్క చావు చస్తాడు. ఎందుకంటే మంచి ఎప్పుడూ చెడును ఓడిస్తుందని నేను నమ్ముతాను. చెడుకు ఎప్పటికైనా తగి శాస్తి జరగాల్సిందే అని నేను భావిస్తాను. సినిమా చూసే వ్యక్తులు తాము కనే కల సాకారం చేసుకునేలా నిజాయతీ కలిగిన పాత్రలు నేను పోషించాలని అనుకుంటాను" అని షారుక్ అన్నాడు.

యానిమల్ మూవీలో రణ్‌బీర్ హీరో అయినా కూడా అతనిలో అన్నీ నెగటివ్ షేడ్సే చూపించారు. హింస, అమ్మాయిలను బానిసలుగా చూడటంలాంటి లక్షణాలు అతనిలో కనిపిస్తాయి. కానీ అలాంటి సినిమా కూడా ప్రపంచవ్యాప్తంగా రూ.900 కోట్లకుపైగా వసూలు చేసి సూపర్ డూపర్ హిట్ అయింది. ఈ నేపథ్యంలో షారుక్ ఖాన్ ఆ మూవీని లక్ష్యంగా చేసుకొని ఈ కామెంట్స్ చేసినట్లు భావిస్తున్నారు.

నిజానికి షారుక్ కూడా కెరీర్ తొలినాళ్లలో నెగటివ్ రోల్సే పోషించాడు. డర్, బాజీగర్, అంజామ్ లాంటి సినిమాల్లో అతనివి నెగటివ్ షేడ్ ఉన్న పాత్రలే. అయితే ఆ తర్వాత మెల్లగా వాటికి గుడ్ బై చెప్పి.. రొమాన్స్ కింగ్ అయ్యాడు. యానిమల్ సూపర్ హిట్ అయిన 2023లోనే షారుక్ హ్యాట్రిక్ హిట్స్ కొట్టాడు. పఠాన్, జవాన్, డంకీ సినిమాలు బాక్సాఫీస్ దగ్గర వసూళ్ల వర్షం కురిపించాయి.

నిజానికి షారుక్ ఈ ఈవెంట్లో ఏ ఉద్దేశంతో ఆ కామెంట్స్ చేశాడో తెలియదు కానీ.. యానిమల్ పై విమర్శల నేపథ్యంలో అతని కామెంట్స్ ను కూడా వాటికే ఆపాదిస్తూ కొందరు సోషల్ మీడియాలో పోస్టులు చేస్తున్నారు. సందీప్ రెడ్డి వంగా డైరెక్ట్ చేసిన యానిమల్ మూవీకి యానిమల్ పార్క్ పేరుతో ఓ సీక్వెల్ కూడా రానుంది. ఈ మూవీపై వచ్చిన విమర్శలను సందీప్ పెద్దగా పట్టించుకోవడం లేదు.