Shah Rukh Khan on Kohli: కోహ్లి నా అల్లుడులాంటి వాడు: షారుక్ ఖాన్ ఇంట్రెస్టింగ్ కామెంట్స్

Shah Rukh Khan on Kohli: బాలీవుడ్ స్టార్ హీరో షారుక్ ఖాన్.. టీమిండియా మాజీ కెప్టెన్ విరాట్ కోహ్లి తన అల్లుడిలాంటి వాడంటూ ఇంట్రెస్టింగ్ కామెంట్స్ చేశాడు. తనతోపాటు పలు సినిమాల్లో నటించిన అనుష్క శర్మనే పెళ్లి చేసుకున్న విరాట్ కోహ్లిని ఉద్దేశించి కింగ్ ఖాన్ ఇలాంటి కామెంట్స్ చేయడం విశేషమే. ఇప్పుడీ కామెంట్స్ వైరల్ అవుతున్నాయి.

ట్విటర్ లో అభిమానులతో షారుక్ ఖాన్ మాట్లాడాడు. ఈ సందర్భంగా ఓ అభిమాని.. విరాట్ కోహ్లి గురించి అడిగాడు. #Asksrk పేరుతో షారుక్ సోషల్ మీడియా ఎక్స్ లో అభిమానులతో ముచ్చటించాడు. ఈ సందర్భంగా ఓ అభిమాని ట్వీట్ చేస్తూ.. "సార్.. విరాట్ కోహ్లి గురించి కాస్త చెప్పండి. ఎందుకంటే ప్రతి రోజూ అభిమానుల మధ్య పోస్టుల యుద్ధం జరుగుతుంది. కోహ్లి గురించి జవాన్ స్టైల్లో కొన్ని మాటలు చెప్పండి" అని అడిగాడు.

దీనికి షారుక్ స్పందిస్తూ.. "నాకు విరాట్ కోహ్లి అంటే ఇష్టం. అతడు నా సొంత మనిషి. అతడు బాగుండాలని ఎప్పుడూ కోరుకుంటాను. భాయ్ నాకు అల్లుడులాంటి వాడు" అంటూ సరదాగా స్పందించాడు. ఆరేళ్ల కిందట బాలీవుడ్ నటి అనుష్క శర్మను కోహ్లి పెళ్లి చేసుకున్న విషయం తెలిసిందే. ఆమె షారుక్ ఖాన్ తో 2008లో రబ్ నే బనా దీ జోడీ మూవీతోనే హీరోయిన్ గా పరిచయమైంది.

ఆ తర్వాత కూడా షారుక్ ఖాన్ తో కలిసి 2012లో జబ్ తక్ హై జాన్, 2017లో జబ్ హ్యారీ మెట్ సేజల్, 2018లో జీరో మూవీలో అనుష్క శర్మ నటించింది. తన కో-స్టార్ భర్త, టాప్ క్రికెటర్ గురించి షారుక్ ఇలా అల్లుడంటూ స్పందించడం వైరల్ అవుతోంది. ప్రస్తుతం విరాట్ కోహ్లి ఆస్ట్రేలియాతో సిరీస్ లో ఆడుతున్నాడు. మరోవైపు జవాన్ సక్సెస్ ఎంజాయ్ చేస్తున్న షారుక్ ఖాన్.. డంకీ మూవీ షూట్ లో బిజీగా ఉన్నాడు.

ఈ షూటింగ్ లో భాగంగానే షారుక్ ఖాన్.. ఇలా అభిమానులతో సోషల్ మీడియాలో ముచ్చటించాడు. డంకీ మూవీ షూటింగ్ పూర్తయిందని, చాలా బాగా వచ్చిందని ఈ సందర్భంగా ఓ అభిమాని అడిగిన ప్రశ్నకు షారుక్ స్పందించాడు.