Sehwag on Ghoomer: ఈ సినిమా చూసి ఏడ్చేశాను.. మీరూ కచ్చితంగా చూడండి: సెహ్వాగ్

Sehwag on Ghoomer: బాలీవుడ్ లో క్రికెట్‌పై మరో సినిమా రూపొందింది. ఈ సినిమా పేరు ఘూమర్. అభిషేక్ బచ్చన్ నటించిన ఈ సినిమా ఓ స్పిన్ బౌలర్ చుట్టూ తిరుగుతుంది. కుడి చేయి లేని ఓ అమ్మాయి ఎలా లెఫ్టామ్ స్పిన్నర్ గా ఎదుగుతుందన్నది ఇందులో చూపించారు. సయామీ ఖేర్ ఆ పాత్ర పోషించగా.. ఆమె కోచ్ గా అభిషేక్ కనిపించాడు.

అయితే ఈ ఘూమర్ మూవీని తాజాగా మాజీ క్రికెటర్ వీరేంద్ర సెహ్వాగ్ చూశాడు. తనను కంటతడి పెట్టించిన ఈ సినిమాను అందరూ చూడాలని అతడు పిలుపునివ్వడం విశేషం. ఓ వీడియో ద్వారా ఘూమర్ మూవీపై వీరూ ప్రశంసలు కురిపించాడు. ఈ వీడియోను అమితాబ్ బచ్చన్ తన ఇన్‌స్టాగ్రామ్ లో షేర్ చేశాడు. ఎంతో సాధారణ భాషలో ఎంతో పెద్ద విషయం సెహ్వాగ్ చెప్పాడంటూ బిగ్ బీ ఈ వీడియోను పోస్ట్ చేశాడు.

ఆ వీడియోలో సెహ్వాగ్ ఏమన్నాడంటే.. "నిన్న నేను ఘూమర్ సినిమా చూశాను. చాలా బాగా అనిపించింది. చాలా రోజుల తర్వాత క్రికెట్ సినిమా చూడటంలో ఆనందం కలిగింది. ఎందుకంటే ఇందులో క్రికెట్ ఎలాగూ ఉంది. దానితోపాటు ఎమోషన్ కూడా ఉంది. ఓ క్రీడాకారుడు పడే కష్టం ఉంది. ముఖ్యంగా గాయం తర్వాత తిరిగి ఆడాలంటే ఎంతగా శ్రమించాలో తెలుస్తుంది" అని సెహ్వాగ్ అన్నాడు.

అంతేకాదు ఈ సినిమా ఏడిపిస్తుందని కూడా స్పష్టం చేశాడు. "నేను స్పిన్నర్ కు ఎప్పుడూ గౌరవం ఇవ్వను. కానీ సయామీ ఖేర్ వేసిన ఘూమర్ మాత్రం అద్భుతం. ఈ రోల్ చాలా కష్టం. కానీ ఆమె ఎమోషనల్ చేసేసింది. ఇక కోచ్ మాట కూడా నేను అస్సలు వినను. కానీ అభిషేక్ బచ్చన్ చేసిన యాక్టింగ్ చూస్తే మీరు అతని మాట కచ్చితంగా వింటారు. ఆగస్ట్ 18కి ఈ సినిమా కచ్చితంగా చూడండి. స్ఫూర్తి పొందండి. బచ్చన్ జీ చెప్పినట్లు నేను కూడా చెబుతాను. ఐ లవ్ దిస్ గేమ్. మీ వెంట కన్నీళ్లను కూడా తీసుకెళ్లండి. ఈ సినిమా మిమ్మల్ని ఏడిపిస్తుంది" అని ఆ వీడియోలో సెహ్వాగ్ అన్నాడు.

ఘూమర్ మూవీ శుక్రవారం (ఆగస్ట్ 18) ప్రేక్షకుల ముందుకు వచ్చింది. ఇందులో అభిషేక్ కోచ్ పాత్రలో నటించాడు. ఓ దివ్యాంగురాలైన క్రికెటర్ ను చూసిన తర్వాత అతని జీవితం ఎలా మారిపోయిందో ఈ సినిమాలో చూపించారు. పా మూవీ ఫేమ్ ఆర్ బాల్కీ ఈ ఘూమర్ ను డైరెక్ట్ చేశాడు. అమితాబ్ బచ్చన్ కూడా ఈ సినిమాలో అతిథి పాత్రలో నటించాడు.