RRR | జూనియర్‌ ఎన్టీఆర్‌పై ఓ రేంజ్‌లో ప్రశంసలు కురిపించిన రాజమౌళి

తెలుగు సిల్వర్‌ స్క్రీన్‌పై చాలా రోజుల తర్వాత ఇద్దరు టాప్‌ హీరోలతో తెరకెక్కిన మల్టీస్టారర్‌ ఆర్‌ఆర్‌ఆర్‌. ఈ మూవీ ఊహించినట్లే బాక్సాఫీస్‌ దగ్గర కలెక్షన్ల సునామీ సృష్టించింది. రామ్‌-భీమ్‌గా రామ్‌చరణ్‌, జూనియర్‌ ఎన్టీఆర్‌ నటనకు ప్రేక్షకలోకం నీరాజనాలు పలికింది. మూవీ సెకండాఫ్‌లో జూనియర్‌ కంటే రామ్‌చరణ్‌ పాత్రకే రాజమౌళి కాస్త ఎక్కువ స్క్రీన్‌స్పేస్‌ ఇచ్చాడనే విమర్శలు ఉన్నా.. ఎన్టీఆర్‌ మాత్రం తన వరకూ భీమ్‌ పాత్రకు పూర్తి న్యాయం చేశాడు.

ఈ నేపథ్యంలోనే జూనియర్‌ ఎన్టీఆర్‌పై రాజమౌళి ప్రశంసల వర్షం కురిపించాడు. కొమురం భీమ్‌ పాత్రకు తారక్‌ న్యాయం చేసినట్లుగా ఇండియన్‌ స్క్రీన్‌పై మరే ఇతర నటుడూ చేయలేడని నేను కచ్చితంగా చెప్పగలను అంటూ జక్కన్న అనడం విశేషం. ఈ మధ్య ఓ ఇంటర్వ్యూలో మాట్లాడుతూ ఎన్టీఆర్‌ నటనను అతడు ఆకాశానికెత్తాడు.

"అణచివేతదారు వైపు కన్నెత్తి కూడా చూడకుండా తనలోని బాధను, జరిగిన నమ్మకద్రోహాన్ని, మాతృభూమిపై ప్రేమను చూపించడం మాటలు కాదు. ఈ భావోద్వేగాలన్నింటినీ చూపించడం ఒకెత్తయితే.. వాటిని ఒకే షాట్‌లో, ఒకే ఫ్రేమ్‌లో చూపించడం మరో ఎత్తు. అదొక అద్భుతం" అని జూనియర్‌ ఎన్టీఆర్‌ గురించి రాజమౌళి అన్నాడు. నిజానికి ఈ మూవీ చూసిన ఫ్యాన్స్‌ కూడా ఎన్టీఆర్‌తోపాటు రామ్‌చరణ్‌ నటనకు ఫిదా అవుతున్నారు. ఇద్దరూ పోటీ పడి నటించారని, రామ్‌-భీమ్‌ పాత్రలకు న్యాయం చేశారని కొనియాడుతున్నారు.