Ravi Teja on Eagle: తెలుగు సినిమా కోసమే..: ఈగల్ రిలీజ్ వాయిదాపై రవితేజ పోస్ట్ వైరల్

Ravi Teja on Eagle: తాను నటించిన ఈగల్ మూవీ రిలీజ్ వాయిదా పడటంపై రవితేజ ఇన్‌స్టాగ్రామ్ ద్వారా శుక్రవారం (జనవరి 5) స్పందించాడు. సంక్రాంతి సందర్భంగా జనవరి 13న రిలీజ్ కావాల్సిన ఈ సినిమాను ఫిబ్రవరి 9కి వాయిదా వేసిన విషయం తెలిసిందే. ఈ మూవీ నిర్మాతలతో సమావేశమైన ఫిల్మ్ ఛాంబర్ సభ్యులు.. రిలీజ్ వాయిదాకు ఒప్పించారు.

సంక్రాంతి రేసు నుంచి ఈగల్ తప్పుకోవడంతో ప్రస్తుతం బాక్సాఫీస్ దగ్గర నాలుగు సినిమాలు పోటీ పడుతున్నారు. ఈ కీలక నిర్ణయం తీసుకున్న మరుసటి రోజు రవితేజ ఓ పోస్ట్ చేశాడు. తెలుగు సినిమా బాగుండాలన్న ఉద్దేశంతోనే ఈ నిర్ణయం తీసుకున్నట్లు చెప్పి అతడు అభిమానులు మనసులు గెలుచుకున్నాడు. ఈ పోస్ట్ లో అతడు ఇంకా ఏమన్నాడంటే..

"తెలుగు సినిమా బాగుండాలనే ఒక అడుగు వెనక్కి వేస్తున్నాను. రావడంలో కాస్త మార్పు తప్ప.. షాట్, లక్ష్యంలో ఎలాంటి మార్పు లేదు. ఈగల్ ఫిబ్రవరి 9 నుంచి.. సంక్రాంతికి రిలీజ్ కాబోతున్న అన్ని సినిమాలకు ఆల్ ద బెస్ట్" అని రవితేజ అన్నాడు. ఈగల్ కొత్త రిలీజ్ డేట్ రివీల్ చేస్తూ కొత్త పోస్టర్ ను మేకర్స్ తీసుకొచ్చారు. ఆ పోస్టర్ ను రవితేజ ఈ పోస్ట్ తోపాటు పోస్ట్ చేశాడు. ఇందులో అతడు చేతిలో ఓ పెద్ద రైఫిల్ పట్టుకొని కనిపించాడు.

ఈగల్ ఎందుకు తప్పుకుంది?

సంక్రాంతి బరిలో ఐదు సినిమాలు ఉండటంతో ఈగల్ ను తప్పుకోవాల్సిందిగా ఫిల్మ్ ఛాంబర్ పెద్దలు నిర్మాతలను కోరారు. దీనికి వాళ్లు అంగీకరించడంతో సినిమా సోలో రిలీజ్ కు అన్ని విధాలుగా సహకరిస్తామని హామీ ఇచ్చారు. దీంతో ఫిబ్రవరి 9న రిలీజ్ కావాల్సిన టిల్లూ స్క్వేర్ మూవీని వాయిదా వేశారు. గుంటూరు కారం మూవీకి నిర్మాత అయిన నాగవంశీయే ఆ సినిమాను కూడా నిర్మించడంతో రిలీజ్ వాయిదాకు అంగీకరించాడు.

రిలీజ్ ను వాయిదా వేసిన ఈగల్ నిర్మాతలకు దిల్ రాజు థ్యాంక్స్ చెప్పాడు. ఈ మూవీ వాయిదా పడటంతో ప్రస్తుతం సంక్రాంతి బరిలో గుంటూరు కారం మూవీతోపాటు హనుమాన్, సైంధవ్, నా సామి రంగా ఉన్నాయి. ఈగల్ వాయిదా పడటంతో రవితేజ అభిమానులు నిరాశ వ్యక్తం చేశారు. దీంతో వాళ్ల కోసం రవితేజ శుక్రవారం (జనవరి 5) ఈ పోస్ట్ చేశాడు.

అయితే ఇప్పుడు ఈగల్ వల్ల టిల్లూ స్క్వేర్ మరోసారి వాయిదా పడటంతో ఆ మూవీ ఫ్యాన్స్ హర్ట్ అవుతున్నారు. ఇప్పటికే ఆ సినిమా రిలీజ్ చాలాసార్లు వాయిదా పడింది. ఫిబ్రవరి 9న రాబోతోందని గతేడాదే మేకర్స్ చెప్పడంతో ఆతృతగా ఎదురు చూస్తున్నారు. ఇప్పుడు ఈగల్ కోసం తప్పుకోవడంతో ఫ్యాన్స్ మరోసారి ఉసూరుమన్నారు.

ఈగల్ స్టోరీ ఇదీ

ఈగల్ మూవీలో రవితేజ ఓ ప్రొఫెషనల్ కిల్లర్ పాత్రలో నటించాడు. కార్తీక్ ఘట్టమనేని డైరెక్ట్ చేసిన ఈ యాక్షన్ థ్రిల్లర్ మూవీలో కావ్యా థాపర్ ఫిమేల్ లీడ్ గా కనిపించనుంది. ఇప్పటికే రిలీజైన ఈ మూవీ ట్రైలర్ సినిమాపై అంచనాలను పెంచింది. అనుపమ పరమేశ్వరన్, నవదీప్, వినయ్ రాయ్, శ్రీనివాస్ అవసరాల, శ్రీనివాస్ రెడ్డి, అజయ్ ఘోష్ కూడా ముఖ్యమైన పాత్రలు పోషించారు.