Ranbir Kapoor: యానిమల్ తర్వాత బ్రేక్ తీసుకుంటున్న రణ్‍బీర్.. ‘రామాయణం’ షూటింగ్‍కు ఎప్పుడంటే!

Ranbir Kapoor: యానిమల్ సినిమాతో తన కెరీర్లోనే బిగ్గెస్ట్ బ్లాక్‍బాస్టర్ కొట్టారు బాలీవుడ్ స్టార్ హీరో రణ్‍బీర్ కపూర్. సందీప్ రెడ్డి వంగా దర్శకత్వం వహించిన ఆ చిత్రం బాక్సాఫీస్ వద్ద సెన్సేషనల్ క్రియేట్ చేస్తోంది. డిసెంబర్ 1న రిలీజైన యానిమల్ ఇప్పటికే రూ.700కోట్లకుపైగా కలెక్షన్లతో దూసుకుపోతోంది. అయితే, యానిమల్ సినిమా తర్వాత యాక్టింగ్‍కు చిన్న బ్రేక్ తీసుకుంటున్నారు రణ్‍బీర్. తదుపరి రామాయణం సినిమాలో ఆయన నటించనున్నారు.

మహా ఇతిహాసం రామాయణం ఆధారంగా సినిమాను రూపొందించనున్నారు బాలీవుడ్ డైరెక్టర్ నితేశ్ తివారి. ఈ చిత్రంలో శ్రీరాముడిగా రణ్‍బీర్ కపూర్, సీతాదేవిగా సాయిపల్లవి నటించనున్నారు. రావణుడి పాత్ర పోషించనున్నారు కేజీఎఫ్ ఫేమ్ యశ్. దంగల్ సహా చాలా సూపర్ హిట్ చిత్రాలను తెరకెక్కించిన మనీశ్ తివారీ.. రామాయణం మూవీకి దర్శకత్వం వహించనున్నారు. కాగా, ఈ చిత్రం షూటింగ్ ఎప్పుడు మొదలుకానుందో తాజాగా సమాచారం బయటికి వచ్చింది.

2024 వేసవిలో రామాయణం చిత్రీకరణ మొదలవుతుందని మూవీ వర్గాల నుంచి సమాచారం వెల్లడైంది. 2024 మార్చిలో షూటింగ్ ప్రారంభం కానుందని తెలుస్తోంది. ప్రస్తుతం బ్రేక్ తీసుకుంటున్నరణ్‍బీర్.. రామాయణం షూటింగ్‍కు మార్చిలో వెళతారని సమాచారం.

రామాయణం చిత్రానికి ఆస్కార్ విన్నింగ్ వీఎఫ్ఎక్స్ కంపెనీ డీఎన్ఈడీ పని చేస్తోంది. ఈ సినిమా కోసం ఏకంగా కొత్త టెక్నాలజీని తీసుకొస్తున్నారని సమాచారం బయటికి వచ్చింది. ఇప్పటికే రణ్‍బీర్, సాయిపల్లవి, యశ్ 3డీ స్కాన్ లుక్ టెస్ట్ కూడా అయిపోయినట్టు వార్తలు వచ్చాయి. అత్యంత భారీ బడ్జెట్‍తో రామాయణం తెరకెక్కనుంది.

మరోవైపు, రామాయణం సినిమా షూటింగ్‍లో యశ్.. 2024 జూలైలో పాల్గొంటారని తెలుస్తోంది. గీతూ మోహన్ దాస్ దర్శకత్వంలో ప్రస్తుతం టాక్సిస్ మూవీ చేస్తున్నారు యశ్.

కాగా, నితీశ్ తివారీ తెరకెక్కించనున్న ఈ రామాయణం మూడు పార్టులుగా వస్తుందని తెలుస్తోంది. 2025లో రామాయణ: పార్ట్ వన్‍ను రిలీజ్ చేయాలని మేకర్స్ టార్గెట్‍గా పెట్టుకున్నారు. ఈ చిత్రంలో హనుమంతుడి పాత్ర కోసం సన్నీ డియోల్‍తో మూవీ యూనిట్ చర్చలు జరుపుతోందని టాక్.

మొత్తంగా యాక్షన్ థ్రిల్లర్ మూవీ యానిమల్‍లో వైలెంట్ క్యారెక్టర్ చేసిన రణ్‍బీర్ కపూర్.. తదుపరి రామాయణంలో రాముడిగా కనిపించనున్నారు.