OTT Telugu Action Movie: ఏడు నెలల తర్వాత ఓటీటీలోకి వస్తున్న తెలుగు హిట్ యాక్షన్ మూవీ.. స్ట్రీమింగ్ డేట్ ఇదే

OTT Telugu Action Movie: ప్రముఖ టాలీవుడ్ దర్శకుడు పూరి జగన్నాథ్ తమ్ముడు సాయిరాం శంకర్ నటించిన మూవీ వెయ్ దరువెయ్. ఈ యాక్షన్ మూవీ మార్చి 15న థియేటర్లలో రిలీజైంది. నవీన్ రెడ్డి డైరెక్ట్ చేసిన ఈ సినిమా.. ఏడు నెలల తర్వాత ఇప్పుడు ఓటీటీలోకి అడుగు పెడుతోంది. తెలంగాణ బ్యాక్‌డ్రాప్ లో తెరకెక్కిన ఈ మాస్ యాక్షన్ ఎంటర్టైనర్ ఎక్కడ స్ట్రీమింగ్ కానుండో చూడండి.

వెయ్ దరువెయ్ ఓటీటీ రిలీజ్ డేట్

సాయిరాం శంకర్ నటించిన వెయ్ దరువెయ్ మూవీ.. ఆహా ఓటీటీలో శుక్రవారం (అక్టోబర్ 11) నుంచి స్ట్రీమింగ్ కాబోతోంది. ఈ విషయాన్ని సదరు ఓటీటీ మంగళవారం (అక్టోబర్ 8) రాత్రి వెల్లడించింది. "ఓ థ్రిల్లింగ్ రైడ్ కు సిద్ధంగా ఉండండి. వెయ్ దరువెయ్ అక్టోబర్ 11న ప్రీమియర్ కానుంది" అనే క్యాప్షన్ తో ఈ విషయం తెలిపింది.

నిజానికి ఏప్రిల్లోనే ప్రైమ్ వీడియోలో ఈ సినిమా వస్తుందని భావించినా.. అది సాధ్యం కాలేదు. మొత్తానికి ఏడు నెలల తర్వాత ఇప్పుడు ఆహా వీడియోలో స్ట్రీమింగ్ కు వస్తోంది. టాలీవుడ్ లో చాలా రోజుల తర్వాత ఈ మూవీ ద్వారా ఓ మోస్తరు సక్సెస్ అందుకున్నాడు సాయిరాం శంకర్.

వెయ్ దరువెయ్ స్టోరీ ఏంటంటే?

వెయ్ ద‌రువెయ్ మూవీలో య‌శ్న హీరోయిన్‌గా న‌టించింది. సునీల్‌, స‌త్యం రాజేష్ కీల‌క పాత్ర‌లు పోషించారు. ఫేక్ స‌ర్టిఫికెట్స్‌తో ఉద్యోగాలు పొందాల‌ని భావించి అడ్డ‌దారులు తొక్కుతున్న యువ‌త ఎలా క‌ష్టాల పాల‌వుతున్నార‌నే సందేశానికి క‌మ‌ర్షియ‌ల్ అంశాల‌ను జోడించి ద‌ర్శ‌కుడు ఈ మూవీని తెర‌కెక్కించాడు.

కామారెడ్డి శంకర్(సాయిరామ్ శంకర్)...ఉపాధి కోసం హైద‌రాబాద్ వ‌స్తాడు.క్లోజ్ ఫ్రెండ్ (సత్యం రాజేష్)తో కలిసి ఉద్యోగ ప్ర‌య‌త్నాలు చేస్తుంటాడు. డిగ్రీ లేక‌పోవ‌డంతో ఉద్యోగానికి అడ్డంకిగా మారుతుంది. దాంతో ఫేక్‌ డిగ్రీ స‌ర్టిఫికేట్ తీసుకొని జాబ్‌లో జాయిన్ కావాల‌ని అనుకుంటాడు శంక‌ర్‌.

ఈ జ‌ర్నీలో అత‌డికి శృతి(య‌శ్న‌) పరిచయం అవుతుంది. శృతి కూడా ఫేక్ సర్టిఫికేట్ ద్వారానే ప్రభుత్వ ఉద్యోగం సంపాధిస్తుంది. కామారెడ్డి శంకర్ ఫేక్‌ సర్టిఫికేట్ ద్వారా ఉద్యోగం ద‌క్కించుకున్నాడా? అస‌లు శంక‌ర్ హైద‌రాబాద్ ఎందుకొచ్చాడు? ఫేక్ స‌ర్టిఫికెట్స్ ముఠా వెనుక ఎవ‌రున్నారు అన్న‌దే వెయ్ ద‌రువెయ్ మూవీ క‌థ.

వెయ్ ద‌రువెయ్‌తో దాదాపు ఏడేళ్ల త‌ర్వాత టాలీవుడ్‌లోకి రీఎంట్రీ ఇచ్చాడు సాయిరాం శంక‌ర్‌. అయితే అత‌డికి ఈ మూవీ ఆశించిన ఫ‌లితాన్ని ఇవ్వ‌లేక‌పోయింది. మాస్ క్యారెక్ట‌ర్‌లో సాయిరాం శంక‌ర్ త‌న యాక్టింగ్‌తో మెప్పించిన అత‌డి క‌ష్టం వృథాగానే మారింది. వెయ్ ద‌రువెయ్ త‌ర్వాత రీసౌండ్‌, ఒక ప‌థ‌కం ప్ర‌కారం సినిమాలు చేస్తున్నాడు సాయిరాం శంక‌ర్‌.

టాలీవుడ్ అగ్ర ద‌ర్శ‌కుడు పూరి జ‌గ‌న్నాథ్ సోద‌రుడిగా టాలీవుడ్‌లోకి ఎంట్రీ ఇచ్చాడు సాయిరాం శంక‌ర్‌. పూరి జ‌గ‌న్నాథ్ ద‌ర్శ‌క‌త్వంలో వ‌చ్చిన 143 మూవీతో హీరోగా మారాడు. డేంజ‌ర్‌, బంప‌ర్ ఆఫ‌ర్ సినిమాల‌తో ప్రేక్ష‌కుల్ని మెప్పించాడు. వెయ్యి అబ‌ద్దాలు, య‌మ‌హోయ‌మ‌, రోమియో, నేనోర‌కంతో పాటు హీరోగా తెలుగులో ప‌లు సినిమాలు చేశాడు.