OTT Korean Dramas Effect: వామ్మో కొరియన్ డ్రామాస్‌కు ఇంత క్రేజా.. తమ కొడుక్కి కొరియన్ పేరు పెట్టుకున్న ఇండియన్ పేరెంట్స్

OTT Korean Dramas Effect: కే-డ్రామాస్ తో ఇప్పుడు ఇండియానే కాదు మొత్తం ప్రపంచమే ఊగిపోతోంది. ఓటీటీ వచ్చిన తర్వాత దేశవిదేశాల్లోని కంటెంట్ సులువుగా అందరికీ దొరుకుతోంది. అలా అలా ఆ కొరియన్ డ్రామాస్ కు అలవాటు పడిన ఇండియన్ ఆడియెన్స్.. వాటికి పూర్తిగా అడిక్ట్ అయిపోయారు. ఎంతలా అంటే ఇండియన్ పేరెంట్స్ తమ బాబుకు తమకు బాగా నచ్చిన కొరియన్ పాత్ర పేరు పెట్టుకోవడం విశేషం.

కాంగ్ తే-మూ త్రిపాఠీ.. పేరెప్పుడైనా విన్నారా?

కొరియన్ డ్రామాస్ గురించి వినడం, చూడటమే కానీ.. వీటికి వీరాభిమానులు ఉంటారని మీకు తెలుసా? అలాంటి ఇద్దరు ఫ్యాన్స్ గురించి ఈ మధ్య చేసిన సోషల్ మీడియా పోస్ట్ తెగ వైరల్ అవుతోంది. తన కజిన్, అతని భార్య కొరియన్ డ్రామాస్ చూసి చూసి చివరికి తమ కొడుక్కి తమకు బాగా నచ్చిన ఓ కొరియన్ పాత్ర పేరును ఎలా పెట్టారో చెబుతూ divyaathedivaaa అనే ఎక్స్ యూజర్ ఓ పోస్ట్ చేసింది.

ఈ పోస్ట్ చూసి కే-డ్రామాస్ అభిమానులు తెగ ఖుషీ అవుతుంటే.. మిగిలిన వాళ్లు ఇలా కూడా ఉంటారా అన్నట్లుగా కామెంట్స్ చేస్తున్నారు. ఎక్కడో కొరియన్ డ్రామాస్ గురించి సోషల్ మీడియా చర్చల్లోనే కలుసుకున్న ఆ జంట.. ఆ తర్వాత రోజుల తరబడి ఒక్కటి కూడా వదలకుండా నెట్‌ఫ్లిక్స్ లోని కొరియన్ డ్రామాస్ మొత్తం చూశారట. దాని ప్రభావమే ఈ పేరు అంటూ ఆ యూజర్ చెప్పుకొచ్చారు.

ఏం పేరు పెట్టాలనే పోల్

ఆ కొరియన్ డ్రామాస్ చూసిన తర్వాత వాళ్లకు ఓ బాబు పుట్టాడు. తన బాబుకు ఏ కొరియన్ డ్రామాలోని పాత్ర పేరు పెట్టాలంటూ ఓ పోల్ ను కూడా తమ వదిన వాట్సాప్ లో నడిపించినట్లు ఆమె తెలిపారు. కిమ్ సూ-హ్యూన్ త్రిపాఠీ, చొయ్ సెయుంగ్-హ్యో త్రిపాఠీ, కాంగ్ తే-మూ త్రిపాఠీల్లో ఏది బాగుంటుందని ఆ పోల్లో ఆమె అడిగారు. దీనికి చాలా మంది కాంగ్ తే-మూ త్రిపాఠీ బాగుందంటూ ఓటేశారు. దీంతో ఆ జంట తమ బాబుకు అదే పేరు పెట్టారు.

ఈ విషయాన్ని సదరు యూజర్ ఎక్స్ ద్వారా తెలిపారు. "నా కజిన్, అతని భార్య కేడ్రామాస్ గురించి జరుగుతున్న చర్చ ద్వారా కలుసుకున్నారు. ఆ తర్వాత ళ్లు నెట్‌ఫ్లిక్స్ లోని కేడ్రామాస్ అన్నింటినీ వదలకుండా చూశారు. వాళ్లకు ఈ మధ్యే ఓ బాబు పుట్టాడు.. వాళ్లు ఏం చేశారో చూడండి" అంటూ ఆ పోల్ కు సంబంధించిన స్క్రీన్ షాట్ ను షేర్ చేశారు.

కొరియన్ డ్రామాస్ పై అభిమానం ఉన్నంత వరకూ ఓకేగానీ.. అది మరీ ఇలా ముదిరితే బాగుండదని కొందరు కామెంట్స్ చేశారు. వాళ్లు ఆ బాబును ఇండియాలోనే పెంచాలనుకుంటే మాత్రం అతనికి ఇబ్బందులు తప్పవని చాలా మంది సూచించారు. ఆ బాబుకు జీవితాంతం వేధింపులు ఉంటాయనీ అంటున్నారు. మరి దీనికి ఆ కపుల్ ఎలా రియాక్ట్ అవుతుందో చూడాలి. కొరియన్ డ్రామాస్ ను అభిమానించడం వరకు ఓకేగానీ.. ఇలా చేయడం సరికాదన్న నెటిజన్ల అభిప్రాయంతో మీరూ ఏకీభవిస్తారా?