OTT Crime Thriller: ఓటీటీలోకి ఏడాదిన్నర తర్వాత వచ్చిన హిట్ కన్నడ క్రైమ్ థ్రిల్లర్ మూవీ.. ఇది ఆ తెలుగు మూవీ రీమేకే..

OTT Crime Thriller: ఓటీటీలో ఈ వీకెండ్ కు ఓ మంచి క్రైమ్ థ్రిల్లర్ మూవీ సిద్ధంగా ఉంది. అయితే అది తెలుగు మూవీ కాదు. ఏడాదిన్నర కిందట థియేటర్లలో రిలీజైన కన్నడ సినిమా. గతేడాది జూన్ లో రిలీజైన యదా యదా హి సినిమా ఇప్పుడు సన్ నెక్ట్స్ లో అందుబాటులోకి వచ్చింది. ఈ మూవీకి ఐఎండీబీలో 8కిపైగా రేటింగ్ ఉండటం విశేషం.

యదా యదా హి ఓటీటీ స్ట్రీమింగ్

కన్నడ క్రైమ్ థ్రిల్లర్ మూవీ యదా యదా హి ఓటీటీ స్ట్రీమింగ్ కోసం చాలా రోజులుగా ప్రేక్షకులు ఎదురు చూస్తున్నారు. గతేడాది జూన్ 2న థియేటర్లలో రిలీజై మంచి రెస్పాన్స్ అందుకున్న సినిమా ఇది. అయితే ఇప్పుడు సుమారు ఏడాదిన్నర తర్వాత శుక్రవారం (నవంబర్ 15) నుంచి సన్ నెక్ట్స్ ఓటీటీలో స్ట్రీమింగ్ కు వచ్చింది.

ఓ ఇంట్రెస్టింగ్ స్టోరీ లైన్ తో వచ్చిన ఈ సినిమాకు ఓటీటీలో కూడా మంచి రెస్పాన్స్ వచ్చే అవకాశం ఉంది. అయితే కేవలం కన్నడ ఆడియోతో మాత్రమే అందుబాటులో ఉంది. ఇంగ్లిష్ సబ్ టైటిల్స్ తో చూడాలనుకుంటే చూసేయొచ్చు.

యదా యదా హి మూవీ స్టోరీ ఇదీ

యదా యదా హి కన్నడ క్రైమ్ థ్రిల్లర్ సినిమాను అశోక్ తేజ డైరెక్ట్ చేశాడు. ఇందులో హరిప్రియ, దిగంత్, విశిష్ట ఎన్ సింహ నటించారు. 2019లో తెలుగులో వచ్చిన ఎవరు మూవీకి ఇది రీమేక్.

అడవి శేష్ నటించిన ఆ మూవీని కూడా 2016లో వచ్చిన ది ఇన్విజిబుల్ గెస్ట్ అనే స్పానిష్ మూవీ ఆధారంగా తెరకెక్కించారు. కన్నడలో యదా యదా హి పేరుతో వచ్చిన ఈ మూవీకి క్రిటిక్స్ నుంచి పాజిటివ్ రివ్యూలే వచ్చినా.. కమర్షియల్ గా మాత్రం ఫ్లాపయింది. ఓ ఏసీపీ తనను రేప్ చేశాడని ఆరోపణలతో అతన్ని కాల్చి చంపిన ప్రియాంకా శెట్టి అనే మహిళ.. ఇందులో నుంచి బయటపడటానికి అశోక్ తేజ అనే ఓ అవినీతి పోలీస్ ఇన్‌స్పెక్టర్ ను కలుస్తుంది.

ఇద్దరూ కలిసి ఈ మర్డర్ కేసును ఎలా ఎదుర్కొంటారు? చివరికి ఏం జరుగుతుంది అన్నది ఈ యదా యదా హి సినిమాలో చూడొచ్చు. తెలుగులో ఎవరు పేరుతో వచ్చిన ఈ సినిమా ప్రస్తుతం ప్రైమ్ వీడియోలో అందుబాటులో ఉంది. ఇక ఈ కన్నడ రీమేక్ సన్ నెక్ట్స్ ఓటీటీలోకి వచ్చింది.