Mark Antony Teaser: ఫోన్లో టైమ్ ట్రావెల్.. కొత్తగా ఉన్న మార్క్ ఆంటోనీ టీజర్

Mark Antony Teaser: టైమ్ ట్రావెల్ కాన్సెప్ట్ తో ఈ మధ్య కాలంలో తరచూ సినిమాలు వస్తూనే ఉన్నాయి. తాజాగా తమిళం, తెలుగులో వస్తున్న మార్క్ ఆంటోనీ కూడా అదే కోవలోకి వస్తుంది. తాజాగా గురువారం (ఏప్రిల్ 27) మేకర్స్ ఈ మూవీ టీజర్ రిలీజ్ చేశారు. అయితే ఇందులో ఫోన్లో టైమ్ ట్రావెల్ అనే ఓ కొత్త కాన్సెప్ట్ తో మూవీపై ఆసక్తి పెంచేశారు.

విశాల్, ఎస్‌జే సూర్య నటించిన ఈ మూవీకి అధిక్ రవిచంద్రన్ దర్శకత్వం వహించాడు. రీతూ వర్మ ఫిమేల్ లీడ్ గా కనిపిస్తోంది. ఈ మార్క్ ఆంటోనీ టీజర్ ను తమిళ సూపర్ స్టార్ విజయ్ రిలీజ్ చేయడం విశేషం. టీజర్ మొత్తం యాక్షన్ సీన్లతో నింపేశారు. టైమ్ ట్రావెల్ గురించే అన్నది స్పష్టంగా తెలుస్తున్నా.. ఫోన్లో టైమ్ ట్రావెల్ అన్నది కాస్త ఆసక్తిగా ఉంది.

గతంలో ఉన్న పాత్రలు, ప్రస్తుత పాత్రల మధ్య నడిచే ఫైట్ ను కూడా ఈ టీజర్ లో చూపించారు. పాతకాలం నాటి గెటప్స్ లో విశాల్, సూర్య కనిపించారు. ఇక ఈ మూవీలో సునీల్ కూడా నటిస్తున్నాడు. కొన్ని రోజుల కిందట ఇదే మూవీ షూటింగ్ లో హీరో విశాల్ పెను ప్రమాదం నుంచి బయటపడ్డాడన్న వార్త వచ్చిన విషయం తెలిసిందే.

షూటింగ్ సమయంలోనే ట్రక్ అదుపు తప్పి లొకేషన్ లో ఉన్న వారిపైకి దూసుకొచ్చింది. ఈ వీడియో కూడా వైరల్ అయింది. ఈ మార్క్ ఆంటోనీ మూవీకి జీవీ ప్రకాశ్ మ్యూజిక్ అందించాడు. ఈ మూవీ టీజర్ ను ఇప్పటికే దళపతి విజయ్ చూసినట్లు కూడా మేకర్స్ చెప్పారు. విజయ్ ని కలిసి ఫొటోలను కూడా విశాల్ సోషల్ మీడియాలో పోస్ట్ చేశాడు.