Laal Singh Chadha Trailer | ఐపీఎల్‌ ఫైనల్లో రిలీజైన ఆమిర్‌ ఖాన్‌ సినిమా ట్రైలర్‌

అహ్మదాబాద్‌లోని ప్రపంచంలోనే అతిపెద్ద క్రికెట్‌ స్టేడియంలో జరుగుతున్న ఐపీఎల్‌ ఫైనల్లో బాలీవుడ్ మూవీ లాల్‌ సింగ్ చద్దా ట్రైలర్‌ ఆవిష్కరించారు. దీనిని తన ట్విటర్‌ అకౌంట్ ద్వారా ఆమిర్‌ ఖాన్‌ అభిమానులతో పంచుకున్నాడు. ఆమిర్‌ ఖాన్‌, కరీనా కపూర్‌ నటించిన ఈ సినిమా.. 1994లో వచ్చిన హాలీవుడ్‌ మూవీ ఫారెస్ట్‌ గంప్‌కు రీమేక్‌. స్టార్‌ హీరో టామ్ హ్యాంక్స్‌ నటించిన ఆ మూవీకి అకాడెమీ అవార్డు కూడా వచ్చింది.

ఈ లాల్ సింగ్ చద్దాకు అద్వైత్‌ చందన్‌ డైరెక్టర్‌. మూడు నిమిషాల ట్రైలర్‌లో ఆమిర్‌ తనకు మాత్రమే సాధ్యమైన హావభావాలతో ఆకట్టుకున్నాడు. టామ్‌ హ్యాంక్స్‌ను మరిపిస్తూ తన పాత్రకు ప్రాణం పోశాడు. ఈ మూవీలో ఆమిర్‌ తల్లిగా మోనా సింగ్‌ నటించింది. ఈ మూవీలో ఓ దివ్యాంగుడి పాత్రలో ఆమిర్‌ కనిపించనున్నాడు. తన అంగవైకల్యాన్ని అధిగమించి ఓ ప్రొఫెషనల్‌ రన్నర్‌గా మారి, తర్వాత ఆర్మీలో చేరే ఓ వీరుని కథే ఈ లాల్‌ సింగ్ చద్దా.

ఈ మూవీలో తెలుగు స్టార్‌ హీరో నాగచైతన్య కూడా నటించడం విశేషం. ఫారెస్ట్ గంప్‌ మూవీని మన నేటివిటీకి తగినట్లుగా మలిచే ప్రయత్నం ఇందులో చేశారు. జీవితం గోల్‌గప్పా (పానీపూరీ)లాంటిది.. కడుపు నిండినా.. మనసు మాత్రం నిండదు.. అనే ఆమిర్‌ డైలాగ్‌తో ట్రైలర్‌ ముగుస్తుంది. ఈ మూవీ ఆగస్ట్ 11న ప్రేక్షకుల ముందుకు రానుంది. ఈ ట్రైలర్‌ను ఐపీఎల్‌ ఫైనల్‌ సందర్భంగా లాంచ్‌ చేయనున్నట్లు శనివారమే సినిమా యూనిట్‌ ప్రకటించింది. రాజస్థాన్‌ రాయల్స్‌ ఇన్నింగ్స్‌ రెండో స్ట్రేటజిక్‌ టైమౌట్ సందర్భంగా లాల్‌ సింగ్ చద్దా ట్రైలర్‌ లాంచ్‌ అయింది.