KGF Chapter 2 | బాలీవుడ్‌పై వేసిన న్యూక్లియర్‌ బాంబ్.. కేజీఎఫ్‌ను ఆకాశానికెత్తిన రామ్‌గోపాల్‌ వర్మ

ఒకప్పుడు తెలుగుతోపాటు బాలీవుడ్‌ను కూడా ఏలిన డైరెక్టర్‌ రామ్‌గోపాల్‌ వర్మ. రంగీలా, సత్య, సర్కార్‌లాంటి మూవీస్‌తో హిందీ సినిమా ఇండస్ట్రీని షేక్‌ చేసిన ఘనత అతని సొంతం. అలాంటి డైరెక్టర్‌.. ఇప్పుడు మన తెలుగు, కన్నడ డైరెక్టర్లు బాలీవుడ్‌లో సృష్టిస్తున్న ప్రకంపనలపై తరచూ స్పందిస్తున్నాడు. ఈ మధ్య మీడియాతో మాట్లాడుతూ.. మన తెలుగు, కన్నడ డైరెక్టర్లు హిందీ బెల్ట్‌ ఆడియెన్స్‌తో కనెక్ట్‌ అవుతున్నారని అన్న ఆర్జీవీ ఇప్పుడు వరుస ట్వీట్లలో కేజీఎఫ్‌ చాప్టర్‌ 2 మూవీని ఆకాశానికెత్తాడు.

"హిందీ సినిమాను వదిలేయండి. మన తెలుగు, తమిళ సినీ ఇండస్ట్రీలు కూడా కన్నడ సినిమాలను ఎప్పుడూ సీరియస్‌గా తీసుకోలేదు. ఇప్పుడు కేజీఎఫ్‌, ప్రశాంత్‌ నీల్‌ ఆ సినిమా ఇండస్ట్రీని ప్రపంచ పటంలో నిలుపుతున్నారు" అని ఆర్జీవీ ట్వీట్‌ చేశాడు. ఇక సినిమాలో రాకీ భాయ్‌గా ముంబైకి వచ్చి ఎలా అయితే విలన్లను మిషన్‌ గన్నింగ్‌ చేశాడో.. అలాగే బాలీవుడ్‌ స్టార్ల కలెక్షన్లను యశ్‌ మిషన్‌ గన్నింగ్‌ చేస్తున్నాడని, ఇక ఫైనల్‌ కలెక్షన్లు బాలీవుడ్‌పై శాండల్‌వుడ్‌ వేసే న్యూక్లియర్‌ బాంబ్‌ అవుతుందని మరో ట్వీట్‌లో ఆర్జీవీ అనడం విశేషం.

ప్రశాంత్‌ నీల్‌, యశ్‌ కేజీఎఫ్‌ మూవీ గ్యాంగ్‌స్టర్‌ మూవీయే కాదు.. బాలీవుడ్‌కు ఓ హారర్‌ మూవీ అని, రానున్న సంవత్సరాలలో కేజీఎఫ్‌ సక్సెస్‌ అక్కడి వాళ్లకు నిద్రలేని రాత్రులను మిగులుస్తాయని కూడా ఆర్జీబీ అన్నాడు. రామ్‌గోపాల్‌ వర్మ అనడం కాదు కానీ.. కేజీఎఫ్‌ చాప్టర్‌ 2 బాక్సాఫీస్‌ దగ్గర సృష్టిస్తున్న ప్రకంపనలు మామూలుగా లేవు. కేవలం రెండు రోజుల్లోనే హిందీ బెల్ట్‌లో రూ.100 కోట్లకుపైగా వసూళ్లు సాధించిందంటే ఈ మూవీ ఏ స్థాయిలో దూసుకెళ్తోందో అర్థం చేసుకోవచ్చు. కేజీఎఫ్‌ ఫస్ట్‌ పార్ట్‌ సక్సెస్‌తో ఈ సెకండ్‌ పార్ట్‌పై అంచనాలు భారీగా ఉన్నాయి. వాటిని అందుకోవడంలో డైరెక్టర్‌ ప్రశాంత్‌ నీల్‌ సక్సెసయ్యాడు.