Janhvi Kapoor: ట్రోలర్స్‌పై జాన్వీ ఫైర్.. చెల్లి జోలికొస్తే ఊరుకోనని వార్నింగ్!

దివంగత శ్రీదేవి ముద్దుల తనయ జాన్వీ కపూర్.. ప్రస్తుతం బాలీవుడ్‌లో వరుస పెట్టి సినిమాలు చేస్తూ ఫుల్ బిజీగా ఉంది. తల్లి అందాన్ని పునికి పుచ్చుకున్న ఈ ముద్దుగుమ్మ వెబ్‌సిరీస్‌ల్లోనూ నటిస్తోంది. ఇటీవల ఓ ఇంటర్వ్యూలో మాట్లాడిన జాన్వీ పలు ఆసక్తికర విషయాలను పంచుకుంది. తన చెల్లి ఖుషి కపూర్ గురించి మాట్లాడుతూ.. ప్రస్తుతం ఆమె ఆర్చీస్ అనే ప్రాజెక్టు చేస్తోందని, దానికోసం ఎంతగానో కష్టపడుతుందని తెలిపింది.

"ఖుషి ఎంత కష్టపడుతుందో నేను ప్రత్యక్షంగా చూశాను. తను ఈ ప్రాజెక్టును బలంగా కోరుకుంటోంది. ఆమెను చూస్తే ఆనందంగా ఉంది. ఎవరైనా ఆమె గురించి చెడుగా మాట్లాడితే ఊరికే వదలిపెట్టను.. చిత్తు చేస్తాను" అంటూ జాన్వీ సీరియసైంది.

ది ఆర్చీస్ అనే ఈ ప్రాజెక్టును జోయా అక్తర్ రూపొందిస్తున్నారు. లైవ్ యాక్షన్ మ్యూజికల్‌గా ఈ సినిమా తెరకెక్కుతోంది. ఇందులో అమితాబ్ బచ్చన్ మనుమడు అగస్త్య నందా కూడా నటిస్తున్నాడు. ఆర్చీ కామిక్స్‌తో జత కట్టిన నెట్‌ఫ్లిక్స్ ఈ సినిమాను నిర్మిస్తోంది. ఇందుకోసం 1960 దశకంలో మాదిరిగా కనిపించే ప్రత్యేక సెట్‌ను రూపొందించాయి.

ఈ సినిమాలో ఖుషి, అగస్త్య కాకుండా మరో నలుగురు కీలక పాత్రలు పోషిస్తున్నారు. సూపర్ 30తో ప్రాచుర్యం పొందిన మిహిర్ అహుజా, డాట్, యువరాజ్ మెండా, వేదంగ్ రైనా తదితరులు కీలక పాత్రలు పోషిస్తున్నారు.