Yash |య‌శ్ ను చూసి జెల‌సీగా ఫీల‌వుతున్నారు...క‌న్న‌డ స్టార్ హీరోలపై ఫ్యాన్స్ ఆగ్ర‌హం

ప్రస్తుతం క‌న్న‌డ సినీ ప‌రిశ్ర‌మ పేరు చెప్ప‌గానే అంద‌రికి కేజీఎఫ్‌తో పాటు హీరో య‌శ్ గుర్తొస్తాడు. కేజీఎఫ్ ప్ర‌స్తావ‌న లేకుండా క‌న్న‌డ సినీ ప‌రిశ్ర‌మ చరిత్ర గురించి చెప్ప‌లేమంటే అతిశయోక్తి కాదు. ఈ సినిమా క‌న్న‌డ సినీ చ‌రిత్ర‌ను కేజీఎఫ్ ముందు, కేజీఎఫ్ త‌ర్వాత అనే స్థాయికి తీసుకొచ్చారు హీరోయ‌శ్‌, దర్శకుడు ప్ర‌శాంత్ నీల్‌. ఇటీవ‌లే విడుద‌లైన కేజీఎఫ్ 2 చిత్రం దేశవ్యాప్తంగా చక్కటి ఆదరణను సొంతం చేసుకుంటోంది. అన్ని భాష‌ల సినీ ప్ర‌ముఖులు, అభిమానులు సినిమాపై ప్రశంసల్ని కురిపిస్తున్నారు. మొదటి వారంలోనే ఎనిమిది వంద‌ల కోట్ల వ‌సూళ్ల‌కు చేరువై రికార్డులు సృష్టిస్తోంది. క‌న్న‌డ సినీ హిస్ట‌రీలోనే అత్య‌ధిక క‌లెక్ష‌న్స్ సాధించిన సినిమాగా కేజీఎఫ్‌-2 నిలిచింది. బాలీవుడ్‌, టాలీవుడ్‌తో పాటు అన్ని భాష‌ల స్టార్స్ య‌శ్‌, ప్ర‌శాంత్ నీల్‌తో పాటు కేజీఎఫ్ టీమ్‌ను అభినందిస్తున్నారు. 

సినిమా విడుద‌లై వారం దాటినా క‌న్న‌డ అగ్ర హీరోలు ఎవరూ ఇప్ప‌టివ‌ర‌కు సినిమాను ప్ర‌శంసిస్తూ ఒక్క మాట కూడా మాట్లాడ‌లేదు. శివ‌రాజ్ కుమార్‌, కిచ్చా సుదీప్‌, ద‌ర్శ‌న్ తో పాటు మ‌రికొంద‌రు స్టార్స్ తీరుపై అభిమానులు ఆగ్ర‌హాన్ని వ్య‌క్తం చేస్తున్నారు. య‌శ్ సాధించిన విజయం ప‌ట్ల వారు జెల‌సీగా ఫీల‌వుతున్న‌ట్లుగా కామెంట్స్ చేస్తున్నారు. య‌శ్ ను ప‌క్క‌న‌పెడితే క‌నీసం సినిమాను ఉద్దేశిస్తూ వారు సోష‌ల్ మీడియాలో ఒక్క పోస్ట్ పెట్ట‌క‌పోవ‌డం విమ‌ర్శ‌ల‌కు తావిస్తోంది.  

కేజీఎఫ్ 2తో క‌న్న‌డ సినిమా ఖ్యాతిని దేశ‌వ్యాప్తంగా య‌శ్ చాటిచెబుతున్నా స్టార్స్ సంతోషపడకుండా సైలెంట్ గా ఉండ‌టం ఎందుకో అర్థంకావడం లేదని ఫ్యాన్స్ అంటున్నారు. ఇప్ప‌టివ‌ర‌కు క‌న్న‌డ హీరోలు ఎవ‌రూ సాధించ‌లేని ఘ‌న‌త‌ను కేజీఎఫ్ సిరీస్ సినిమాల‌తో య‌శ్ చేసి చూపించాడ‌ని చెబుతున్నారు. అత‌డిని చూసి నేర్చుకోవాలంటూ క‌న్న‌డ స్టార్స్‌ను ఉద్దేశిస్తూ కామెంట్స్ చేస్తున్నారు. విమ‌ర్శ‌లు తాకిడి పెరుగుతున్న నేప‌థ్యంలో  కేజీఎఫ్ ఓ మాస్ట‌ర్ పీస్ అంటూ గురువారం ఉపేంద్ర ట్విట్ట‌ర్ లో పేర్కొన్నారు. య‌శ్‌, ప్ర‌శాంత్ నీల్ క‌లిసి అద్భుతాన్ని చేశారంటూ వ్యాఖ్యానించారు. ఉపేంద్ర దారిలోకి మిగిలిన హీరోలు వస్తారా? లేదా అన్నది చూడాల్సిందే.