Rajkumar Hirani: ఆ టాలీవుడ్ హీరోతో మూవీ చేయాలనుంది: డంకీ డైరెక్టర్ హిరానీ

Rajkumar Hirani: మున్నా భాయ్ ఎంబీబీఎస్, త్రీ ఇడియట్స్, పీకే, సంజూ లాంటి మరిన్ని బ్లాక్‍బాస్టర్ చిత్రాలతో బాలీవుడ్ స్టార్ డైరెక్టర్‌గా రాజ్‍కుమార్ హిరానీ కొనసాగుతున్నారు. తాజాగా షారుఖ్ ఖాన్ హీరోగా ఆయన దర్శకత్వంలో డంకీ మూవీ వచ్చింది. ఈ ఏడాది డిసెంబర్ 21న రిలీజైన ఆ కామెడీ ఎమోషనల్ చిత్రం మోస్తరు కలెక్షన్లతో సాగుతోంది. కాగా, డంకీ ప్రమోషన్లలో భాగంగా ఇటీవల ఓ ఇంటర్వ్యూలో పాల్గొన్నారు డైరెక్టర్ రాజ్‍కుమార్ హిరానీ. ఈ సందర్భంగా టాలీవుడ్ మెగా పవర్ స్టార్ రామ్‍చరణ్‍తో సినిమా చేస్తున్నారా అనే ప్రశ్న ఆయనకు ఎదురైంది.

రామ్‍చరణ్‍తో హిరానీ మూవీ చేయనున్నారని కొంతకాలంగా పుకార్లు వస్తున్నాయి. వీటిపై హిరానీ స్పందించారు. ఇప్పటికైతే తాను రామ్‍చరణ్‍తో సినిమా చేయడం లేదని చెప్పారు. అయితే, భవిష్యత్తులో రామ్‍చరణ్‍తో మూవీ తెరకెక్కించాలని ఉందని అన్నారు. తాను ఇప్పటి వరకు అతడిని వ్యక్తిగతంగా కలవలేదని తెలిపారు.

ఆర్ఆర్ఆర్ సినిమా గ్లోబల్ హిట్ అయ్యాక రామ్‍చరణ్ పాపులారిటీ విపరీతంగా పెరిగింది. బాలీవుడ్, హాలీవుడ్ సహా చాలా ఇండస్ట్రీలకు చెందిన ఫిల్మ్ మేకర్స్ అతడితో మూవీ చేయాలని ఉందంటూ ఆసక్తిని వెల్లడించారు. రాజ్‍కుమార్ హిరానీ కూడా అలాంటి మాటే అన్నారు.

రామ్‍చరణ్ ప్రస్తుతం గేమ్ ఛేంజర్ సినిమా చేస్తున్నారు. తమిళ స్టార్ డైరెక్టర్ శంకర్ ఈ చిత్రానికి దర్శకత్వం వహిస్తున్నారు. ఈ మూవీ షూటింగ్ ఆలస్యమవుతూ వస్తోంది. అయితే, గేమ్ ఛేంజర్ సినిమాను 2024 సెప్టెంబర్‌లో రిలీజ్ చేసేందుకు ప్లాన్ చేస్తున్నామని నిర్మాత దిల్‍రాజు ఇటీవల చెప్పారు. ఈ భారీ బడ్జెట్ మూవీలో కియారా అద్వానీ హీరోయిన్‍గా నటిస్తున్నారు.

గేమ్‍ ఛేంజర్ మూవీ తర్వాత ఉప్పెన ఫేమ్ డైరెక్టర్ బుచ్చిబాబుతో రామ్‍చరణ్ ఓ మూవీ చేయనున్నారు. స్పోర్ట్స్ బ్యాక్‍డ్రాప్‍లో ఈ చిత్రం ఉండనుంది. ఈ సినిమాకు ఆస్కార్ అవార్డ్ విజేత ఏఆర్ రహమాన్ సంగీతం అందించనున్నారు.