Ranbir Kapoor: ఆ విషయంలో ప్రేక్షకులు భయపడరనే అనుకుంటున్నా: రణ్‍బీర్ కపూర్

Ranbir Kapoor: ప్రస్తుతం యానిమల్ సినిమా మేనియా నడుస్తోంది. డిసెంబర్ 1న ఈ చిత్రం రిలీజ్ కానుండడంతో.. ప్రమోషన్లలో మూవీ యూనిట్ జోరు పెంచింది. హీరో రణ్‍బీర్ కపూర్.. వరుసగా ప్రెస్‍మీట్లు, ఇంటర్వ్యూల్లో పాల్గొంటున్నారు. అర్జున్ రెడ్డి ఫేమ్ సందీప్ రెడ్డి వంగా ఈ చిత్రానికి దర్శకత్వం వహించారు. అయితే, యానిమల్ సినిమా రన్‍టైమ్‍పై కూడా చాలా చర్చ జరుగుతోంది. ఈ మూవీ లాంగ్ రన్‍టైమ్‍పై రకరకాల అభిప్రాయాలు వ్యక్తమవుతున్నాయి. మీమ్స్ కూడా వస్తున్నాయి. అయితే, యానిమల్ మూవీ రన్‍టైమ్ గురించి రణ్‍బీర్ కపూర్ తాజాగా స్పందించారు.

యానిమల్ సినిమా రన్‍టైమ్ (నిడివి) 3 గంటల 21 నిమిషాల 23 సెకన్లుగా ఉంది. ఓ సినిమాకు 3 గంటలే ఎక్కువంటే.. ఈ చిత్రానికి సుమారు మూడున్నర గంటల రన్ టైమ్ ఉంది. దీంతో అంతసేపు ఓపికగా ప్రేక్షకులు ఈ చిత్రాన్ని చూస్తారా.. అంతసేపు ఆసక్తిగా కూర్చొబెట్టేలా ఎంగేజింగ్‍గా ఉంటుందా అన్న సందేహాలు వ్యక్తమవుతున్నాయి. బెంగళూరులో జరిగిన ప్రెస్‍మీట్‍లో ఈ విషయంపైనే హీరో రణ్‍బీర్ కపూర్ స్పందించారు.

యానిమల్ కథకు అంత రన్ టైమ్ కచ్చితంగా అవసరం అని తాము భావించామని రణ్‍బీర్ చెప్పారు. రన్‍టైమ్ విషయంలో ప్రేక్షకులు భయపడరని తాము అనుకుంటున్నామని అన్నారు. “మేమేదో గర్వంగా భావించి అంత లాంగ్ రన్‍టైమ్‍తో ఈ చిత్రాన్ని తీసుకురావడం లేదు. వీలైనంత అత్యుత్తమంగా ప్రేక్షకులకు చేరేందుకు ఈ స్టోరీకి అంత అంత సమయం అవసరం. అందుకే లాంగ్ రన్‍టైమ్‍తో ఈ మూవీని రిలీజ్ చేస్తున్నాం” అని రణ్‍బీర్ కపూర్ సమాధానం ఇచ్చారు.

ఇంకా కట్ చేయగానే యానిమల్ సినిమా రన్ టైమ్ 3 గంటల 21 నిమిషాలకు వచ్చిందని రణ్‍బీర్ చెప్పారు. “మేమంతా 3 గంటల 49 నిమిషాల రన్‍టైమ్ ఉన్న వెర్షన్ చూశాం. అది కూడా ఎంటర్‌టైనింగ్‍గా ఉంది. అయితే, నిడివి కాస్త తగ్గించేందుకు సందీప్ చాలా కష్టపడ్డారు. అందుకంటే ఎక్కువగా కట్ చేసే విషయాలు లేవు. అయితే, అయితే మూవీ రన్‍టైమ్ పట్ల ప్రేక్షకులు భయపడరని నేను ఆశిస్తున్నా. వచ్చి సినిమాను అత్యుత్తమంగా అనుభూతి చెందండి” అని రణ్‍బీర్ చెప్పారు.

యానిమల్ చిత్రంలో రణ్‍బీర్ సరసన రష్మిక మందన్న హీరోయిన్‍గా నటించారు. రణ్‍బీర్ తండ్రి పాత్రలో అనిల్ కపూర్.. విలన్‍గా బాబీ డియోల్ చేశారు. డిసెంబర్ 1వ తేదీన హిందీ, తెలుగు, తమిళం, కన్నడ, మలయాళ భాషల్లో ఈ మూవీ రిలీజ్ కానుంది. ఇప్పటికే అడ్వాన్స్ బుకింగ్‍ల్లో యానిమల్ దుమ్మురేపుతోంది. తెలుగు రాష్ట్రాల్లోనూ క్రేజ్ విపరీతంగా ఉంది. నేడు (నవంబర్ 27) హైదరాబాద్‍లో యానిమల్ ప్రీ-రిలీజ్ ఈవెంట్ జరగనుండగా.. సూపర్ స్టార్ మహేశ్ బాబు, దర్శక ధీరుడు రాజమౌళి ముఖ్య అతిథులుగా హాజరుకానున్నారు.