Animal: నేడే యానిమల్ ప్రీరిలీజ్ ఈవెంట్.. హాజరుకానున్న మహేశ్ బాబు, రాజమౌళి.. SSMB 29 గురించి అప్‍డేట్ రానుందా!

Animal Pre-Release event: బాలీవుడ్ స్టార్ హీరో రణ్‍బీర్ కపూర్ ప్రధాన పాత్రలో నటించిన యానిమల్ మూవీ కోసం సినీ ప్రేక్షకులు ఆసక్తిగా ఎదురుచూస్తున్నారు. డిసెంబర్ 1వ తేదీన ఈ చిత్రం థియేటర్లలో రిలీజ్ కానుంది. అర్జున్ రెడ్డితో సంచలనం సృష్టించిన సందీప్ రెడ్డి వంగా.. యానిమల్ సినిమాకు దర్శకత్వం వహించారు. ఈ చిత్రానికి తెలుగులోనూ జోరుగా ప్రమోషన్లను చేస్తోంది మూవీ యూనిట్. తెలుగుపై ఫుల్ ఫోకస్ పెట్టింది. ఇందులో భాగంగా హైదరాబాద్‍లో నేడు (నవంబర్ 27) యానిమల్ సినిమా ప్రీ-రిలీజ్ ఈవెంట్‍ను గ్రాండ్‍గా నిర్వహించనుంది యానిమల్ టీమ్.

హైదరాబాద్‍లోని దూలపల్లిలో ఉన్న మల్లా రెడ్డి యూనివర్సిటీలో నేటి (నవంబర్ 27) సాయంత్రం యానిమల్ సినిమా ప్రీ-రిలీజ్ ఈవెంట్ జరగనుంది. ఈ ఈవెంట్‍కు టాలీవుడ్ సూపర్ స్టార్ మహేశ్ బాబు, దర్శకధీరుడు ఎస్ఎస్ రాజమౌళి ముఖ్య అతిథులుగా హాజరుకానున్నారు. దీంతో ఈ ఈవెంట్‍పై ఒక్కసారిగా అందరికీ ఆసక్తి పెరిగింది.

ఆర్ఆర్ఆర్ సినిమాతో గ్లోబల్ హిట్ కొట్టి ప్రపంచవ్యాప్తంగా పాపులర్ అయిన దర్శక దిగ్గజం ఎస్ఎస్ రాజమౌళి.. తదుపరి మహేశ్ బాబుతో సినిమా చేయనున్నారు. మహేశ్‍కు ఇది 29వ మూవీ (SSMB 29)గా ఉండనుంది. ఈ చిత్రం వచ్చే ఏడాది సెట్స్ పైకి వెళ్లనుంది. అయితే, ఇప్పుడు యానిమల్ సినిమా ప్రీ-రిలీజ్ ఈవెంట్‍కు మహేశ్, రాజమౌళి ఇద్దరూ హాజరవుతుండటంతో వారి కాంబోలో రానున్న సినిమా గురించి అప్‍డేట్, సమాచారం వెల్లడవుతుందని అభిమానులు ఆసక్తిగా ఎదురుచూస్తున్నారు. SSMB29 గురించి మహేశ్, రాజమౌళిల్లో ఎవరో ఒకరు ఏదో ఒక సమాచారం ఇస్తారని ఆశిస్తున్నారు.

మహేశ్ బాబుతో సినిమాను హాలీవుడ్ రేంజ్‍లో రూపొందేందుకు రాజమౌళి రెడీ అయ్యారు. యాక్షన్ అడ్వెంచర్ డ్రామా ఈ మూవీ ఉంటుందని ఇప్పటికే చెప్పేశారు. స్క్రిప్ట్ పనులు కూడా దాదాపు పూర్తయ్యాయి. ప్రస్తుతం గుంటూరు కారం షూటింగ్‍లో మహేశ్ ఉన్నారు. మహేశ్ - రాజమౌళి సినిమా షూటింగ్ వచ్చే ఏడాది షురూ కానుంది.

యానిమల్ సినిమాను పక్కా ఎమోషనల్ హైవోల్టేజ్ యాక్షన్ డ్రామాగా రూపొందించారు డైరెక్టర్ సందీప్ రెడ్డి వంగా. ఈ చిత్రంలో రణ్‍బీర్ సరసన రష్మిక మందన్న హీరోయిన్‍గా చేశారు. అనిల్ కపూర్, బాబీ డియోల్ కీలకపాత్రలు పోషించారు. ఇప్పటికే వచ్చిన ట్రైలర్ ఈ సినిమాపై అంచనాలను ఆకాశానికి తీసుకెళ్లింది. ఈ చిత్రం కోసం అడ్వాన్స్ బుకింగ్స్ అంచనాలకు మించి భారీగా జరుగుతున్నాయి. డిసెంబర్ 1న హిందీతో పాటు తెలుగు, తమిళం, కన్నడ, మలయాళ భాషల్లో యానిమల్ రిలీజ్ కానుంది.