Virata Parvam: వరంగల్‌కి వస్తే నా ఇంటికి వచ్చినట్లే ఉంటుంది: సాయి పల్లవి

తన డ్యాన్స్‌తో, సహజమైన హావభావాలతో తెలుగు ప్రేక్షకులకు బాగా దగ్గరైంది సాయి పల్లవి. పాత్ర ఏదైనా అందులో జీవించేస్తుంది. అలాంటి సాయి పల్లవి హీరోయిన్‌ ఓరియెంటెడ్‌ స్టోరీ అయిన విరాట పర్వంతో మరోసారి ప్రేక్షకుల ముందుకు వస్తోంది. ఈ నెల 17 మూవీ రిలీజ్‌ కానుండగా.. ఆదివారం వరంగల్‌లో ఆత్మీయ వేడుక పేరుతో ఓ ఈవెంట్ ఏర్పాటు చేశారు.

ఇందులో ఆమె మాట్లాడుతూ.. వరంగల్‌కు ఎప్పుడు వచ్చినా తన ఇంటికి వచ్చినట్లే ఉంటుంది అని అనడం విశేషం. "కళ లేకుండా మేము లేము. మేము లేకుండా కళ లేదు. ఇప్పుడు ఆ కళ ద్వారా వరంగల్‌కు చెందిన ఓ నిజాయతీ గల స్టోరీని మేము సినిమాగా చేశాం. ఇది మన సినిమా. మీరు ఈ సినిమాను కచ్చితంగా ఎంకరేజ్‌ చేయాలి. మీరు ప్రోత్సహిస్తేనే ఇలాంటి ప్రయత్నాలు చేయగలం" అని సాయిపల్లవి చెప్పింది.

వరంగల్‌ ప్రజల ఆశీర్వాదాలు తమపై ఉంటాయని ఆమె ఆశాభావం వ్యక్తం చేసింది. నక్సలిజం బ్యాక్‌డ్రాప్‌లో సాగే ఓ లవ్‌స్టోరీ ఇది. రానా దగ్గుబాటి తొలిసారి ఇలాంటి స్టోరీలో నటిస్తున్నాడు. ఈ సినిమాను శ్రీ లక్ష్మీ వెంకటేశ్వర సినిమాస్‌, సురేశ్‌ ప్రొడక్షన్స్‌ సంయుక్తంగా నిర్మిస్తున్నాయి. ఈ ఆత్మీయ వేడుకలో పాల్గొన్న హీరో రానా మాట్లాడుతూ.. ఈ సినిమా ఎందుకు చేస్తున్నావని తనను చాలా మంది అడిగినట్లు చెప్పాడు.

"ఈ సినిమా చేస్తున్న సమయంలో ఒక యాక్షన్‌ మూవీ చేయకుండా ఇలాంటి సినిమా ఎందుకు చేస్తున్నావని అడిగారు. సాధారణంగా హీరోలు ఫ్యాన్స్‌ కోసం, చప్పట్ల కోసం సినిమాలు తీస్తారు. కానీ ఈ సినిమా మాత్రం ఓ నిజాయతీ గల కథతో కూడిన సినిమా కోసం చూస్తున్న వారి కోసం చేశాను. సక్సెస్‌ మీట్‌ సమయంలో మనమందరం మళ్లీ ఇక్కడే కలుద్దాం" అని రానా అన్నాడు. నీది నాది ఒకే కథ సినిమా ఫేమ్‌ వేణు ఉడుగుల ఈ మూవీకి డైరెక్టర్‌.