IPL 2022 | చెన్నై సూపర్‌ కింగ్స్‌ బ్యాటర్‌ ఫెయిలవడానికి ఆ హీరోయిన్ బోల్డ్ ఫొటోలే కారణమా?

ముంబై: ఈ ఐపీఎల్‌ సీజన్‌లో చెన్నైసూపర్‌ కింగ్స్‌ బ్యాటర్‌ రుతురాజ్‌ గైక్వాడ్‌ ఎంత దారుణంగా విఫలమవుతున్నాడో మనం చూస్తూనే ఉన్నాం. ఆడిన నాలుగు మ్యాచ్‌లలోనూ అతడు ఫెయిలయ్యాడు. మూడు మ్యాచ్‌లలో కలిపి రెండు పరుగులే చేయగా.. నాలుగో మ్యాచ్‌లో సన్‌రైజర్స్‌తోనే 16 రన్స్‌ చేశాడు. గత సీజన్‌లో అద్భుతంగా రాణించిన అతన్ని సీఎస్కే ఎంతో ముచ్చటపడి రిటేన్‌ చేసుకుంది. కానీ అతడు మాత్రం తన స్థాయికి తగిన ప్రదర్శన చేయడం లేదు.

అయితే రుతురాజ్‌ ఇలా ఫెయిలవడానికి ఓ మరాఠీ నటే కారణమంటూ నెటిజన్లు వాదిస్తుండటం ఇప్పుడు వైరల్‌గా మారింది. ఆమె పేరు సయాలీ సంజీవ్‌. ఈమె సరిగ్గా మ్యాచ్‌ సమయంలోనే తన బోల్డ్‌ ఫోటోలను సోషల్‌ మీడియాలో పోస్ట్‌ చేస్తోందని, అవి చూసి రుతురాజ్‌ సరిగ్గా ఆడలేకపోతున్నాడని కొందరు యూజర్లు కామెంట్ చేస్తున్నారు. చాలా రోజులుగా వీళ్లిద్దరి మధ్య లవ్‌ అఫైర్‌ నడుస్తున్నట్లుగా వార్తలు వస్తున్నాయి.

రుతురాజ్‌ గైక్వాడ్‌ది మహారాష్ట్రలోని పుణె. దీంతో ఈ మరాఠీ నటితో అతడు ప్రేమాయణం నడుపుతున్నట్లు గుసగుసలు వినిపిస్తున్నాయి. ఇప్పుడు ఐపీఎల్‌ జరుగుతున్న సమయంలో సయాలీ ఇలా రెచ్చగొట్టే ఫొటోలు సోషల్‌ మీడియాలో పోస్ట్‌ చేస్తుండటంతో వాటిని చూసి రుతురాజ్‌ ఆటపై దృష్టి సారించలేకపోతున్నాడని, మ్యాచ్‌ ఉన్న రోజుల్లో ఇలాంటి ఫొటోలు పెట్టకు అంటూ ఆ నటికి కొందరు యూజర్లు సూచించడం విశేషం.

కాస్త నువ్వయినా అతనితో మాట్లాడి బాగా ఆడమని చెప్పు అని మరో యూజర్‌ కామెంట్‌ చేయగా.. ప్రతి మ్యాచ్‌కు ముందు కొబ్బరికాయ కొట్టమని చెప్పంటూ ఇంకో యూజర్‌ సలహా ఇచ్చాడు. నువ్వు నిజంగానే రుతురాజ్‌ గైక్వాడ్‌ గర్ల్‌ఫ్రెండ్‌వేనా అంటూ మరో యూజర్‌ ఆమెను ప్రశ్నించాడు. రుతురాజ్‌ ఈరోజు మళ్లీ జీరోపై ఔటయ్యాడు.. నువ్వే ఏదో ఒకటి చేయాలి అంటూ మరో యూజర్‌ ఆమె ఫొటోలపై కామెంట్ చేశాడు.