Ram Charan | చరణ్‌పై వినూత్న అభిమానం.. 264 కిలోమీటర్ల పాదయాత్ర

తెలుగు వారికి సినిమా అంటే అదో ప్రపంచం. హీరోలను అభిమానించడం మొదలు పెడితే దేవుళ్ల మాదిరిగా ఆరాధిస్తుంటారు. వారిపై అభిమానాన్ని రకరకాలుగా చాటుకుంటుంటారు. అయితే ఇప్పటి వరకు నచ్చిన హీరో కోసం పచ్చబొట్టు వేసుకోవడమో, అభిమాన హీరో పుట్టినరోజున రక్తదానాలు చేయడం లాంటివి చూసుంటాం. కానీ ఓ వ్యక్తి తన అభిమాన కథానాయికుడి కోసం 264 కిలోమీటర్ల పాదయాత్ర చేశాడు. ఇంతకీ ఆ హీరో ఎవరో కాదు మన మెగాపవర్ స్టార్ రామ్ చరణ్.

రామ్ చరణ్ కోసం ఓ వ్యక్తి 264 కిలోమీటర్ల పాదయాత్ర చేశాడు. గద్వాల్‌కు చెందిన జైరాజ్ అనే యువకుడు తన అరెకరం పొలంలో వరి పంట వేశాడు. పంటను రామ్ చరణ్ ముఖచిత్రం ఆకారంలో సాగు చేసి అందులో పండిన ధాన్యాన్ని చరణ్‌కు కానుకగా ఇచ్చాడు. అందుకోసం ఏకంగా 264 కిలోమీటర్ల నడుచుకుంటూ హైదరాబాద్‌లోని రామ్ చరణ్ నివాసానికి చేరుకున్నాడు.

తన కోసం ఇంత చేసిన అభిమానిని సాదరంగా ఆహ్వానించారు చరణ్. తన నివాసంలో అతడిని కలిసి కాసేపు ముచ్చటించాడు. తన ముఖచిత్రం ఆకారంలో వరి పంట సాగు చేసి పండించిన ధాన్యాన్ని చరణ్ తీసుకున్నాడు. తనపై ఇంతటి అభిమానాన్ని చూపినందుకు అతడికి కృతజ్ఞతలు తెలిపారు. ప్రస్తుతం ఈ ఫొటోలు సోషల్ మీడియాలో వైరల్‌గా మారాయి.

ఇటీవలే ఆర్ఆర్ఆర్ సినిమాతో ప్రేక్షకులను పలకరించిన రామ్ చరణ్ అద్భుత విజయాన్ని సొంతం చేసుకున్నారు. ప్రస్తుతం ఆయన శంకర్ దర్శకత్వంలో తన తర్వాతి చిత్రాన్ని చేస్తున్నారు. ఈ సినిమాలో కియరా అద్వానీ, సునీల్ తదితరులు కీలక పాత్రలు పోషిస్తున్నారు. తమన్ సంగీతాన్ని సమకూరుస్తున్నారు. దిల్ రాజు ఈ చిత్రాన్ని నిర్మిస్తున్నారు.