Dunki box office collections: సలార్ దెబ్బకు దారుణంగా పడిపోయిన డంకీ కలెక్షన్లు.. ఆరో రోజు ఎన్నంటే?

Dunki box office collections: క్రిస్మస్ లాంగ్ వీకెండ్ ముగియగానే డంకీ మూవీ బాక్సాఫీస్ కలెక్షన్లు భారీగా పడిపోయాయి. గత గురువారం (డిసెంబర్ 21) రిలీజైన ఈ సినిమా.. ఆరో రోజైన మంగళవారం (డిసెంబర్ 26) కేవలం రూ.7 కోట్లు మాత్రమే వసూలు చేసినట్లు Sacnilk.com అంచనా వేసింది. మూవీ రిలీజైన తర్వాత ఒక రోజు అతి తక్కువ కలెక్షన్లు ఇవే.

డంకీ మూవీ తొలి రోజులు కలిపి ఇండియాలో రూ.137.45 కోట్ల నెట్ కలెక్షన్లు మాత్రమే సాధించింది. ఓవైపు సలార్ ఇప్పటికే రూ.255 కోట్ల కలెక్షన్లతో దూసుకెళ్తుండగా.. డంకీ మాత్రం డల్లయిపోయింది. ఈ ఏడాది రెండు వెయ్యి కోట్ల సినిమాలు అందించిన షారుక్ ఖాన్.. హ్యాట్రిక్ సాధించడం ఖాయమన్న భారీ అంచనాల మధ్య ఈ మూవీ రిలీజైనా.. అంచనాలను ఏమాత్రం అందుకోలేకపోయింది.

షారుక్, రాజ్ కుమార్ హిరానీ కాంబినేషన్ మ్యాజిక్ చేయలేకపోయింది. ఓ సాదాసీదా కథతో డంకీ బోల్తా పడింది. డిసెంబర్ 21న ఇండియాలో రూ.29.2 కోట్ల నెట్ కలెక్షన్లతో డంకీ మొదలు పెట్టింది. రెండో రోజు రూ.20.12 కోట్లు, మూడో రోజు రూ.25.61 కోట్లు, నాలుగో రోజు రూ.30.7 కోట్లు, ఐదో రోజు రూ.24.32 కోట్లు వసూలు చేసింది. సోమవారం క్రిస్మస్ తో హాలిడేస్ ముగియడంతో మంగళవారం కలెక్షన్లు పడిపోయాయి.

లండన్ వెళ్లాలన్న నలుగురు స్నేహితుల చుట్టూ తిరిగే కథే ఈ డంకీ. ఇందులో షారుక్ ఖాన్ తోపాటు విక్కీ కౌశల్, తాప్సీ పన్ను నటించారు. అడ్వాన్స్ బుకింగ్స్ సమయంలో సలార్ ను మించిన డంకీ.. రిలీజ్ తర్వాత నెగటివ్ టాక్ తో క్రమంగా పోటీలో వెనుకబడుతూ వచ్చింది. హ్యాట్రిక్ పరాజయాల తర్వాత ప్రభాస్ కు సలార్ రూపంలో ఓ మంచి హిట్ దక్కగా.. రెండు వరుస హిట్ల తర్వాత షారుక్ జోరుకు కాస్త బ్రేక్ పడింది.