Chaurya Patam: లంచ్ టైమ్‌లో పుట్టిన కథ.. ధమాకా డైరెక్టర్ త్రినాధ రావు నక్కిన కామెంట్స్

Chaurya Patam Teaser Launch: రవితేజ కెరీర్‌లో రూ. 100 కోట్ల క్లబ్‌లో చేరిన సినిమాగా రికార్డుకెక్కింది ధమాకా. ఈ సినిమాకు దర్శకత్వం వహించిన డైరెక్టర్ త్రినాధరావు నక్కిన 'చౌర్య పాఠం' సినిమాతో నిర్మాతగా మారారు. నక్కిన నెరేటివ్స్ బ్యానర్‌పై నిఖిల్ గొల్లమారి దర్శకత్వంలో ఇంద్ర రామ్ హీరోగా ఈ సినిమా తెరకకెక్కింది. ఎన్‌వీఎస్ఎస్ సురేష్ సహ నిర్మాతగా ఉన్నారు. క్రైమ్ కామెడీ డ్రామా చిత్రంగా తెరకెక్కిన చౌర్య పాఠం సినిమా టీజర్ తాజాగా విడుదలైంది.

చౌర్యపాఠం టీజర్ లాంచ్ ఈవెంట్‌లో డైరెక్టర్ త్రినాధరావు నక్కిన కామెంట్స్ చేశారు. "న‌క్కిన న‌రేటివ్స్ బ్యానర్ ఈ రోజు ప్రారంభమైయింది. ఈ వేడుకు వచ్చి మమ్మల్ని ఆశీర్వదించిన నిర్మాతలు, దర్శకులు, రచయితలు, స్నేహితులు, మీడియా అందరికీ ధన్యవాదాలు. అందరూ నిర్మాత అంటుంటే వినడానికి చాలా కొత్త ఆనందంగా ఉంది. దీనిని కొనసాగిస్తాను. చౌర్య పాఠం కథ ధమాకా షూటింగ్ సమయంలో నేను, కార్తిక్ లంచ్ సమయంలో మాట్లడుకున్నపుడు పుట్టింది. కార్తిక్ చెప్పిన కథ చాలా నచ్చింది. అప్పుడే ఇంద్రకి రెడీ అవ్వమని చెప్పాను" అని త్రినాధరావు తెలిపారు.

"ఈ సినిమా కోసం ఇంద్ర చాలా ప్యాషన్‌తో వర్క్ చేసాడు. చాలా పరిణితితో నటించాడు. దర్శకుడు నిఖిల్ చాలా కష్టపడ్డాడు. కార్తిక్‌తో‌ కలసి పని చేశాడు. చాలా ప్రతిభగల నటీనటులని ఎంపిక చేశాం. డేవ్ జాండ్ అద్భుతమైన మ్యూజిక్ చేశాడు. పాయల్ తెలుగమ్మాయి. చాలా చక్కగా నటించింది. ఈ సినిమా తర్వాత తను చాలా బిజీ అవుతుంది. ఇందులో పాత్రలు ప్రేక్షకులకు గుర్తుండిపోతాయి. రవితేజ గారితో ఈగల్ లాంటి పెద్ద సినిమా చేస్తున్నప్పటికీ మా మీద అభిమానంతో కార్తిక్ ఈ చిత్రానికి అద్భుతమైన విజువల్స్ ఇచ్చాడు. ఇది చిన్న సినిమాలా ఎక్కడా అనిపించదు" అని డైరెక్టర్ పేర్కొన్నారు.

"కార్తీక్ ఘట్టమనేని, ఆర్ట్ డైరెక్టర్ నాగేంద్ర, డేవ్ జాండ్ ఇలాంటి పెద్ద టెక్నిషియన్స్ పని చేశారు. ఉత్తర సూపర్ ఎడిటర్. ఈ చిత్రంతో హీరో ఇంద్ర, దర్శకుడు నిఖిల్‌కి చాలా మంచి సక్సెస్ రావాలని కోరుకుంటున్నాను. చౌర్య పాఠం టీజర్ అదిరింది. సినిమా కూడా ఇలానే అదిరిపోతుంది. న‌క్కిన న‌రేటివ్స్ ఇప్పుడే పుట్టింది. దానికి ప్రేక్షకులు ఊపిరి, భవిష్యత్‌ని ఇవ్వాలి'' అని ధమాకా డైరెక్టర్ త్రినాధరావు నక్కిన కోరారు.

ఇదిలా ఉంటే సినిమాటోగ్రాఫర్, ఈగల్ మూవీ డైరెక్టర్ కార్తీక్ ఘట్టమనేని చౌర్య పాఠం సినిమాకు ఆసక్తికరమైన కథను అందించారు. నిఖిల్ గొల్లమారి దర్శకత్వం వహించారు. హీరోగా ఇంద్ర రామ్ నటిస్తే.. అతనికి జోడీగా హీరోయిన్‌గా పాయల్ రాధాకృష్ణ చేసింది. రాజీవ్ కనకాల, మస్త్ అలీ కీలక పాత్రల్లో కనిపించనున్నారు. ఇక చౌర్య పాఠం టీజర్ విషయానికొస్తే.. గ్రామంలో దోపిడీకి తన ముఠాను హీరో సిద్ధం చేయడంతో టీజర్ ప్రారంభమవుతుంది.

అతను మిషన్‌లోని 4 ముఖ్యమైన విషయాలను వారికి చెప్పాడు. 1. వారు డాక్యుమెంటరీ ఫిల్మ్ మేకర్స్ అని గ్రామస్తులను నమ్మించేలా చేయాలి. 2. వాకీ-టాకీ లో మాత్రమే మాట్లాడుకోవాలి. 3. కోడ్ భాషలో మాత్రమే వాడాలి. 4. వారి దాచిన ఆయుధాలు వారికి మాత్రమే కనిపించాలి. వారు తమ మిషన్‌ను ఎలా అమలు చేస్తారు అనేది కథ ముఖ్యాంశం. ఇందులో కామెడీ టైమింగ్ చాలా బాగున్నట్లు తెలుస్తోంది. అలాగే మ్యూజిక్, సినిమాటోగ్రఫీ ఆకట్టుకునేవిధంగా ఉంటాయని మేకర్స్ చెబుతున్నారు.