Dil Raju and Sukumar | 18 ఏళ్ల తర్వాత దిల్‌రాజుతో సుకుమార్ సినిమా.. హీరో ఎవరంటే?

క్రియేటివ్ దర్శకుడు సుకుమార్ తొలి చిత్రం ఆర్య. అల్లు అర్జున్ హీరోగా.. దిల్ రాజు నిర్మాతగా వ్యవహరించిన ఈ చిత్రం సూపర్ హిట్టయింది. 2004లో విడుదలైన ఈ సినిమా తర్వాత దిల్ రాజుతో సుకుమార్ మళ్లీ పనిచేయలేదు. తాజాగా వీరిద్దరి కాంబినేషన్‌లో ఓ సినిమా రాబోతుంది. అయితే ఈ చిత్రానికి సుకుమార్ దర్శకుడిగా కాకుండా.. నిర్మాతగా దిల్ రాజుతో కలిసి పనిచేయనున్నారు. ఈ చిత్రంలో దిల్ రాజు సోదరుని కుమారుడు ఆశిష్ రెడ్డి హీరోగా చేయనున్నాడు. తాజాగా ఈ చిత్ర పూజా కార్యక్రమాలు హైదరాబాద్ అన్నపూర్ణ స్టూడియోస్‌లో జరిగాయి. ముఖ్య అతిథిగా కోలీవుడ్ హీరో ధనుష్ హాజరయ్యారు.

ఈ చిత్రానికి సెల్ఫిష్ అనే టైటిల్‌ను పెట్టారు. ధనుష్ ముఖ్య అతిథిగా హాజరై.. చిత్రబృందానికి శుభాకాంక్షలు చెప్పారు. అనిల్ రావిపూడి, శ్రీ రామ్ వేణు, హరీశ్ శంకర్ కూడా ఈ కార్యక్రమానికి అతిథులుగా హాజరై తమ విషెస్‌ను తెలియజేశారు. విశాల్ కాశీ ఈ చిత్రానికి దర్శకత్వం వహించనున్నారు.

ఈ సినిమాను దిల్ రాజు, సుకుమార్ తమ సొంత బ్యానర్లలో నిర్మించనున్నారు. మిక్కీ జే మేయర్ సంగీతాన్ని సమకూర్చనున్నారు. విశాల్ కాశి దర్శకత్వం వహించనున్నారు. ప్రస్తుతానికి పూజాకార్యక్రమంతో ప్రారంభమైన ఈ సినిమాలో నటించే నటీనటులు, సాంకేతిక నిపుణుల నుంచి త్వరలోనే అధికారిక సమాచారాన్ని తెలియజేయనున్నారు.

ఇప్పటికే తొలి చిత్రం రౌడీ బాయ్స్‌లో తన పర్ఫార్మెన్స్‌తో ఆకట్టుకున్నాడు ఆశిష్. ఇది తన నటిస్తోన్న రెండో చిత్రం. యూత్‌ఫుల్ ఎంటర్టైనర్‌గా తెరకెక్కిన ఈ చిత్రం అనుకున్న స్థాయిలో ఆకట్టుకోనప్పటికీ ఆశీష్ రెడ్డి నటనకు మంచి మార్కులు పడ్డాయి. జనవరిలో విడుదలైన ఈ చిత్రంలో అనుపమ పరమేశ్వరన్ హీరోయిన్‌గా చేసింది. త్వరలో సెల్ఫిష్ చిత్రంతో ముందుకు రానున్నారు.