Deepika New Home: రూ.100 కోట్లు పెట్టి కొత్త ఇల్లు కొన్న కల్కి హీరోయిన్.. తన తొలి హీరో ఇంటి పక్కనే..

Deepika New Home: కల్కి 2898 ఏడీ మూవీతో తెలుగు ప్రేక్షకులకు కూడా దగ్గరైన హీరోయిన్ దీపికా పదుకోన్. త్వరలోనే ఓ బిడ్డకు జన్మనివ్వబోతున్న ఆమె.. ముంబైలో ఓ లగ్జరీ అపార్ట్‌మెంట్ కొనుగోలు చేసింది. దీని విలువ ఏకంగా రూ.100 కోట్లు కావడం విశేషం. ముంబైలోని అత్యంత ఖరీదైన ప్రాంతాల్లో ఒకటైన బాంద్రాలో ఉన్న ఈ ఇంటి నిర్మాణం దాదాపు పూర్తి కావస్తోంది.

దీపికా పదుకోన్ లగ్జరీ ఇల్లు

బాలీవుడ్ నటి దీపికా పదుకోన్, ఆమె భర్త రణ్‌వీర్ సింగ్ కలిసి ఈ ఇంటిని కొనుగోలు చేశారు. అయితే ఈ ఇల్లు బాంద్రాలో బాలీవుడ్ కింగ్ షారుక్ ఖాన్ ఇల్లు మన్నత్ పక్కనే కావడం విశేషం.

ఈ కింగ్ ఖాన్ తో కలిసి ఓం శాంతి ఓం మూవీ ద్వారానే దీపిక సినిమా ఇండస్ట్రీలోకి అడుగు పెట్టిన విషయం తెలిసిందే. ఈ మధ్యే కల్కి 2898 ఏడీ మూవీ ద్వారా తొలిసారి తెలుగు సినిమాలో నటించింది. దీపిక కొత్త ఇంటి గురించి మనీ కంట్రోల్ తన రిపోర్టులో ఆసక్తికర విషయాలు వెల్లడించింది.

దీపిక కొత్త ఇల్లు ఇలా..

ఆ రిపోర్టు ప్రకారం దీపిక, రణ్‌వీర్ అపార్ట్‌మెంట్ ముంబైలోని బాంద్రా బ్యాండ్‌స్టాండ్ లో ఉంది. సముద్రానికి అభిముఖంగా ఉన్న క్వాడ్రాప్లెక్స్ అపార్ట్‌మెంట్ ఇది. ఏకంగా 11266 చదరపు అడుగుల విస్తీర్ణంలో ఉన్న ఈ అపార్ట్‌మెంట్ ఆ బిల్డింగ్ లోని 16 నుంచి 19వ అంతస్తు వరకు ఉండటం విశేషం.

దీని విలువ సుమారు రూ.100 కోట్లు అని ఆ రిపోర్టు వెల్లడించింది. మూడేళ్ల కిందట అలీబాగ్ లోనూ ఈ జంట రూ.22 కోట్లతో ఓ బంగ్లా తీసుకుంది.

దీపిక, రణ్‌వీర్ రిలేషన్‌షిప్ ఇలా..

దీపిక, రణ్‌వీర సింగ్ కలిసి 2013లో వచ్చిన రామ్‌లీలా మూవీలో తొలిసారి నటించారు. ఆ మూవీ సెట్స్ లోనే వీళ్లు ప్రేమలో పడ్డారు. ఐదేళ్ల పాటు డేటింగ్ చేసిన జంట.. 2018లో పెళ్లి చేసుకుంది. ఇక ఈ ఏడాది మొదట్లోనే దీపిక తన తొలి ప్రెగ్నెన్సీని అనౌన్స్ చేసింది. సెప్టెంబర్ లోనే ఆమె తొలి సంతానానికి వెల్‌కమ్ చెప్పనుంది. ఈ ఇద్దరూ రామ్‌లీలాతోపాటు బాజీరావ్ మస్తానీ, పద్మావత్, ఫైండింగ్ ఫ్యానీ, 83, సర్కస్ లాంటి సినిమాల్లో నటించారు.

ఇక నవంబర్ 1న రిలీజ్ కానున్న సింగం అగైన్ మూవీలోనూ వీళ్లు కలిసి నటించారు. ఈ మూవీలో అజయ్ దేవగన్, అక్షయ్ కుమార్, కరీనా కపూర్, టైగర్ ష్రాఫ్, జాకీ ష్రాఫ్ లాంటి వాళ్లు నటించారు. ఇక దీపిక కల్కి 2898 ఏడీ మూవీ సీక్వెల్లోనూ నటించనుంది. తొలి బిడ్డకు జన్మనిచ్చిన తర్వాత ఆమె మళ్లీ ఈ సినిమా షూటింగ్ ప్రారంభించే అవకాశాలు ఉన్నాయి.