Bigg Boss OTT 2: కొంప ముంచిన సిగరెట్ ఫొటో.. సల్మాన్ ఖాన్ సంచలన నిర్ణయం!

Bigg Boss OTT 2: హిందీ బిగ్ బాస్ షో సూపర్ డూపర్ హిట్ కావడానికి ప్రధాన కారణం ఆ షో హోస్ట్ గా వ్యవహరించిన సల్మాన్ ఖానే. అయితే ఈ బాలీవుడ్ సూపర్ స్టార్ ఇప్పుడా షో నుంచి తప్పుకోవాలని నిర్ణయించినట్లు తెలుస్తోంది. ఈ మధ్యే బిగ్ బాస్ సెట్లో సల్లూ భాయ్ సిగరెట్ కాలుస్తున్న ఫొటో ఒకటి సోషల్ మీడియాలో వైరల్ గా మారింది.

దీనిపై అతన్ని దారుణంగా ట్రోల్ చేశారు. దీంతో ఈ బిగ్ బాస్ షో మళ్లీ చేయకూడదని సల్మాన్ అనుకుంటున్నట్లు సమాచారం. ఈ వీకెండ్ లో జరిగిన రెండు ఎపిసోడ్లకు సల్మాన్ రాలేదు. కృష్ణ అభిషేక్, భారతీ సింగ్ ఈ రెండు ఎపిసోడ్లు హోస్ట్ చేశారు. బిగ్ బాస్ కంటెస్టెంట్లతోపాటు ప్రేక్షకులకు కూడా సల్మాన్ ఎందుకు రాలేదో అర్థం కాలేదు. అయితే ఇక ఈ షోకు తిరిగి రాకూడదని అతడు నిర్ణయించినట్లు తెలుస్తోంది.

చాలా ఏళ్లుగా ఈ బిగ్ బాస్ షోకు సల్మాన్ హోస్ట్ గా వ్యవహరిస్తున్నాడు. ఈ మధ్యే మొదలైన బిగ్ బాస్ ఓటీటీ 2 షోను కూడా అతడే హోస్ట్ చేస్తున్నాడు. అయితే ఈ మధ్య సల్మాన్ సెట్ లో సిగరెట్ కాలుస్తున్న ఫొటో పొరపాటున బయటకు వచ్చింది. ఇది తనతో చేసుకున్న ఒప్పందానికి విరుద్ధమని భావించిన సల్మాన్.. ఇక షో చేయకూడదని భావిస్తున్నట్లు సోషల్ మీడియాతోపాటు పలు న్యూస్ వెబ్‌సైట్లు వార్తలు ప్రచురిస్తున్నాయి.

పది సీజన్లుగా బిగ్ బాస్ షోను సల్మాన్ హోస్ట్ చేస్తున్నాడు. ఒక్కో ఎపిసోడ్ కు అతడు భారీ మొత్తం వసూలు చేస్తాడు. అయితే గత వారం వీకెండ్ కా వార్ ఎపిసోడ్ లో హోస్ట్ చేస్తున్న సల్మాన్.. చేతిలో సిగరెట్ తో కనిపించాడు. ఈ ఫొటో పొరపాటున బయటకు వచ్చినా.. దీనికి బాధ్యులైన వారిని ఇప్పటికే షో నుంచి తప్పించారు. అయితే సల్మాన్ బిగ్ బాస్ నుంచి పూర్తిగా తప్పుకోలేదని, త్వరలో టీవీలో రాబోతున్న బిగ్ బాస్ 17 షోను అతడే హోస్ట్ చేస్తాడని సోషల్ మీడియాలో మరో వర్గం వాదిస్తోంది.