Hollywood: హాలీవుడ్‍లో అతిపెద్ద బాక్సాఫీస్ క్లాష్‍కు ఏడాది: ఈ రెండు సినిమాలు ఏ ఓటీటీలో ఉన్నాయంటే.. తెలుగులోనూ..

ఒకే ఇండస్ట్రీ నుంచి రెండు భారీ బడ్జెట్ సినిమాలు ఒకే రోజు రిలీజ్ కావడం చాలా అరుదుగా జరుగుతుంది. బాక్సాఫీస్ వద్ద పోటీ పడేందుకు మేకర్స్ ఆలోచిస్తారు. అయితే, గతేడాది 2023లో హాలీవుడ్‍లో అతిపెద్ద బాక్సాఫీస్ క్లాష్ జరిగింది. దిగ్గజ డైరెక్టర్ క్రిస్టఫర్ నోలాన్ దర్శకత్వం వహించిన ఓపెన్‍హైమర్, ఫుల్ క్రేజ్ దక్కించుకున్న బార్బీ ఒకే రోజు జూలై 21న రిలీజ్ కావడం అప్పట్లో పెద్ద సెన్సేషన్. ఈ పోటీకి బార్బెన్‍హైమర్ అనే పేరు కూడా వచ్చేసింది. హాలీవుడ్‍లో ఈ అతిపెద్ద బాక్సాఫీస్ యుద్ధానికి నేటితో (జూలై 21) ఏడాది నిండింది.

రెండు బంపర్ హిట్లు.. కలెక్షన్ల వర్షం

ఒకే రోజు రిలీజైనా ఓపెన్‍హైమర్, బార్బీ సినిమాలు బ్లాక్‍బస్టర్ అయ్యాయి. బాక్సాఫీస్ వద్ద పోటీ పడినా.. రెండు చిత్రాలకు వసూళ్ల వర్షం కురిసింది. బార్బీ చిత్రం అంచనాలకు మించి కలెక్షన్లను రాబట్టింది. ఓపెన్‍హైమర్‌ను మించి దుమ్మురేపంది. బార్బీ సినిమా ప్రపంచవ్యాప్తంగా సుమారు 1.4 బిలియన్ డాలర్లు (సుమారు రూ.11వేల కోట్లు) దక్కించుకొని బ్లాక్‍బస్టర్ అయింది. ఓపెన్‍హైమర్ చిత్రం 976 మిలియన్ డాలర్లు (సుమారు రూ.8వేల కోట్లు) కలెక్షన్లు దక్కించుకుంది. ఈ రెండు సినిమాలు కూడా విన్నర్లుగా నిలిచాయి. కరోనా తర్వాత సందిగ్ధంలో పడిన హాలీవుడ్‍కు ఊపిరి ఊదాయి. ఈ చిత్రాలు ఇప్పుడు ఓటీటీలో అందుబాటులో ఉన్నాయి. తెలుగు వెర్షన్ కూడా స్ట్రీమింగ్ అవుతున్నాయి.

ఓపెన్‍హైమర్

ఓపెన్‍హైమర్ చిత్రంలో కిలియన్ మర్ఫీ ప్రధాన పాత్ర పోషించారు. అణుబాంబు సృష్టికర్త జె.రాబర్ట్ ఓపెన్‍హైమర్ జీవితం ఆధారంగా బయోగ్రాఫికల్ థ్రిల్లర్ డ్రామాగా ఈ చిత్రాన్ని దర్శకుడు క్రిస్టఫర్ నోలాన్ తెరకెక్కించారు. ఈ మూవీ అద్భుతంగా ఉందంటూ ప్రశంసలు వచ్చాయి. నోలాన్ ఫిల్మ్ మేకింగ్‍కు మరోసారి అందరూ ఫిదా అయ్యారు. ఓపెన్‍హైమర్ చిత్రానికి ఏకంగా ఏడు ఆస్కార్ అవార్డులు వచ్చాయి. ఉత్తమ దర్శకుడిగా నోలాన్‍కు, ఉత్తమ నటుడిగా కిలియన్ మర్ఫీ సహా మరో ఐదు ఆస్కార్లు ఈ మూవీకి వచ్చాయి.

ఓపెన్‍హైమర్ ఓటీటీ స్ట్రీమింగ్

ఓపెన్‍హైమర్ సినిమా ఇండియాలో జియోసినిమా ఓటీటీ ప్లాట్‍ఫామ్‍లో అందుబాటులో ఉంది. ఇంగ్లిష్‍తో పాటు తెలుగు, తమిళం, కన్నడ, హిందీ భాషల్లో స్ట్రీమింగ్ అవుతోంది. జీ5 ఓటీటీలో అయితే రెంట్‍కు అందుబాటులో ఉంది.

బార్బీ

ఫ్యాంటసీ కామెడీ మూవీ బార్బీ ప్రేక్షకులను విపరీతంగా ఆకట్టుకుంది. గ్రెటా గెర్విగ్ దర్శకత్వం వహించిన ఈ చిత్రంలో మార్గోట్ రాబీ, ర్యాన్ గోస్లింగ్, అమెరికా ఫెరేరా, కేట్ మెక్‍కినోన్, ఇస్సా రయీ ప్రధాన పాత్రలు పోషించారు. ఫ్యాషన్ డాల్స్ బార్బీ థీమ్‍తో వచ్చిన తొలి లైవ్ యాక్షన్ చిత్రం ఇదే. అంతకు ముందు బార్బీపై యానిమేషన్ సినిమాలు, షోలు వచ్చాయి. ఫుల్ హైప్ ఉన్న ఈ బార్బీ మూవీ అంతకు మించి సూపర్ హిట్ అయింది. ప్రపంచవ్యాప్తంగా ప్రేక్షకులను మనసులను గెలుచుకుంది.

బార్బీ ఓటీటీ స్ట్రీమింగ్

బార్బీ సినిమా కూడా జియో సినిమా ఓటీటీ ప్లాట్‍ఫామ్‍లో ఉంది. ఈ చిత్రం ఇంగ్లిష్‍, తెలుగు, హిందీ, తమిళం, కన్నడ భాషల్లో వెర్షన్‍లలో అందుబాటులో ఉంది.