Acharya | ఆచార్యకు పెరిగిన టికెట్ల ధరలు.. రోజుకు ఐదో షోలు

మెగా అభిమానులు ఎప్పుడెప్పుడా అని ఎదురుచూస్తున్న ఆచార్య మూవీకి టైమ్‌ దగ్గర పడింది. మరో నాలుగు రోజుల్లో ఈ సినిమా రిలీజ్‌ కానుంది. ఈ నేపథ్యంలో ప్రతి పెద్ద సినిమాకు అనుమతి ఇస్తున్నట్లే ఈ సినిమాకు కూడా టికెట్ల ధరలు పెంచుకోవడానికి తెలంగాణ ప్రభుత్వం అనుమతి ఇచ్చింది. అంతేకాదు రోజుకు ఐదు షోలు వేసుకునేందుకు కూడా గ్రీన్‌ సిగ్నల్‌ లభించింది.

ఆచార్య మూవీ సింగిల్‌ స్క్రీన్‌లో చూడాలంటే రూ.212, మల్టీప్లెక్స్‌లో చూడాలంటే రూ.354 ఖర్చు పెట్టాల్సిందే. ఇక తొలి వారం రోజులు రోజుకు ఐదు షోలు కూడా వేసుకునే వీలు థియేటర్లకు ఉంది. ఇక నాన్‌ ఏసీ థియేటర్లకు మాత్రం ధరలు అలాగే ఉంటాయి. ఈ ధరలు సినిమా రిలీజైన ఏప్రిల్‌ 29 నుంచి మే 5 వరకూ మాత్రమే అమల్లో ఉంటాయి. అటు ఏపీ ప్రభుత్వం కూడా ఈ సినిమా కోసం టికెట్ల రేట్లు పెంచుకునే వీలు కల్పించే అవకాశాలు ఉన్నాయి.

ఈ సినిమా ప్రమోషన్లలో ఇప్పటికే చిరంజీవి, రామ్‌చరణ్‌, డైరెక్టర్‌ కొరటాల శివ బిజీబిజీగా ఉన్నారు. గత శనివారమే హైదరాబాద్‌లో ఘనంగా ప్రీరిలీజ్‌ ఈవెంట్‌ కూడా నిర్వహించారు. ఈ వేడుకకు దిగ్దర్శకుడు రాజమౌళి చీఫ్‌ గెస్ట్‌గా వచ్చిన విషయం తెలిసిందే. చాలాసార్లు వాయిదా పడిన తర్వాత రిలీజవుతున్న ఈ సినిమాపై భారీ అంచనాలు ఉన్నాయి. మ్యాటినీ ఎంటర్‌టైన్‌మెంట్, కొణిదెల ప్రొడక్షన్‌ సంయుక్తంగా ఈ సినిమాను నిర్మించాయి.