Gautam Gambhir Sreesanth: స్టేడియంలోనే గొడ‌వ ప‌డ్డ శ్రీశాంత్, గంభీర్ - గొడ‌వ‌లు ప‌డ‌టం గంభీర్‌కు అల‌వాటేన‌న్న శ్రీశాంత్

Gautam Gambhir Sreesanth: టీమిండియా మాజీ క్రికెట‌ర్లు గౌత‌మ్ గంభీర్‌, శ్రీశాంత్ స్టేడియంంలోనే గొడ‌వ‌ప‌డ్డారు. ఈ ఇద్ద‌రు మాజీ క్రికెట‌ర్లు ప్ర‌స్తుతం లెజెండ్స్ లీగ్ టోర్నీ ఆడుతోన్నారు. ఇందులో భాగంగా ఇండియా క్యాపిట‌ల్స్‌, గుజ‌రాత్ జెయింట్స్ మ‌ధ్య బుధ‌వారం మ్యాచ్ జ‌రిగింది. శ్రీశాంత్ బౌలింగ్‌లో గౌత‌మ్ గంభీర్ వ‌రుస‌గా సిక్స్‌, ఫోర్ కొట్టడంతో ఇద్ద‌రి మ‌ధ్య గొడ‌వ‌కు కార‌ణ‌మైంది.

ఆ త‌ర్వాత బాల్‌ను శ్రీశాంత్ వైడ్‌గా వేశాడు. దూకుడు మీదున్న గంభీర్ ఆ బాల్‌ను కూడా ఆడ‌టానికి ప్ర‌యత్నించాడు. కానీ ర‌న్ కూడా రాక‌పోవ‌డంతో ఆవేశంతో గంభీర్‌ నోరుజారాడు. అత‌డు అన్న మాట‌కు శ్రీశాంత్ కూడా కోపంగా క‌నిపించాడు. ధీటుగా గంభీర్‌కు బ‌దులిచ్చాడు. దాంతో శ్రీశాంత్‌పైకి గంభీర్ బ్యాట్ ప‌ట్టుకొని రావ‌డం ఈ వీడియోలో క‌నిపించింది. అంపైర్స్‌తో పాటు మిగిలిన క్రికెట‌ర్లు గంభీర్‌, శ్రీశాంత్‌ల‌కు స‌ర్ధిచెప్పి గొడ‌వ‌ను ఆపేశారు.

మ్యాచ్ ముగిసిన అనంత‌రం ఈ గొడ‌వ‌పై సోష‌ల్ మీడియాలో పోస్ట్ చేసిన ఓ వీడియో ద్వారా శ్రీశాంత్ క్లారిటీ ఇచ్చాడు. గంభీర్‌పై ప‌లు ఆరోప‌ణ‌లు చేశాడు. కార‌ణం లేకుండానే త‌న స‌హ‌చ‌ర క్రికెట‌ర్ల‌తో గంభీర్ ఎప్పుడు గొడ‌వ‌లు ప‌డుతుంటాడ‌ని, సీనియ‌ర్ల‌ను గౌర‌వించ‌డ‌ని శ్రీశాంత్ అన్నాడు. గొడ‌వ‌లో త‌న త‌ప్పేం లేద‌ని గంభీర్ వ‌ల్లే ఇదంతా జ‌రిగింద‌ని తెలిపాడు.

గంభీర్ త‌న‌తో అమ‌ర్యాద‌క‌రంగా ప్ర‌వ‌ర్తించాడ‌ని, ప‌దే ప‌దే అన‌కూడ‌డ‌ని మాట‌ల‌తో కించ‌ప‌రిచాడ‌ని శ్రీశాంత్ చెప్పాడు. గంభీర్ త‌న‌ను ఏమ‌ని అవ‌మానించాడో త్వ‌ర‌లోఅంద‌రికి తెలియ‌జేస్తాన‌ని, శ్రీశాంత్ అన్నాడు. క్రికెట్ మైదానంలో అలాంటి మాట‌లు ఆమోద‌యోగ్యం కాద‌ని శ్రీశాంత్ చెప్పాడు. ఈ గొడ‌వలో కొంద‌రు త‌న‌ను త‌ప్పుప‌డుతున్నార‌ని, వారికి క్లారిటీ ఇవ్వాల‌నే ఈ వీడియో పోస్ట్ చేశాన‌ని శ్రీశాంత్ అన్నాడు. ఈ వీడియోలో గంభీర్‌ను మిస్ట‌ర్ ఫైట‌ర్ అంటూ శ్రీశాంత్ పేర్కొన‌డం హాట్‌టాపిక్‌గా మారింది. ఈ గొడ‌వ‌పై శ్రీశాంత్ చేసిన కామెంట్స్ వైర‌ల్ అవుతోన్నాయి.