Ola Electric: నవంబర్ లో కూడా ఓలా ఎలక్ట్రిక్ స్కూటర్లపై కొనసాగనున్న డిస్కౌంట్స్

ఓలా ఎలక్ట్రిక్ "బాస్ ఆఫ్ ఆల్ సేవింగ్స్" ఆఫర్ ను పొడిగిస్తున్నట్లు గురువారం ప్రకటించింది. ఈ ఆఫర్ ద్వారా ఓలా ఎస్ 1 ఎలక్ట్రిక్ స్కూటర్ శ్రేణిపై డిస్కౌంట్లను కొనసాగిస్తామని వెల్లడించింది. కంపెనీ చేపట్టిన బిగ్గెస్ట్ ఓలా సీజన్ సేల్ (boss) ప్రచారంలో భాగంగా ఈ విషయాన్ని వెల్లడించింది. వినియోగదారులు ఇప్పుడు ఓలా ఎస్ 1 కొనుగోలుపై రూ .15,000 వరకు డిస్కౌంట్ పొందవచ్చు, సాంప్రదాయ పెట్రోల్ ఆధారిత స్కూటర్లతో పోలిస్తే తక్కువ రన్నింగ్, మెయింటెనెన్స్ ఖర్చుల కారణంగా ఈ ఎలక్ట్రిక్ స్కూటర్ తో ఏడాదికి రూ .30,000 వరకు ఆదా అయ్యే అవకాశం ఉంది.

ఖర్చు తక్కువ

ఓలా ఎస్ 1 ఎక్స్ (2 కిలోవాట్) పై రోజుకు సగటున 30 కిలోమీటర్ల దూరం ప్రయాణించేవారు సంవత్సరానికి రూ .31,000 వరకు ఆదా చేయవచ్చని ఓలా ఎలక్ట్రిక్ (ola electric) చెబుతోంది. ఈ అంచనా ప్రకారం, వాహనం కొన్న కొన్ని సంవత్సరాల లోపే వినియోగదారులు వాహనం కొనుగోలు ఖర్చును తిరిగి పొందవచ్చని వివరించింది. ఓలా ఎలక్ట్రిక్ ఎస్1 పోర్ట్ ఫోలియోలో ఆరు మోడళ్లు ఉన్నాయి. ప్రీమియం ఎస్1 ప్రో, ఎస్1 ఎయిర్ ధరలు వరుసగా రూ.1,34,999, రూ.1,07,499గా ఉన్నాయి. 2 కిలోవాట్, 3 కిలోవాట్, 4 కిలోవాట్ల వేరియంట్లలో లభించే మాస్ మార్కెట్ ఎస్ 1 ఎక్స్ శ్రేణి ధర వరుసగా రూ.74,999, రూ.87,999, రూ.1,01,999గా ఉంది

ఓలా ఎలక్ట్రిక్: ఇటీవలి పరిణామాలు

2024 సెప్టెంబర్లో ఓలా ఎలక్ట్రిక్ 23,965 ఎలక్ట్రిక్ స్కూటర్ల అత్యల్ప నెలవారీ అమ్మకాలను నమోదు చేసింది. తీవ్రమైన పోటీ, ఆఫ్టర్-సేల్స్ సర్వీస్ గురించి పెరుగుతున్న వినియోగదారుల ఫిర్యాదుల కారణంగా అమ్మకాల్లో తగ్గుదల నమోదైంది. దాంతో, కంపెనీ షేరు ధరలు గరిష్ట స్థాయి నుండి దాదాపు 35 శాతం పడిపోయాయి. మార్కెట్ వాటా అంతకుముందు సంవత్సరం ఇదే నెలలో 47 శాతం ఉండగా, అక్కడి నుంచి 27 శాతానికి పడిపోయింది.

ఎర్నెస్ట్ అండ్ యంగ్ సూచనలతో..

దాంతో గ్లోబల్ కన్సల్టింగ్ సంస్థ ఎర్నెస్ట్ అండ్ యంగ్ (ఇవై) సేవలను పొంది కొత్త స్ట్రాటెజీతో అక్టోబర్ లో వినియోగదారుల ముందుకు వచ్చింది. అదే నెలలో రూ .25,000 వరకు కొత్త పండుగ డిస్కౌంట్లను ప్రవేశపెట్టింది. దాంతో, ఓలా ఎలక్ట్రిక్ అమ్మకాలు పుంజుకున్నాయి. అక్టోబర్ నెలలో 50,000 యూనిట్లకు పైగా విక్రయాలు జరిగాయి. ఎలక్ట్రిక్ ద్విచక్ర వాహన విభాగంలో 30 శాతం మార్కెట్ వాటాతో కంపెనీ తన నంబర్ వన్ స్థానాన్ని నిలుపుకుంది. అక్టోబర్లో రిజిస్ట్రేషన్లు 74 శాతం పెరిగాయి, సెప్టెంబర్ 2024 నుండి నెలవారీ అమ్మకాలు 100 శాతానికి పైగా పెరిగాయి.