Honda electric moped : హోండా ఎలక్ట్రిక్​ 'మోపెడ్'​ వచ్చేస్తోంది!

Honda electric moped : మోటర్​ సైకిల్​ టెక్నాలజీలో హోండా.. దిగ్గజ సంస్థగా ఎదిగింది. కానీ ఎలక్ట్రిక్​ సెగ్మెంట్​లో మాత్రం వేగంగా అడుగులు వేయలేకపోయింది. ఇక ఇప్పుడు.. ఎలక్ట్రిక్​ సెగ్మెంట్​లో ఉన్న అవకాశాలను గ్రహించిన హోండా.. స్పీడ్​ పెంచింది. ఈ క్రమంలోనే మోటర్​ సైకిళ్లకు ఎలక్ట్రిక్​ వర్షెన్​ను ఇచ్చేందుకు సన్నద్ధమైంది. ఇప్పటి నుంచి 2025 వరకు 10కిపైగా కొత్త ఎలక్ట్రిక్​ మోడల్స్​ను లాంచ్​ చేసేందుకు ప్రణాళికలు రచించింది.

ఈ 10 కొత్త ఎలక్ట్రిక్​ హోండాలు స్కూటర్లు, మోపెడ్​లు, ఎలక్ట్రికల్లీ అసిస్టెడ్​ బైసైకిళ్ల మోడల్స్​లో ఉండనున్నాయి. అయితే.. ఎలక్ట్రిక్​ సెగ్మెంట్​లో.. స్పీడ్​ కన్నా సేల్స్​ సంఖ్యపై హోండా ఎక్కువ దృష్టిపెట్టినట్టు తెలుస్తోంది.

Honda electric moped news : కాగా.. హోండా ఎలక్ట్రిక్​ మోపెడ్​ డిజైన్​కు సంబంధించిన ఫైలింగ్​ ఒకటి యూరోప్​లో వెలుగులోకి వచ్చింది. 50సీసీ ఉండే హోండా మెలోడీని ఈ డిజైన్​ పోలి ఉంది. కాగా.. ఇందులో పెడల్స్​ను ఎక్స్​ట్రాగా పెట్టారు. కొండ ప్రాంతాల్లో ఎలక్ట్రిక్​ పవర్​ సరిపోకపోతే.. పెడల్స్​ని కూడా ఉపయోగించుకునే విధంగా రూపొందించింది హోండా.

హోండాకు మోపెడ్​ సెగ్మెంట్​లో పీఏ50 హాబిట్​, పుచ్​ మ్యాక్సీ వంటి మోడల్స్​ ఇప్పటికే మార్కెట్​లో ఉన్నాయి. ఇక ఇప్పుడు.. హోండా ఎలక్ట్రిక్​ మోపెడ్​ను తీసుకొచ్చేందుకు సిద్ధపడింది.

Honda electric moped design : వాస్తవానికి.. పెడల్స్​తో కూడిన మోపెడ్​లు మార్కెట్​లో పెద్దగా కనిపించడం లేదు. అయితే.. వీటికి ఎలక్ట్రిక్​ వర్షెన్​ను జత చేస్తే.. మార్కెట్​లో ఎగ్జైట్​మెంట్​ ఉంటుందని హోండా భావిస్తున్నట్టు తెలుస్తోంది. అయితే.. డిజైన్​ని చూస్తే.. ప్రతిసారీ పెడల్స్​ను వినియోగించాల్సిన అవసరం లేదని స్పష్టమవుతోంది. ఫుట్​బోర్డ్​ మీద కాళ్లు పెట్టుకోవచ్చు. ఎలక్ట్రిక్​ మోపెడ్​లో అవసరమైతేనే పెడల్స్​ని వాడుకోవాల్సి ఉంటుంది! హబ్​ మౌంటెడ్​ మోటార్​ డిజైన్​లో ఈ కొత్త మోపెడ్​ ఉన్నట్టు డిజైన్​ ద్వారా కనిపిస్తోంది.

వేగం ఎంత ఉంటుందో..!

యూరోప్​లో పెడల్స్​తో కూడిన బైసైకిళ్లు 15.5ఎంపీహెచ్​ వేగంతో మాత్రమే వెళతాయి. వీటికి రిజిస్ట్రేషన్​, డ్రైవింగ్​ లైసెన్స్​, ఇన్ష్యూరెన్స్​ వంటివి అవసరం లేదు. అయితే.. హోండా మాత్రం ఎలక్ట్రిక్​ మోపెడ్​ ప్రదర్శనపై మరింత దృష్టిసారించినట్టు, వేగాన్ని పెంచేందుకు ప్రయత్నిస్తున్నట్టు వార్తలు వచ్చాయి.

ప్రస్తుతానికి ఇది యూరోప్​లో లాంచ్​ అయ్యే​ అవకాశం ఉంది. యూరోప్​ నిబంధనల ప్రకారం.. 28ఎంపీహెచ్​ వేగం దాటితే.. మోప్​డలకు రిజిస్ట్రేషన్​ చేయించాల్సి ఉంటుంది. డ్రైవర్​కు లైసెన్స్​ ఉండాలి. మరి దీని వేగం ఎంత ఉంటుందనేది రానున్న కాలంలో హోండా నుంచి స్పష్టత రావాల్సింది. అయితే.. డిజైన్​లో నెంబర్​ ప్లేట్​ కోసం ఖాళీ ఉండటం గమనార్హం.

10 ఎలక్ట్రిక్​ బైక్స్​లో ఒకదానిని ఈ ఏడాది చివర్లో హోండా ఆవిష్కరించే అవకాశం ఉన్నట్టు తెలుస్తోంది.