Elon Musk India visit : ఎలాన్ మస్క్ భారత్ పర్యటన వాయిదా.. కారణం ఇదే..
20 April 2024, 11:22 IST
Elon Musk India : ఎలక్ట్రిక్ వాహనాల దిగ్గజం టెస్లా సీఈఓ ఎలాన్ మస్క్ భారత పర్యటనను తాత్కాలికంగా నిలిపివేశారు. ఈ విషయాన్ని ఆయనే స్వయంగా వెల్లడించారు.
టెస్లా సీఈఓ ఎలాన్ మస్క్..
Elon Musk India visit : దిగ్గజ ఎలక్ట్రిక్ వాహనాల తయారీ సంస్థ టెస్లాని ఇండియాలోకి తీసుకొచ్చేందుకు శరవేగంగా జరుగుతున్న ఏర్పాట్లలో భారీ కుదుపు! ఇండియా ట్రిప్ను తాత్కాలికంగా వాయిదా వేసుకున్నారు.. టెస్లా సీఈఓ ఎలాన్ మస్క. ఇందుకు గల కారణాన్ని కూడా వెల్లడించారు.
'ఇండియాకు రాలేకపోతున్నా..'
"దురదృష్టవశాత్తు, టెస్లాకు సంబంధించిన భారీ బాధ్యతల కారణంగా భారత దేశ పర్యటన ఆలస్యం అవుతోంది. కానీ ఈ సంవత్సరం చివరిలోపు ఇండియాను సందర్శించడానికి నేను చాలా ఆసక్తిగా ఎదురుచూస్తున్నాను" అని మస్క్.. ఏప్రిల్ 20న ప్రముఖ సోషల్ మీడియా ప్లాట్ఫామ్ ఎక్స్ (ట్విట్టర్)లో ఒక పోస్ట్ పెట్టారు.
భారతదేశంలో ప్రధాని నరేంద్ర మోదీని కలవడానికి ఎదురుచూస్తున్నానని ఇదే ఎక్స్ ప్లాట్ఫామ్ వేదికగా.. కొన్ని రోజుల క్రితమే (ఏప్రిల్ 10, 2024) ఎలాన్ మస్క్ తెలిపారు. ఫలితంగా.. టెస్లా చుట్టూ హైప్ మరింత పెరిగింది. ఈ నెల 22న.. ఎలాన్ మస్క్, భారత ప్రధానమంత్రి నరేంద్ర మోదీని కలవాల్సి ఉందని పలు నివేదికలు వెల్లడించాయి.
Tesla in India : ఎలాన్ మస్క్, ప్రధాని మోదీ చివరిసారిగా.. గతేడాది జూన్లో న్యూయార్క్లో కలుసుకున్నారు. భారత దేశంలో ఎలక్ట్రిక్ వాహనాల దిగుమతిపై ఉన్న పన్నులను తగ్గించాలని.. ప్రభుత్వాన్ని అడుగుతూనే ఉంది టెస్లా.
ఇదీ చూడండి:- Google Maps: ఎలక్ట్రిక్ వాహన దారులకు గుడ్ న్యూస్; త్వరలో గూగుల్ మ్యాప్స్ లో ఈవీ ఛార్జింగ్ స్టేషన్లు
హిందూ బిజినెస్లైన్ నివేదిక ప్రకారం.. టెస్లా భారతదేశంలో ఈవీ యూనిట్ని స్థాపించడానికి స్థానిక భాగస్వామి కోసం అన్వేషిస్తోంది. ముకేశ్ అంబానీకి చెందిన రిలయన్స్ ఇండస్ట్రీస్ (ఆర్ఐఎల్)తో కలిసి దేశంలో ఎలక్ట్రిక్ వాహనాల సౌకర్యాన్ని ఏర్పాటు చేయడానికి టెస్లా చర్చలు జరుపుతోందని విశ్వసనీయ వర్గాలు చెప్పుకొచ్చాయి.
Elon Musk Tesla India Visit : ప్రతిపాదిత 2 బిలియన్ డాలర్ల నుంచి 3 బిలియన్ డాలర్ల ఎలక్ట్రిక్ కార్ల ప్లాంట్ కోసం స్థలాలను అన్వేషించడానికి ఎలాన్ మస్క్ ఈ నెలలో భారతదేశానికి ఒక బృందాన్ని పంపినట్లు ఫైనాన్షియల్ టైమ్స్ పేర్కొంది.
మస్క్ భారత మార్కెట్లోకి దాదాపు 3 బిలియన్ డాలర్లను ఇన్వెస్ట్ చేసే ప్రణాళికలను వెల్లడించడానికి సిద్ధంగా ఉన్నారని, ప్రధానంగా కొత్త తయారీ కేంద్రం ఏర్పాటుకు భారీగా డబ్బును కేటాయిస్తున్నారని సమాచారం.
టెస్లాను ఆకట్టుకునేందుకు దేశంలోని చాలా రాష్ట్రాలు ప్రయత్నిస్తున్నాయి. తెలంగాణ, మహారాష్ట్ర, తమిళనాడు, గుజరాత్ రాష్ట్రాలు.. ఈ రేసులో ముందు వరుసలో ఉన్నాయి. కానీ ఇప్పటివరకైతే.. ఎలాంటి డీల్ ఫిక్స్ అవ్వలేదని తెలుస్తోంది.
Elon Musk latest news : మరి.. ఎలాన్ మస్క్ భారత్ పర్యటన వాయిదా పడటంతో.. ఆ ఎఫెక్ట్, ఇండియాలో టెస్లా ఏర్పాటుపై ఏ మేరకు ప్రభావం చూపుతుందో చూడాలి. ఏదేమైనా.. ఇండియాలో టెస్లా వ్యవహారం.. గత కొన్నేళ్లుగా వార్తల్లో నిలుస్తోంది. టెస్లా వాహనాలు ఎప్పుడెప్పుడు ఇండియా రోడ్లపై తిరుగుతాయా అని చాలా మంది ఎదురుచూస్తున్నారు. మరి ఈ నిరీక్షణ.. ఇంకెంత కాలం కొనసాగుతుందో చూడాలి.