New districts in AP | రాష్ట్రంలో 26 జిల్లాలు.. 'ఎన్​టీఆర్​'గా విజయవాడ

AP districts notification | ఆంధ్రప్రదేశ్​లో 26 జిల్లాలను ఏర్పాటు చేసింది ముఖ్యమంత్రి వైఎస్​ జగన్​ ప్రభుత్వం. 13 జిల్లాలను 26 జిల్లాలుగా మారుస్తూ.. సంబంధిత ప్రతిపాదనతో కూడిన గెజిట్​ నోటిఫికేషన్​ను బుధవారం​ జారీ చేసింది. ఎవైనా అభ్యంతరాలు ఉంటే.. 30 రోజుల్లోగా ప్రభుత్వానికి చెప్పాలని స్పష్టం చేసింది. 

గెజిట్​ నోటిఫికేషన్​ ప్రకారం రాష్ట్రంలోని జిల్లాలు, వాటి ప్రధాన కార్యాలయాలు ఇవే..

శ్రీకాకుళం, విజయనగరం, మన్యం(పార్వతీపూరం), అల్లూరి సీతారామ రాజు(పాడేరు), విశాఖపట్నం, అనకాపల్లి, కాకినాడ, కోనసీమ(అమలాపురం), తూర్పు గోదావరి(రాజమహేంద్రవరం), పశ్చిమ గోదావరి(భీమవరం), ఏలూరు, కృష్ణ(మచిలీపట్నం), ఎన్​టీఆర్​(విజయవాడ), గుంటూరు, బాపట్ల, పల్నాడు(నర్సారావుపేట), ప్రకాశం(ఓంగోలు), ఎస్​పీఎస్​ నెల్లూరు(నెల్లూరు), కర్నూల్​, నంద్యాల, అనంతపురం, శ్రీ సత్యసాయి(పుట్టపర్తి), వైఎస్​ఆర్​ కడప(కడప), అన్నమయ్య(రాయచోటి), శ్రీ బాలాజీ(తిరుపతి), చిట్టూరు.

పునర్వ్యవస్థీకరణ అనంతరం జనాభా పరంగా కర్నూల్​(23.66 లక్షలు) అగ్రస్థానంలో నిలవనుంది. అల్లూరి సీతారామ రాజు జిల్లా(9.54లక్షలు)లో అత్యల జనాభ నమోదుకానుంది.

ఉగాది నాటికి ఈ ప్రక్రియను పూర్తి చేయాలని ప్రభుత్వం యోచిస్తున్నట్టు సమాచారం.

టీడీపీ విమర్శలు..

రాష్ట్రంలో వైఎస్​ఆర్​సీపీ- టీడీపీ మధ్య రాజకీయ శతృత్వం కొనసాగుతోంది. ఈ తరుణంలో జగన్​ ప్రభుత్వం.. విజయవాడకు ఎన్​టీఆర్​ పేరు పెట్టడం ప్రాధాన్యత సంతరించుకుంది. అయితే పాలనా సౌలభ్యాన్ని మెరుగుపరిచేందుకు, ప్రజలకు మరింత చేరువయ్యేందుకు.. జిల్లాల సంఖ్యను పెంచుతామని 2019 ఎన్నికల సమయంలోనే హామీనిచ్చారు జగన్​. ఆ సమయంలో.. ఎన్​టీఆర్​ జన్మస్థలం నిమ్మకూరులో పర్యటించిన ఆయన.. విజయవాడ జిల్లాకు ఎన్​టీఆర్​ పేరు పెడతామని స్పష్టం చేశారు.

జిల్లాల సంఖ్య పెంచుతూ ప్రభుత్వం తీసుకున్న నిర్ణయంపై టీడీపీ విమర్శలు సంధించింది.

"ఇచ్చిన హామీని నెరవేర్చేందుకు జగన్​కు మూడేళ్ల సమయం పట్టింది. అది కూడా ఎన్​టీఆర్​పై ప్రేమతో చేయలేదు. ప్రజల్లో తనపై నమ్మకం తగ్గుతోందని గ్రహించే జగన్​ ఇప్పుడు ఈ నిర్ణయం తీసుకున్నారు. ఏదిఏమేనా, ఎంత ఆలస్యమైనా, మొత్తానికి విజయవాడ జిల్లాకు ఎన్​టీఆర్​ పేరు పెట్టడం సంతోషకరం," అని టీడీపీ పోలిట్​ బ్యూరో సభ్యుడు వర్ల రామయ్య తెలిపారు.