Samsung Foldable | శాంసంగ్ నుంచి మడిచే ఫోన్లు Galaxy Z Flip4, Fold4 వచ్చేశాయి!

సుదీర్ఘ నిరీక్షణ తర్వాత సౌత్ కొరియా టెక్ దిగ్గజం శాంసంగ్ ఎట్టకేలకు తమ లేటెస్ట్ జెనరేషన్ ఫోల్డబుల్ ఫోన్‌లను విడుదల చేసింది. ఆగష్టు 10, 2022న శాంసంగ్ నిర్వహించిన Galaxy Unpacked ఈవెంట్ 2022లో భాగంగా Samsung Galaxy Z Fold 4 అలాగే Samsung Galaxy Z Flip 4 ఫోన్‌లను విడుదల చేసింది. వీటితో పాటు Galaxy Watch 5 సిరీస్ స్మార్ట్‌వాచ్‌లను, ఇంకా Buds 2 Pro ఇయర్‌బడ్లను కూడా కంపెనీ విడుదల చేసింది. భారత్ సహా ఇతర దేశాల మార్కెట్లలలోనూ ఈ ఫోన్లు అందుబాటులోకి రానున్నాయి.

ఇందులో Samsung Galaxy Z Flip4 ధరను $1,000గా (భారతీయ కరెన్సీలో సుమారు రూ. 79 వేలు) నిర్ణయించగా మరొక మోడల్ Galaxy Z Fold4 ధర $1,780 (రూ. 1.40 లక్షలు)కు లభించనుంది. ఇవి శాంసంగ్ నుంచి వచ్చిన నాల్గవ తరం ఫోల్డబుల్ స్మార్ట్‌ఫోన్‌లు. ఈ రెండు స్మార్ట్‌ఫోన్‌లు హైపర్-ఫాస్ట్ 5Gతో పనిచేస్తాయి. భారత మార్కెట్లో ఈ రెండు ఫోన్లు వచ్చే వారం నుండి ప్రీ-ఆర్డర్‌ల కోసం అందుబాటులో ఉంటాయి. ఎంపిక చేసిన దేశాలలో ఆగస్టు 26 నుంచి వీటి విక్రయాలు ప్రారంభమవుతాయి.

ఫ్లిప్4, ఫోల్డ్ 4.. ఈ రెండు ఫోన్లు అన్నింటికంటే అత్యంత కఠినమైన ఫోల్డబుల్‌ ఫోన్లుగా శాంసంగ్ పేర్కొంది. వీటి కవర్ స్క్రీన్ వెనుక గ్లాస్‌పై ప్రత్యేకమైన కార్నింగ్ గొరిల్లా గ్లాస్ విక్టస్+తో పాటు ఆర్మర్ అల్యూమినియం ఫ్రేమ్‌లు, కవర్‌తో కూడిన కీలు వస్తాయి.

ఈ ఫోన్లలో అండర్ డిస్‌ప్లే కెమెరా, 7.6-అంగుళాల డైనమిక్ AMOLED 2X ఇన్ఫినిటీ ఫ్లెక్స్ డిస్‌ప్లే, స్నాప్‌డ్రాగన్ 8+ Gen 1 చిప్‌ వంటి ప్రీమియం స్పెసిఫికేషన్లు ఉన్నాయి.

Samsung Galaxy Z Flip4 ప్రత్యేకతలు

Samsung Galaxy Z Flip 4 కాంపాక్ట్ క్లామ్‌షెల్ డిజైన్‌తో వస్తుంది. ఇది బ్లూ, బోరా పర్పుల్, గ్రాఫైట్, పింక్ గోల్డ్ అనే నాలుగు కలర్ ఆప్షన్‌లలో అందుబాటులో ఉంటుంది. ఈ ఫోన్ మూడు RAM + స్టోరేజ్ కాన్ఫిగరేషన్‌లను కలిగి ఉంటుంది - 8GB+128GB, 8GB+256GB అలాగే 8GB+512GB. కాన్ఫిగరేషన్ల ఆధారంగా ధరలు ఉండనున్నాయి. ఈ ఫోన్ హ్యాండ్స్-ఫ్రీ వీడియోని షూట్ చేయగలదు. పూర్తి గ్రూప్ సెల్ఫీలను క్యాప్చర్ చేయగల సామర్థ్యంతో వస్తుంది. ఈ ఫ్లెక్సిబిలిటీని ఉపయోగించుకోవడానికి Samsung FlexCamని కూడా ప్రవేశపెట్టింది. ఇందులోని 3,700mAh బ్యాటరీ దాదాపు 30 నిమిషాల్లో 50 శాతం వరకు ఛార్జ్ అవుతుంది.

Samsung Galaxy Z Fold 4 ప్రత్యేకతలు

Samsung Galaxy Z Fold 4 ఫ్లెక్స్ మోడ్‌తో వస్తుంది. ఆండ్రాయిడ్ 12L ఆధారిత పనితీరు కలిగిన మొదటి ఫోన్ ఇదే. మల్టీటాస్కింగ్ కోసం కొత్త టాస్క్‌బార్ మీ PCకి సమానమైన లేఅవుట్‌ను అందిస్తుంది. కాన్ఫిగరేషన్లు పరిశీలిస్తే ఈ ఫోన్ 12GB RAM + 256GB స్టోరేజ్ వేరియంట్, 12GB RAM + 512GB స్టోరేజ్ వేరియంట్ అలాగే టాప్-ఆఫ్-ది-లైన్ 12GB RAM + 1TB స్టోరేజ్ వేరియంట్ లలో లభిస్తుంది. బీజ్, గ్రీన్, ఫాంటమ్ బ్లాక్ కవర్‌లలో అందుబాటులో ఉంటుంది. Samsung.com ప్రత్యేకమైన బర్గండి కలర్ ఆప్షన్ కూడా ఉంది.