Ola Electric: రూ.39,999 లకే ఈ - స్కూటర్; రెండు కొత్త మోడళ్లను విడుదల చేసిన ఓలా ఎలక్ట్రిక్

Ola Electric new e-scooters: ఈ స్కూటర్స్ విభాగంలో మార్కెట్ లీడర్ గా ఉన్న ఓలా (ola) ఎలక్ట్రిక్ కొత్తగా మరో రెండు ఈ స్కూటర్ మోడల్స్ ను మార్కెట్లోకి విడుదల చేసింది. వాటిలో ఒకటి ఓలా గిగ్, మరొకటి ఓలా ఎస్ 1 జెడ్. పోర్టబుల్ హోమ్ ఇన్వర్టర్లుగా పని చేసే కొత్త, రిమూవబుల్ బ్యాటరీ ప్యాక్ లను ఈ కొత్త స్కూటర్ లలో ప్రవేశపెట్టింది. గిగ్, ఎస్ 1 జెడ్ శ్రేణి ఇ-స్కూటర్లు రెండు వేరియంట్లలో లభిస్తాయి. అన్నీ కూడా 1.5 కిలోవాట్ల రిమూవబుల్ బ్యాటరీ ప్యాక్ లతో పనిచేస్తాయి.

ధర రూ .39,999 నుండి ప్రారంభం

ఓలా (ola) గిగ్ ధర రూ .39,999 నుండి ప్రారంభమవుతుంది. వీటి ప్రి బుకింగ్స్ ప్రారంభమయ్యాయి. డెలివరీలు మాత్రం ఏప్రిల్ 2025 లో ప్రారంభమవుతాయి. ఓలా ఎస్ 1 జెడ్ వ్యక్తిగత ఉపయోగం కోసం పట్టణ ప్రయాణికులను లక్ష్యంగా చేసుకుంది. ఓలా గిగ్ ఇ-స్కూటర్, పేరు సూచించినట్లుగా, గిగ్ వర్కర్లను లక్ష్యంగా చేసుకుంది. రిమూవబుల్ బ్యాటరీలు వ్యక్తిగత ఉపయోగాలకు చాలా సౌలభ్యాన్ని అందిస్తాయని ఓలా ఎలక్ట్రిక్ (ola electric) చెబుతోంది. రిమూవ్ చేయడానికి వీలు లేని బ్యాటరీల కంటే రిమూవబుల్ బ్యాటరీలు మరింత సౌకర్యవంతంగా ఉంటాయి. స్థిరమైన బ్యాటరీలతో, వినియోగదారులు పోర్టబుల్ ఛార్జర్ కోసం ఛార్జింగ్ స్టేషన్ లేదా ప్లగ్ పాయింట్ వద్దకు వెళ్లాలి. రిమూవబుల్ బ్యాటరీలను వాహనం నుండి బయటకు తీసి ఇంట్లో లేదా పని వద్ద ఛార్జ్ చేయవచ్చు. ఛార్జింగ్ స్టేషన్లలో, వినియోగదారులు ఛార్జ్ చేసిన దాని కోసం డెడ్ బ్యాటరీని కొన్ని నిమిషాల్లోనే మార్చవచ్చు.

ఓలా పవర్ పాడ్ పోర్టబుల్ హోమ్ ఇన్వర్టర్ గా..

బ్యాటరీ ప్యాక్ లు సీటు కింద అమర్చబడి ఉంటాయి . సులభంగా తీయడానకిి, తిరిగి ఇన్ స్టాల్ చేయడానికి హ్యాండిల్స్ కలిగి ఉంటాయి. ఈ బ్యాటరీలను ఓలా పవర్ పాడ్ లో ప్లగ్ చేయడం ద్వారా పోర్టబుల్ హోమ్ ఇన్వర్టర్లుగా ఉపయోగించవచ్చని ఓలా ఎలక్ట్రిక్ వివరించింది. ఈ ఓలా పవర్ పాడ్ ధర రూ. 9,999. ఈ పవర్పాడ్ 500 వాట్ల వరకు శక్తిని ఉత్పత్తి చేయగలదు. ఇందులో 1.5 కిలోవాట్ల బ్యాటరీ ఉంటుంది. ఇది 3 గంటల పాటు పనిచేస్తుంది. 5 ఎల్ఈడీ బల్బులు, 3 సీలింగ్ ఫ్యాన్లు, 1 టీవీ, 1 మొబైల్ ఫోన్ ఛార్జర్, 1 వైఫై రౌటర్ కు విద్యుత్ ను అందించగలదు. తరచూ విద్యుత్ సరఫరా నిలిచిపోయే సెమీ-అర్బన్, గ్రామీణ ప్రాంతాల్లో పవర్ పాడ్ ఎంతో ఉపయోగకరంగా ఉంటుంది.

ఓలా గిగ్

ఓలా గిగ్ ఇ-స్కూటర్ గిగ్ వర్కర్ల కోసం రూపొందించారు. ఇది విభిన్న స్పెసిఫికేషన్లతో రెండు వేరియంట్లలో లభిస్తుంది. బేస్ వేరియంట్ ప్రారంభ ధర రూ.39,999 కాగా, తక్కువ దూరం ప్రయాణించే వారికి ఇది ఉపయోగపడుతుంది. దీని ఐడీసీ సర్టిఫైడ్ పరిధి 112 కిలోమీటర్లు. ఇది గంటకు 25 కిలోమీటర్ల వేగంతో వెళ్లగలదు. ఇది 250 వాట్ల ఎలక్ట్రిక్ మోటార్, సింగిల్ రిమూవబుల్ 1.5 కిలోవాట్ల బ్యాటరీతో వస్తుంది. గిగ్ ప్లస్ వేరియంట్ ప్రారంభ ధర రూ .49,999. ఇది ఎక్కువ దూరం ప్రయాణించేవారికి లేదా భారీ లగేజీతో వెళ్లే డెలివరీ బాయ్స్ వంటి గిగ్ వర్కర్లకు ఎక్కువగా ఉపయోగపడుతుంది. ఇందులో కూడా 1.5 కిలోవాట్ల మోటారు ఉంటుంది. ఇది 1.5 కిలోవాట్ల సింగిల్ లేదా డ్యూయల్ రిమూవబుల్ బ్యాటరీతో పనిచేస్తుంది. ఇది గంటకు 45 కిలోమీటర్ల వేగంతో దూసుకెళ్తుంది. సింగిల్ బ్యాటరీతో 81 కిలోమీటర్లు లేదా రెండు బ్యాటరీతో 157 కిలోమీటర్ల సింగిల్ ఛార్జ్ పరిధిని అందిస్తుంది. ఈ రెండు మోడళ్లు బి 2 బి కొనుగోళ్లకు లేదా అద్దె యూనిట్లుగా మాత్రమే అందుబాటులో ఉన్నాయి.

ఓలా ఎస్1 జెడ్

ఎస్ 1 జెడ్ శ్రేణితో ఓలా ఎస్ 1 పోర్ట్ ఫోలియో మరింత విస్తరించింది. ఓలా ఎస్ 1 జెడ్ పట్టణ, సెమీ-అర్బన్ ప్రయాణికులను లక్ష్యంగా చేసుకున్న వ్యక్తిగత వినియోగ ఇ-స్కూటర్. ఇది రెండు వేరియంట్లలో లభిస్తుంది. ఇవి ఒకే విధమైన స్పెసిఫికేషన్లను అందిస్తాయి. బేస్ ఎస్ 1 జెడ్ ధర రూ .59,999 (పరిచయం). ఇది 2.9 కిలోవాట్ల హబ్ మోటారును కలిగి ఉంది . సింగిల్ లేదా డ్యూయల్ 1.5 కిలోవాట్ల బ్యాటరీ ప్యాక్ కాన్ఫిగరేషన్లను ఉపయోగిస్తుంది. డ్యూయల్ బ్యాటరీ సెటప్ తో ఎస్ 1 జెడ్ 146 కిలోమీటర్ల ఐడీసీ-సర్టిఫైడ్ పరిధిని అందిస్తుందని కంపెనీ పేర్కొంది. గంటకు 70 కిలోమీటర్ల వేగంతో దూసుకెళ్లే ఈ ఇ-స్కూటర్ 1.8 సెకన్లలో 20 కిలోమీటర్ల వేగాన్ని అందుకుంటుంది. ఎస్ 1 జెడ్ ప్లస్ వేరియంట్ డ్యూయల్-యూసేజ్ ఇ-స్కూటర్, ఇది పట్టణ లేదా సెమీ-అర్బన్ వినియోగదారులు లక్ష్యంగా వ్యక్తిగత మరియు వాణిజ్య ఉపయోగాల కోసం రూపొందింది. దీని ధర రూ .64,999 (పరిచయం) . దీని స్పెసిఫికేషన్లు కూడా బేస్ వేరియంట్ మాదిరిగానే ఉంటాయి. అదే సమయంలో వాణిజ్య కార్యకలాపాల కోసం అదనపు యాక్ససరీలను కలిగి ఉంటుంది.