Fabric Estimator: ఏ డ్రెస్ కుట్టడానికి ఎన్ని మీటర్ల క్లాత్ అవసరం? కుర్తా నుంచి బ్లవుజు దాకా దేనికెంత కావాలంటే

దసరా పండగకు షాపింగ్ మొదలుపెట్టారా లేదా? చాలా సమయం ఉంది అనుకుంటే పొరపాటే. ఏదైనా ప్రత్యేకమైన డ్రెస్సులు కుట్టించుకోవాలంటే షాపింగ్ ఇప్పుడే మొదలు పెట్టాల్సిందే. రెడీమేడ్ దుస్తులకు ఏ సమస్య ఉండదు కానీ, మీరే డిజైనింగ్ చేయించుకోవాలంటే ఓ సందేహం ఉంటుంది. ఎలాంటి డ్రెస్సుకు ఎన్ని మీటర్ల ఫ్యాబ్రిక్ అవసరం అనే ప్రశ్న ఉంటుంది. అందుకే ప్రతి డ్రెస్సుకు అమ్మాయిలకు, అబ్బాయిలకు ఎన్ని మీటర్ల క్లాత్ అవసరం అవుతుందో చూడండి.

కుర్తా, ప్యాంట్లు:

కుర్తాలు, ప్యాంట్లలో రకరకాల డిజైన్లుంటాయి. వాటన్నింటికీ వేరు వేరు మీటర్ల క్లాత్ అవసరం. అవేంటో చూడండి.

కుర్తాలు:

అనార్కలీకి ఎంత గేరా ఉంటే అంత బాగుంటుంది. కాబట్టి దీనికోసం కనీసం 5 మీటర్ల ఫ్యాబ్రిక్ అవసరం.

తక్కువ ఫ్లేర్ అనార్కలీ కుర్తీ కోసం మూడు నుంచి 4 మీటర్లు

మామూలు సల్వార్ కుర్తీకి రెండు నుంచి రెండున్నర మీటర్లు

షార్ట్ కుర్తీ 2 మీటర్లు

లాంగ్ కుర్తీ 3 మీటర్లు

మ్యాగ్జీ లెంగ్త్ డ్రెస్ కోసం 4 మీటర్లు

A లైన్ కుర్తా 2 మీటర్లు

అసిమెట్రిక్ (ముందు తక్కువ, వెనక ఎక్కువగా ఉండే డిజైన్) కోసం మూడున్నర మీటర్లు అవసరం

ప్యాంట్లు:

స్కిన్ టైట్ లేదా చుడీదార్ ప్యాంట్ కోసం రెండున్నర మీటర్లు

పలాజో ప్యాంట్ కోసం 3 మీటర్లు

సిగరెట్ ప్యాంట్స్ 2 మీటర్లు

దోతీ ప్యాంట్ లేదా పటియాలా ప్యాంట్ కోసం మంచి కుచ్చులు రావాలంటే 4 మీటర్ల క్లాత్ అవసరం

స్కర్టులు:

టీనేజ్ పిల్లలు, కాలేజీ పిల్లల కోసం స్కర్టులు వన్నె తగ్గని ఫ్యాషన్. అటు ట్రెండీగా, ఇటు కాస్త సాంప్రదాయ లుక్ వీటికుంటుంది. వీటిలోనూ రకాలుంటాయి. వాటికి ఎంత క్లాత్ అవసరమో చూద్దాం.

ఫ్లేర్డ్ స్కర్ట్ కోసం మూడున్నర నుంచి 4 మీటర్ల క్లాత్ అవసరం

తక్కువ ఫ్లేర్ ఉండే A లైన్ స్కర్ట్ కోసం 3 మీటర్లు

లెహెంగా కోసం 4 మీటర్లు

అబ్బాయిల డ్రెస్సుల కోసం:

అబ్బాయిల షర్ట్ రెండున్నర నుంచి 3 మీటర్లు

నెహ్రూ జాకెట్ లేదా కోట్ 2 నుంచి 3 మీటర్లు (చేతుల పొడవు బట్టి మారుతుంది)

కుర్తా 3 మీటర్లు

బ్లేజర్ 3 మీటర్లు

ప్యాంట్ రెండున్నర నుంచి 3 మీటర్లు

దోతీ ప్యాంట్ 5 మీటర్లు

ష్రగ్ ఒకటిన్నర్ నుంచి 2 మీటర్లు

చీర కోసం:

చీర నేరుగా కొనకుండా ఏదైనా ఫ్యాబ్రిక్ తీసుకుని డిజైన్ చేయించుకోవాలి అనుకుంటే ఐదున్నర నుంచి 6 మీటర్ల క్లాత్ అవసరం.

బ్లవుజులు:

సాదాసీదా బ్లవుజు కోసం 80 సె.మీ క్లాత్ అవసరం. చాతీ సైజ్ 36 దాటితే 1 మీటర్ క్లాత్ అవసరం అవుతుంది.

¾ స్లీవ్స్ ఉన్న బ్లవుజు కోసం 2 మీటర్ల క్లాత్ అవసరం

ప్రిన్సెస్ కట్ బ్లవుజ్ కోసం ఒకటిన్నర మీటర్ల క్లాత్ అవసరం

బ్లవుజ్ స్లీవ్స్, డిజైన్ బట్టి ఈ క్లాత్ ఎక్కువా తక్కువా అవసరం అవుతుంది.