Gangavalli mango dal: గంగవాయిల ఆకుకూరతో.. రుచికరమైన మామిడికాయ పప్పు..

చాలా రకాల ఆకు కూరలు తింటూ ఉంటాం. కానీ చాలా మందికి ఈ గంగవాయిల కూర గురించి తెలీదు. వేసవిలో ఇది ఎక్కువగా దొరుకుతుంది. ఇది సీజన్ లో దొరికే మామిడి కాయలతో దీని పప్పు రుచిగా చేసుకోవచ్చు. దీంట్లో పోషకాలు కూడా చాలా ఎక్కువ. గంగవాయిల పప్పు ఎలా చేసుకోవాలో చూద్దాం.

కావాల్సిన పదార్థాలు:

1 చిన్న మామిడి కాయ

1 కట్ట గంగవాయిల కూర

సగం కప్పు పెసరపప్పు

1 చిన్న ఉల్లిపాయ ముక్కలు

రెండు చెంచాల పల్లీలు

1 రెమ్మ కరివేపాకు

2 చెంచాల నూనె

సగం చెంచా ఆవాలు

సగం చెంచా జీలకర్ర

చెంచా జీలకర్ర పొడి

చెంచా ధనియాల పొడి

తగినంత ఉప్పు

సగం చెంచా అల్లం వెల్లుల్లి ముద్ద

సగం చెంచా పసుపు

1 స్పూన్ కారం

తయారీవిధానం:

1. ముందుగా గంగవాయిల కూరను శుభ్రంగా కడిగి పెట్టుకోవాలి. కాడలతో సహా దీన్ని వాడుకోవచ్చు.
2. ఇపుడు ఒక కడాయిలో నూనె వేసుకుని, ఆవాలు జీలకర్ర వేసుకోవాలి. అవి చిటపటలాడాక కరివేపాకు, ఉల్లిపాయ ముక్కలు, పల్లీలు వేసుకోవాలి.
3. ఉల్లిపాయ ముక్కలు రంగు మారాక చెక్కు తీసి తరుగుకున్న మామిడి కాయ ముక్కలు వేసుకోవాలి. ఇపుడు గంగవాయిల ఆకు కూడా వేసుకోవాలి.
4. అవి మెత్త బడ్డాక అల్లం వెల్లుల్లి ముద్ద, పసుపు, ధనియాల పొడి, జీలకర్ర పొడి, ఉప్పు, కారం వేసుకుని ఒక నిమిషం పాటు వేగనివ్వాలి.
5. ఇపుడు పదినిమిషాలు నానబెట్టుకున్న పెసర పప్పు వేసుకుని కప్పున్నర నీళ్లు పోసుకోవాలి. పప్పు ఉడికాక దించేసుకుంటే కమ్మని గంగవాయిల మామిడి పప్పు కూర సిద్దం.