Kanguva: సూర్య ‘కంగువా’ 8 భాషల్లో రిలీజ్‌కి సిద్ధం.. కానీ తమిళనాడు ప్రేక్షకులకి తప్పని నిరాశ

తమిళ్ హీరో సూర్య నటించిన కంగువా సినిమా భారీ అంచనాల మధ్య ఈ వారం థియేటర్లలోకి రాబోతోంది. ప్రపంచ వ్యాప్తంగా నవంబరు 14న 8 భాషల్లో ఈ కంగువా విడుదలకి సిద్ధమవుతోంది. తమిళ్ బాహుబలిగా అక్కడి మీడియా ఈ కంగువా సినిమానికి అభివర్ణిస్తుండగా.. రూ.1000 కోట్ల వరకూ వసూలు చేస్తుందని జోస్యం కోలీవుడ్ పెద్దలు జోస్యం చెప్తున్నారు.

ఐదు నుంచి 8కి పెంపు

వాస్తవానికి కంగువా సినిమాని తొలుత తమిళం, తెలుగు, కన్నడ, హిందీ, మలయాళంలో మాత్రమే రిలీజ్ చేయాలని అనుకున్నారు. ఈ మేరకు సినిమా ప్రమోషన్స్‌ బాధ్యతలను కూడా భుజాన వేసుకుని హీరో సూర్య దేశమంతా తిరుగుతున్నారు. అయితే.. ఇప్పుడు కొత్తగా స్పానిష్, ఫ్రెంచ్, ఇంగ్లీష్ భాషల్లోనూ కంగువాని విడుదల చేయడానికి చిత్ర యూనిట్ సిద్ధమైపోయింది. ఈ మేరకు 8 భాషల్లోనూ సినిమా కాపీలను సిద్ధం చేసినట్లు డైరెక్టర్ శివ స్పష్టం చేశారు.

కంగువా సినిమాలో సూర్య డ్యూయెల్ రోల్ చేస్తుండగా.. అతని సరసన బాలీవుడ్ ముద్దుగుమ్మ దిశా పటాని నటిస్తోంది. అలానే ఇటీవల సౌత్‌లో వరుస సినిమాలు చేస్తున్న బాబీ డియోల్ విలన్‌గా చేస్తున్నాడు. స్టూడియో గ్రీన్, యూవీ క్రియేషన్స్ బ్యానర్స్‌ సంయుక్తంగా ఈ కంగువా సినిమాని నిర్మించాయి.

తమిళనాడులో ఉదయం 9 గంటలకి షో

కంగువా చిత్ర యూనిట్ రిక్వెస్ట్‌తో ఏపీ, తెలంగాణతో పాటు కర్నాటక, కేరళలోనూ రిలీజ్ రోజున ఉదయం 4 గంటలకే షో‌లు పడనున్నాయి. కానీ.. తమిళనాడులో మాత్రం వేకువజామున షోలకి అనుమతి లేదు. వాస్తవానికి తమిళ్ ప్రేక్షకులను ఇది బాధపెట్టే విషయమే. కానీ.. తమిళనాడు ప్రభుత్వం మాత్రం వేకువజామున షోలకి అనుమతి నిరాకరిస్తూ.. ఉదయం 9 గంటలకి షోలకి మాత్రం గ్రీన్ సిగ్నల్ ఇచ్చింది.

బాహుబలిని ఫాలో

ఇప్పటికే విడుదలైన కంగువా ట్రైలర్‌లో సూర్య యుద్ధ వీరుడిగా, నేటి కాలం యువకుడిగా కనిపించాడు. ఇది వెయ్యేళ్ల కిందటి కథ అని డైరెక్టర్ శివ ఇప్పటికే స్పష్టం చేయగా.. కంగువా సీక్వెన్స్ కూడా ఉంటుందని సంకేతాలిచ్చారు. బాహుబలి తరహాలో కంగువా -1 క్లైమాక్స్‌లో ఐదు ప్రశ్నలతో సినిమాని ముగించబోతున్నట్లు కూడా డైరెక్టర్ శివ తెలిపారు. వాటికి జవాబులు తెలియాలంటే కంగువా-2 చూడాలంట.